ແກ໋ງກວນເມືອງໜໍ່ແໜງຄວາມບໍ່ສະຫງົບໃນສັງຄົມ

ປັດຈຸບັນປະກົດວ່າກຸ່ມໄວໜຸ່ມຂີ່ລົດຈັກເປັນພຶງເປັນແພໃນຍາມຄ່ຳຄືນ, ດັ່ງເຈົ້າໜ້າ ທີ່ໃຫ້ສັນຍານາມວ່າແກ໋ງກວນເມືອງ, ພວມເປັນເປົ້າໝາຍສຳຄັນ ຂອງພວກຄົນບໍ່ດີ ໃນການຍຸແຍ່ເພື່ອໃຫ້ເຄື່ອນໄຫວ ສ້າງຄວາມບໍ່ສະຫງົບ ໃນສັງຄົມເຊັ່ນ: ເປັນນັກ ເລງອັນຕະພານ, ຈຳໜ່າຍຢາເສບຕິດ, ປຸ້ນຊັບ, ຄ້າປະເວນີ ແລະ ອື່ນໆ, ລ້ວນແຕ່ ແມ່ນໜໍ່ແໜງຂອງຄວາມບໍ່ສະຫງົບ ແລະ ຄວາມເປັນລະບຽບຮຽບຮ້ອຍຂອງຕົວ ເມືອງ, ເຖິງວ່າໄລຍະຜ່ານມາ, ເຈົ້າໜ້າທີ່ທຸກຂັ້ນໄດ້ເອົາໃຈໃສ່ໃນການສະ ກັດກັ້ນດ້ວຍການນຳໃຊ້ບັນດາມາດຕະການ ຕ່າງໆຈາກເບົາໄປຫາໜັກ, ແຕ່ປາກົດວ່າກຸ່ມແກ໋ງດັ່ງກ່າວຍັງ ສືບຕໍ່ສະແດງພຶດຕິກຳທີ່ບໍ່ດີໃຫ້ເຫັນຢ່າງແຜ່ຫລາຍ ໃນປັດຈຸບັນເປັນຕົ້ນ: ຂັບຂີ່ລົດເປັນພຶງເປັນແພສົ່ງສຽງດັງ, ດັດແປງສະພາບລົດຜິດລະບຽບ ແລະ ຍຶດຖະໜົນບາງສາຍເປັນ
ສະໜາມແຂ່ງລົດຂອງພວກເຂົາ, ອັນເປັນການສ້າງຄວາມລຳຄານ ແລະ ລົບກວນຍາມລັບນອນຂອງປະຊາຊົນ, ສ້າງຄວາມ ຫຍຸ້ງ ຍາກສັບສົນຕໍ່ການສັນຈອນ ແລະ ສ້າງຄວາມຢ້ານກົວໃຫ້ແກ່ຜູ້ສັນຈອນຜ່ານໄປມາ, ໂດຍສະເພາະບັນຫາອຸປະຕິເຫດ, ຊິງຊັບ ,ທຳຮ້າຍຮ່າງກາຍຕ່າງໆທີ່ເຄີຍເກີດຂຶ້ນ ແລະ ເປັນຂ່າວຢູ່ຕາມສື່ມວນຊົນ ແລະ ສື່ສັງຄົມອອນລາຍຄືດັ່ງຜ່ານມາ, ເຊິ່ງນັບວ່າເປັນການທ້າທາຍເຈົ້າໜ້າທີ່ ແລະ ລະບຽບກົດໝາຍບ້ານເມືອງຢ່າງຮ້າຍແຮງ ແລະ ຖ້າບໍ່ມີມາດຕະການດັບສູນ ແບບເດັດຂາດຕໍ່ກຸ່ມແກ໋ງດັ່ງກ່າວນີ້ກໍຈະເຮັດໃຫ້ນະໂຍບາຍ 6 ສ, ໂດຍສະເພາະແມ່ນ ສ ສະຫງົບ ຂອງນະຄອນ ຫລວງວຽງຈັນວາງອອກນັ້ນປາກົດຜົນເປັນຈິງໄດ້ຍາກ.