ດຶງດູດນັກທ່ອງທ່ຽວດ້ວຍນະໂຍບາຍວີຊາ ( ຄໍລຳ ເບິ່ງກວ້າງເຫັນໄກ )

​

ໂດຍ : ວິເສດ ສະແຫວງສຶກສາ

ໃນຍຸກໂລກາພິວັດ ເຊິ່ງມີກະແສການເຊື່ອມໂຍງເປັນຫົວຈັກຂັບ ເຄື່ອນນີ້ໂລກຂອງເຮົານັບມື້ນັບ ແຄບເຂົ້າ. ແຄບໃນແງ່ຄວາມສະດວກວ່ອງໄວໃນການຕິດຕໍ່ພົວພັນກັນລະຫວ່າງປະເທດກັບປະເທດ, ລະຫວ່າງຄົນກັບຄົນຕ່າງຊາດຕ່າງພາສາວັດທະນະທຳ ແລະ ກໍຄົງບໍ່ມີໃຜປະຕິເສດໄດ້ວ່າແມ່ແຮງຂັບເຄື່ອນຂອງຍຸກໂລກາພິວັດນັ້ນກໍຄືຄວາມກ້າວໜ້າຂອງເຕັກໂນໂລຊີຂໍ້ມູນຂ່າວສານ (ໄອທີ). ແນວໃດກໍ ແນວສຳລັບມະນຸດແລ້ວການໃກ້ ຊິດໂດຍຜ່ານເຄື່ອງມືໄອທີນັ້ນຍັງບໍ່ຄັກ, ບໍ່ກິນໃຈສໍ່າໄດ້ພົບໜ້າພໍ້ຕາ, ຜ່ານປະສາດສຳຜັດຕົວຈິງ. ຍ້ອນແນວນີ້ເອງຍິ່ງເຕັກໂນໂລຊີຈະເລີນ ເທົ່າໃດຂະບວນການທ່ອງທ່ຽວກໍ ຍິ່ງເຕີບໃຫຍ່, ພິສູດໄດ້ຈາກບົດລາຍງານປະຈຳປີຂອງອົງການ ທ່ອງທ່ຽວໂລກທ່ີບອກວ່າ: ປີ 2015 ຜ່ານມາ, ຈຳນວນນັກທ່ອງທ່ຽວໃນທົ່ວໂລກໄດ້ເພີ່ມ ຫລາຍທົບເທົ່າ ແລະ ວ່າພາກ

ພື້ນອາຊີ-ປາຊີຟິກພວກເຮົາສາມາດດຶງດູດນັກທ່ອງທ່ຽວໄດ້ພູດໃຫຍ່ ກວ່າໝູ່. ເພື່ອຈັບໂອກາດຍາດເວລາດຶງດູດນັກທ່ອງທ່ຽວຕ່າງປະ ເທດໃຫ້ໄດ້ໃນຈຳນວນເພີ່ມຂຶ້ນ, ຫລາຍປະເທດໃນອາຊີຕາເວັນອອກສຽງໃຕ້ ຫລື ອາຊຽນຂອງ ພວກເຮົາຕ່າງກໍມີນະໂຍບາຍດຶງ ດູດດ້ວຍຫລາຍຮູບການ, ແຕ່ສິ່ງໜຶ່ງທີ່ເປັນມາດຕະການລວມກໍຄືນະໂຍບາຍຜ່ອນຜັນຂັ້ນຕອນ, ຄ່າໃຊ້ຈ່າຍໃນການອະນຸມັດວີຊາເຂົ້າ-ອອກປະເທດຄືເຮັດໃຫ້ມັນງ່າຍຂຶ້ນ. ບົດຮຽນນີ້ ອົງການທ່ອງທ່ຽວບ້ານ ເຮົາຄົງເບິ່ງໄວ້ແລ້ວ. ຢູ່ຟີລິບປິນໃນ ປີ 2015 ຜ່ານມາ, ທາງການໄດ້ ອອກວີຊາໃຫ້ຄົນຕ່າງປະເທດທີ່ບໍ່ແມ່ນນັກທ່ອງທ່ຽວເຂົ້າປະເທດໄດ້ເຖິງ 25 ພັນຄົນ. ຄົນຕ່າງປະເທດ ເຫລົ່ານີ້ເຂົ້າໄປຕັ້ງຫລັກປັກແຫລ່ງຢູ່ຟີລິບປິນໃນຖານະເປັນປະເທດທີສອງຂອງພວກຕົນ. ເງິນຄ່າອອກວີຊາທີ່ເກັບໄດ້ນັ້ນມີເຖິງ 21,22 ລ້ານໂດລາສະຫະລັດ (ຫລາຍ ກວ່າ 1 ຕື້ ເງິນເປໂຊຂອງຟີລິບປິນ). ໃນປີ 2015 ຟີລິບປິນໄດ້ປັບປຸງວິທີອອກວີຊາໃຫ້ງ່າຍຂຶ້ນໂດຍ ໄດ້ມອບສິດໃຫ້ໜ່ວຍງານສະເພາະກິດອອກໃຫ້ເລີຍ. ແຕ່ກ່ອນຈະອອກວີຊາໃຫ້ຄົນຕ່າງປະເທດທີ່ເຂົ້າໄປລົງທຶນ ຫລື ຢູ່ເຄື່ອນໄຫວກໍຕ້ອງ ໄດ້ລໍຖ້າການຕົກລົງຂອງຄະນະຮັບຜິດຊອບຄົນເຂົ້າເມືອງເຊິ່ງມີຕາຕະລາງປະຊຸມຕົກລົງບັນຫາ 1 ຄັ້ງຕໍ່ອາທິດເທົ່ານັ້ນ. ສ່ວນຢູ່ປະເທດໄທນັ້ນ ນັບແຕ່ທ້າຍເດືອນສິງຫາປີ 2015 ເປັນຕົ້ນມາທາງການໄດ້ນຳໃຊ້ນະໂຍບາຍອອກວີຊາເຂົ້າ- ອອກປະເທດໄດ້ຫລາຍເທື່ອໂດຍເກັບຄ່າພຽງ 5.000 ບາດ ເທົ່ານັ້ນ (ປະມານດິບ) ໂດຍມີກຳນົດໃຊ້ ໄດ້ເຖິງ 6 ເດືອນ. ແຕ່ກ່ອນນັ້ນທາງການໄທເກັບຄ່າວີຊາປະເພດທຳມະດາໃນມູນຄ່າ 1.000 ບາດ, ແຕ່ວ່າຍັງຕ້ອງໄດ້ຈ່າຍ 1.000 ບາດໃນການເຂົ້າ-ອອກແຕ່ລະ ເທື່ອຕື່ມ ເຊິ່ງເປັນການສິ້ນເປືອງກວ່າຈ່າຍຄັ້ງດຽວ 5.000 ບາດ ແຕ່ເຂົ້າ-ອອກໄດ້ຕາມໃຈມັກພາຍໃນ 6 ເດືອນ ໂດຍບໍ່ໄດ້ຈ່າຍເພີ່ມອີກ. ທີ່ສິງກະໂປ ນັບແຕ່ວັນທີ 1 ເດືອນມິຖຸນາ ປີ 2015 ເປັນຕົ້ນມາ, ທາງການໄດ້ອອກວີຊາປະເພດເຂົ້າ-ອອກປະເທດໄດ້ຫລາຍເທື່ອ ເຊິ່ງມີອາຍຸໃຊ້ການໄດ້ເຖິງ 10 ປີ ເຊິ່ງອາດຈະເອີ້ນວ່າ “ວີຊາມາລາ ທອນກໍໄດ້”. ແຕ່ວີຊາປະເພດນີ້ ອອກໃຫ້ສະເພາະນັກທ່ອງທ່ຽວ ຈາກ ສປ ຈີນ ເທົ່ານັ້ນ. ບໍ່ພຽງເທົ່າ ນັ້ນ, ວີຊາປະເພດນີ້ຍັງກຸ້ມທັງສິດ ຂອງຜົວ ຫລື ເມຍ ແລະ ລູກໆທີ່ມີ ອາຍຸບໍ່ເກີນ 21 ປີ ຂອງຜູ້ທີ່ຖືວີຊາ ອີກດ້ວຍ. ທາງການສິງກະໂປ ບອກວ່າ: ວີຊາມາລາທອນອາຍຸ 10 ປີ ປະເພດເຂົ້າ-ອອກປະເທດ ໄດ້ຫລາຍເທື່ອນີ້ຈະສາມາດດຶງດູດ ບໍ່ສະເພາະແຕ່ນັກທ່ອງທ່ຽວຈີນ, ແຕ່ຍັງກວມເອົາທັງນັກທຸລະກິດຖົງໜັກໆອີກດ້ວຍ. ຢູ່ໄທກໍເຊັ່ນດຽວກັນ, ນະໂຍບາຍວີຊາລາຄາຖືກກວ່າເກົ່າຈະຊ່ວຍເພີ່ມຈຳນວນນັກທ່ອງທ່ຽວເຂົ້າປະເທດຫລາຍຂຶ້ນ ຄືຄາດຫວັງໃຫ້ໄດ້ເຖິງ 25 ລ້ານຄົນ ໃນທ້າຍປີ 2015, ໃນນັ້ນ 6 ລ້ານຄົນຈາກ ສປ ຈີນ ແລະ ອີກຈຳນວນຫລວງຫລາຍຈາກອິນເດຍ. ເປັນອັນວ່ານະໂຍບາຍສ້າງຄວາມສະດວກສະບາຍໃນການອອກວີຊາ ແລະ ຫລຸດຜ່ອນການເກັບຄ່າ ນັ້ນແມ່ນມາດຕະການຍອດຢ້ຽມຂອງຫລາຍໆປະເທດໃນການດຶງດູດນັກທ່ອງທ່ຽວ ແລະ ນັກລົງທຶນ ຕ່າງປະເທດ.