ລາວສະເຫຼີມສະຫຼອງການສ້າງຕັ້ງປະຊາຄົມອາຊຽນຢ່າງເປັນທາງການ

ພິທີສະເຫຼີມສະຫຼອງການສ້າງຕັ້ງເປັນປະຊາຄົມອາຊຽນໄດ້ຈັດຂຶ້ນໃນວັນທີ 30 ທັນວາ 2015 ຜ່ານມານີ້, ທີ່ໂຮງແຮມແລນມາກ ນະຄອນຫຼວງວຽງຈັນ ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ, ທັງເປັນຜູ້ຊີ້ນຳເສົາຄ້ຳການເມືອງ-ຄົງໝັ້ນຄົງ ອາຊຽນຂອງ ສປປ ລາວ, ມີບັນດາລັດຖະມົນຕີ, ຫົວໜ້າເຈົ້າໜ້າທີ່ອາວຸໂສຈາກຂະແໜງການຕ່າງໆທີ່ກ່ຽວຂ້ອງ, ພ້ອມດ້ວຍທູຕານຸທູດ, ຜູ້ຕາງໜ້າອົງການຈັດຕັ້ງສາກົນເຂົ້າຮ່ວມ.

ທ່ານ ຮອງນາຍົກ ທອງລຸນ ສີສຸລິດ ກ່າວໃນພິທີວ່າ: ການປະກາດສ້າງຕັ້ງປະຊາຄົມອາຊຽນຢ່າງເປັນທາງການໃນວັນທີ 31 ທັນວາ 2015 ເປັນການໄຂສັງກາດໃໝ່ຂອງປະຫວັດສາດອາຊຽນ, ຊຶ່ງແມ່ນໝາກຜົນຂອງຄວາມໝາຍໝັ້ນທາງການເມືອງອັນແຮງກ້າ ແລະ ການຮ່ວມມືກັນພາຍໃນອາຊຽນ ແລະ

ລະຫວ່າງອາຊຽນກັບຄູ່ຮ່ວມມືພາຍນອກ, ໃນໄລຍະເກືອບ 5 ທົດສະວັດ ທີ່ຜ່ານມາໂດຍຜ່ານການຈັດຕັ້ງປະຕິບັດບັນດາຂໍ້ລິເລີ່ມ, ແຜນແມ່ບົດ ແລະ ແຜນວຽກງານຕ່າງໆ ແລະ ໝາກຜົນທີ່ອາຊຽນຍາດມາໄດ້ແມ່ນມີລັກສະນະພົ້ນເດັ່ນ, ຊຶ່ງແມ່ນປະຊາຊົນບັນດາປະເທດສະມາຊິກອາຊຽນດຳລົງຊີວິດຢູ່ຮ່ວມກັນໃນພາກພື້ນທີ່ມີສັນຕິພາບ, ສະຖຽນລະພາບ ແລະ ຄວາມສົມບູນພູມສຸກ, ຊຶ່ງຜົນສຳເລັດດັ່ງກ່າວເກີດຂຶ້ນໄດ້ຍ້ອນອາຊຽນຮ່ວມມືກັນບົນພື້ນຖານ “ ວິຖິທາງອາຊຽນ ”ໂດຍອີງໃສ່ລັກສະນະສະເພາະ ແລະ ຈຸດພິເສດຂອງພາກພື້ນ, ເຖິງຢ່າງໃດກໍດີ, ນັບແຕ່ວັນທີ 31 ທັນວາ 2015 ເປັນຕົ້ນໄປອາຊຽນຈະກາຍເປັນພາກພື້ນທີ່ເປັນຕະຫຼາດ ແລະ ຖານການຜະລິດໜຶ່ງດຽວ, ມີປະຊາ ກອນປະມານ 622 ລ້ານຄົນ, ມີລວມຍອດຜະລິດຕະພັນພາຍໃນ 2,6 ພັນຕື້ລ້ານໂດລາສະຫະລັດ ແລະ ມີເສດຖະກິດລວມໃຫຍ່ເປັນອັນດັບທີ 7 ຂອງໂລກ.

ທ່ານ ຮອງນາຍົກກ່າວວ່າ: ອາຊຽນເປັນພາກພື້ນທີ່ມີຄວາມຫຼາກຫຼາຍທາງດ້ານວັດທະນະທຳ, ສາສະໜາ, ພາສາ, ແຕ່ກໍເປັນປະຊາຄົມທີ່ມີຄວາມໂອບເອື້ອອາລີ ,ອາຊຽນເປັນພາກສ່ວນທີ່ສຳຄັນ ແລະ ເປັນແກນກາງຂອງໂຄງສ້າງຂອງພາກພື້ນທີ່ພວມຫັນປ່ຽນ, ທັງເປັນຕົວຢ່າງທີ່ມີລັກສະນະສະເພາະ, ໂດຍມີ 10 ປະເທດສະມາຊິກທີ່ມີຄວາມຫຼາກຫຼາຍແຕ່ສາມາດຮ່ວມມືກັນພາຍໃຕ້ປະຊາຄົມອາຊຽນ, ໂອກາດນີ້ທ່ານຮອງນາຍົກ ທອງລຸນ ສີສຸລິດ ຍັງໄດ້ແຈ້ງເຖິງຄວາມຄືບໜ້າຂອງການກະ ກຽມເປັນປະທານອາຊຽນຂອງລາວໃນປີ 2016 ພາຍໃຕ້ຄຳຂວັນ ” ຫັນວິໄສທັດໃຫ້ເປັນຮູບປະທຳເພື່ອຄວາມເຂັ້ມແຂງຂອງປະຊາຄົມອາຊຽນ” ເພື່ອໃຫ້ປະຊາຊົນບັນດາເຜົ່າກໍຄືຜູ້ເຂົ້າຮ່ວມງານໄດ້ຮັບຊາບອີກດ້ວຍ.