ຈະມີການຍ່າງເພື່ອສຸຂະພາບສະຫລອງວັນສັນຕິພາບສາກົນ ຄົບຮອບ 14 ປີໃນເຊົ້າວັນທີ 17 ກັນຍານີ້

          ວັນທີ 13 ກັນຍານີ້, ທ່ານ ຄຳພັນ ສິມມາລາວົງ ປະທານຄະນະສັນຕິພາບ ແລະ ສາມັກຄີລາວ ໄດ້ຖະແຫລງຂ່າວເຊີນຊວນປະຊາຊົນບັນດາເຜົ່າ, ໂດຍສະເພາະຊາວນະຄອນຫລວງວຽງຈັນ ເຂົ້າຮ່ວມກິດຈະກຳຍ່າງເພື່ອສຸຂະພາບໃນເຊົ້າວັນເສົາ, ວັນທີ 17 ກັນຍານີ້, ແຕ່ປະຕູໄຊໄປຫາຫໍຄຳ, ເພື່ອເປັນການສະເຫລີມສະຫລອງວັນສັນຕິພາບສາກົນ 21 ກັນຍາ (International Day of Peace) ຄົບຮອບ 14 ແລະ ສະແດງໃຫ້ເຫັນເຖິງຄວາມມີນ້ຳໃຈ ແລະ ຄວາມປາຖະໜາຂອງປະຊາຊົນລາວບັນດາເຜົ່າທີ່ຍາມໃດກໍຮັກໃນສັນຕິ ພາບ, ຮັກຄວາມສະຫງົບສຸກ ແລະ ຄວາມເປັນທຳ, ພ້ອມທັງເປັນການປູກຈິດສຳນຶກໃຫ້ຊາວໜຸ່ມເຍົາວະຊົນ ຕະຫລອດຮອດປະຊາຊົນລາວບັນດາເຜົ່າໄດ້ຮັບຮູ້, ເຂົ້າໃຈ ແລະ ເຫັນຄວາມສຳຄັນຂອງ

ວຽກງານສັນຕິພາບ, ເຊິ່ງຕິດພັນກັບການພັດທະນາທັງເປັນການປະ ກອບສ່ວນເສີມສ້າງສັນຕິພາບໃນພາກພື້ນ ແລະ ໃນໂລກ, ພ້ອມທັງຍັງເປັນການສະໜັບສະໜູນ ແລະ ຜັນຂະຫຍາຍເນື້ອໃນຂອງອົງການສະຫະປະຊາຊາດ ທີ່ຮຽກຮ້ອງໃຫ້ອົງການຈັດຕັ້ງສາກົນຕ່າງໆໃນທົ່ວໂລກ, ພ້ອມກັນຈັດກິດຈະກຳເພື່ອສະເຫລີມສະຫລອງວັນດັ່ງກ່າວໃຫ້ມີຂະບວນຟົດຟື້ນ ແລະ ພ້ອມ ພຽງ, ເຮັດໃຫ້ວັນດັ່ງກ່າວເປັນວັນຢຸດຕິການໃຊ້ຄວາມຮຸນແຮງ, ການສູ້ຮົບ, ການລຶບລ້າງຄວາມອຶດຫິວ ແລະ ບັນຫາອື່ນໆທີ່ສົ່ງຜົນກະທົບທາງລົບຕໍ່ສັນຕິພາບ ແລະ ການພັດທະນາໃນໂລກນຳອີກ.

          ວັນສັນຕິພາບສາກົນ ແມ່ນໄດ້ຖືກຮັບຮອງເອົາໂດຍກອງປະຊຸມສະມັດຊາໃຫຍ່ ຂອງອົງການສະຫະປະຊາຊາດ ຄັ້ງທີ 57, ບັນດາລັດສະມາຊິກຂອງອົງການສະຫະປະຊາຊາດ ລວມທັງ ສປປ ລາວ ໄດ້ເຫັນພ້ອມກັນຮັບຮອງເອົາມະຕິຂອງສະມັດຊາໃຫຍ່ ເພື່ອກຳນົດເອົາວັນທີ 21 ກັນຍາຂອງທຸກໆປີເປັນວັນສັນຕິພາບສາກົນ ແລະ ໄດ້ເລີ່ມປະຕິບັດມາແຕ່ປີ 2002 ເປັນຕົ້ນມາ.