ສິ່ງທ້າທາຍຂອງການສຶກສາລາວຕ້ອງໄດ້ແກ້ໄຂແຕ່ຫົວທີ

ສູນປະກັນຄຸນນະພາບການສຶກສາ, ກະຊວງສຶກສາທິການ ແລະ ກິລາມີຄວາມເປັນຫວ່ງຫລາຍຢ່າງໃນການປັບປຸງຍົກລະດັບຄຸນນະພາບຂອງການສຶກສາຢູ່ປະເທດເຮົາເພື່ອໃຫ້ທຽບທັນສາມາດເຊື່ອມໂຍງກັບພາກພື້ນ ແລະ ສາກົນໃນຕໍ່ໜ້າ, ພາຍຫລັງພົບເຫັນບັນຫາທີ່ຈະຕ້ອງໄດ້ແກ້ໄຂບໍ່ໜ້ອຍ.

ທ່ານຫົວໜ້າສູນປະກັນຄຸນນະພາບການສຶກສາໃຫ້ຮູ້ວ່າ: ກະຊວງສຶກສາທິການ ແລະ ກິລາ, ໄດ້ພັດທະນາລະບົບປະກັນຄຸນນະພາບການສຶກສາແຫ່ງຊາດເພື່ອເຮັດໜ້າທີ່ກໍານົດມາດຕະຖານຄຸນນະພາບການສຶກສາໃນທຸກຂັ້ນ, ທຸກສາຍໃຫ້ສອດຄ່ອງກັບແຜນປະຕິຮູບລະບົບການສຶກສາແຫ່ງຊາດ ແລະ ມາດຕະຖານຂອງພາກພື້ນ ແລະ ສາກົນ, ນັບແຕ່ການປະເມີນຄຸນນະພາບຂອງຄູສອນ, ຜູ້ບໍລິຫານ, ລະບົບການຮຽນ-ການສອນ, ຜົນການຮັບຮູ້ຂອງຜູ້ຮຽນ, ອາຄານ

ສະຖານທີ່ ແລະ ສິ່ງອໍານວຍຄວາມສະດວກອື່ນໆ, ເພື່ອຮັບປະກັນວ່າລະບົບການສຶກສາລາວມີຄຸນນະພາບດີ, ນັກຮຽນ-ນັກສຶກສາໄດ້ຮັບການຮຽນຮູ້ ແລະ ກໍ່ສ້າງຢ່າງມີປະສິດທິພາບເພື່ອໃຫ້ສາມາດປະກອບສ່ວນເຂົ້າໃນການສ້າງສາພັດທະນາປະເທດຊາດໄດ້ຢ່າງແທ້ຈິງ. ແຕ່ແນວໃດກໍຕາມ, ການຈະບັນລຸເປົ້າໝາຍດັ່ງກ່າວມັນບໍ່ແມ່ນເລື່ອງງ່າຍດາຍປານໃດ, ເນື່ອງຈາກວ່າພວກເຮົາຍັງມີຫລາຍສິ່ງທ້າທາຍທີ່ຈະຕ້ອງໄດ້ແກ້ໄຂເທື່ອລະກ້າວນັບແຕ່ລະບົບການສຶກສາຂັ້ນພື້ນຖານປະຖົມ-ມັດທະຍົມກໍຍັງບໍ່ທັນອໍານວຍຄວາມສະດວກເທົ່າທີ່ຄວນເປັນຕົ້ນ: ແມ່ນດ້ານບຸກຄະລາກອນ, ການຈັດຕັ້ງຂັ້ນທ້ອງຖິ່ນ ແລະ ງົບປະມານແມ່ນມີຈໍາກັດ, ຂະນະດຽວກັນລະບົບການສຶກສາຫລັງການສຶກສາຂັ້ນພື້ນຖານເຊັ່ນ: ການສຶກສາສາຍອາຊີວະສຶກສາ, ຊັ້ນສູງ, ວີຊາຊີບ ແລະ ວິຊາສະເພາະຕ່າງໆຍັງບໍ່ທັນສອດຄ່ອງກັບຄວາມຕ້ອງການຕົວຈິງຂອງການພັດທະນາເສດຖະກິດ-ສັງຄົມ, ການສ້າງນັກສຶກສາອອກຮັບໃຊ້ສັງຄົມຍັງໄດ້ແຕ່ປະລິມານຫລາຍກວ່າຄົນນະພາບ, ສິ່ງອໍານວຍຄວາມສະດວກດ້ານການຮຽນ-ການສອນຍັງຂາດເຂີນ, ກະແສຮັບນັກສຶກສາເຂົ້າຮຽນສາຍອາຊີວະສຶກສາ, ຊັ້ນກາງ, ຊັ້ນສູງແລະ ມະຫາວິທະຍາໄລຍັງເຮີຕາມກະແສນິຍົມຂອງສັງຄົມເຊັ່ນ: ຈໍານວນນັກສຶກສາທີ່ຮຽນສາຍບໍລິຫານທຸລະກິດຈະມີອັດຕາສ່ວນຫລາຍກວ່າໂດຍສະເລ່ຍກວມເກືອບ 50% ຂອງນັກສຶກສາໃນສາຂາອາຊີບຕ່າງໆ, ເຊິ່ງບັນຫາດັ່ງກ່າວແມ່ນສິ່ງທ້າທາຍສໍາຄັນຕໍ່ການພັດທະນາການສຶກສາລາວເພື່ອໃຫ້ສາມາດເຊື່ອມໂຍງກັບສາກົນ ແລະ ຈະມີຜົນສະທ້ອນຕໍ່ການສ້າງຊັບພະຍາກອນມະນຸດມາພັດທະນາປະເທດຊາດໃນອະນາຄົດຖ້າພວກເຮົາບໍ່ພ້ອມກັນຮີບຮ້ອນແກ້ໄຂຕັ້ງແຕ່ດຽວນີ້.