ນະຄອນຫລວງ​ວຽງ​ຈັນ ຈັດ​ກຳລັງເຈົ້າໜ້າທີ່ຫລາຍກວ່າ 600 ນາຍ ສຸມໃສ່ປະຕິບັດໜ້າທີ່ ໃນໄລຍະປີໃໝ່ສາກົນ

     ທ່ານ ພັນຕີ ວິລະພົງ ສະເໜ່ຫາ ຮອງຫົວໜ້າພະແນກຕຳຫລວດຈະລາຈອນ ນະຄອນຫລວງວຽງຈັນ, ຫົວໜ້າກອງແກ້ໄຂຄະດີອຸປະຕິເຫດ ໄດ້ໃຫ້ສຳພາດໃນວັນທີ 29 ທັນວາ ນີ້ວ່າ: ການປ້ອງການອຸປະຕິເຫດທາງທ້ອງຖະໜົນໃນລະຫວ່າງວັນທີ 29 ທັນວາ 2015 ເຖິງວັນທີ 2 ມັງກອນ 2016, ເຊິ່ງເປັນໄລຍະການສະເຫລີມສະຫລອງປີໃໝ່ສາກົນ, ນະຄອນຫລວງວຽງຈັນ ໄດ້ລະດົມກຳລັງເຈົ້າໜ້າທີ່ຈະ​ລາ​ຈອນ ຫລາຍ​ກວ່າ 600 ສະຫາຍເຂົ້າປະຕິບັດໜ້າທີ່, ໂດຍການຕັ້ງຈຸດກວດກາຄວາມໄວ, ທາດເຫລົ້າ ແລະ ອື່ນໆ ຕາມຊາຍແດນແຕ່ລະເມືອງ, ໂດຍສະເພາະ  4 ເມືອງ​ໃນ ແລະ 5 ເມືອງນອກ ໃນທີ່ມີຄວາມສ່ຽງເກີດອຸປະຕິເຫດ, ທັງນີ້ກໍເພື່ອປ້ອງກັນ ການເກີດອຸປະຕິເຫດຕາມທ້ອງ ຖະໜົນສາຍຕ່າງໆໃຫ້ຫລຸດຜ່ອນລົງຕາມລຳດັບ, ໂດຍສະເພາະ ໃນປີນີ້ ກົມຕຳຫລວດ ຈະລາຈອນ ໄດ້

ອອກແຈ້ງການກ່ຽວກັບການຈັດກຳລັງສຸມໃສ່ປ້ອງກັນ ແລະ ສະກັດກັ້ນ ການເກີດອຸປະຕິເຫດໃນໄລຍສະ ເຫລີມສະຫລອງປີໃໝ່ສາກົນໃຫ້ຫລຸດລົງເທື່ອລະກ້າວ ໃນນີ້ ນະຄອນຫລວງວຽງຈັນ ໄດ້ສຸມໃສ່ການຈັດກຳລັງເຈົ້າໜ້າທີ່ລົງປະຕິບັດໜ້າທີ່ແຕ່ ລະຈຸດໃນແຕ່ລະເມືອງຂອງຕົນ, ໂຄສະນາຕາມສະຖານທີ່ໂຮງຮຽນ, ໂຮງງານ, ບໍລິສັດ, ຕາມບ້ານ ແລະ ສະຖານທີ່ຕ່າງໆ ​ເພື່ອໃຫ້ທຸກຄົນໄດ້ຮັບຮູ້, ເຂົ້າໃຈ ແລະ ປະຕິບັດລະບຽບ ຈະລາຈອນໃຫ້ເຂັ້ມງວດ ເພື່ອຫລຸດຜ່ອນອຸປະຕິເຫດ, ພ້ອມທັງຕັ້ງຈຸດກວດກາໃນໄລຍະ ບຸນປີໃໝ່ຢ່າງເຂັ້ມງວດ ແລະ ຢູ່ແຕ່ລະປ້ອມມີເຈົ້າໜ້າທີ່ປະຈຳການ 24 ຊົ່ວໂມງ, ຖ້າ ເປັນປ້ອມນ້ອຍແມ່ນ 16 ຊົ່ວໂມງ, ເພື່ອຮັບປະກັນໃຫ້ປະຊາຊົນທຸກຄົນໄດ້ມ່ວນຊື່ນໃນການສະເຫລີມ ສະຫລອງປີໃໝ່ສາກົນຢ່າງເປັນລະບຽບຮຽບຮ້ອຍ ​ແລະ ປອດ​ໄພ.

     ທ່ານຮອງຫົວໜ້າພະແນກຈະລາຈອນ ນະຄອນຫລວງວຽງຈັນ ຍັງໄດ້​ໃຫ້​ຮູ້​ຕື່ມ​ວ່າ: ​ໃນ​ປີ 2015 ມີອຸປະຕິເຫດເກີດຂຶ້ນ 1.568 ກໍລະນີ, ມີພາຫະນະເປ່ເພຫລາຍ​ກວ່າພັນ​ຄັນ, ​ໃນ​ນີ້​ມີ​ຜູ້​ເສຍ​ຊີວິດ 241 ຄົນ ​ເມື່ອ​ທຽບ​ໃສ່​ປີ 2015ຜ່ານ​ມາ ​ເຫັນ​ວ່າ ມີ​ຕົວ​ເລກ​ເພີ່ມ​ຂຶ້ນ.