ເລີ່ມແຕ່ທ້າຍເດືອນມັງກອນຕໍ່ໃສ່ເດືອນກຸມພາມານີ້ຢູ່ນະຄອນຫລວງວຽງຈັນໄດ້ປາກົດມີກິ່ນອາຍ ແລະ ສີສັນອັນເປັນສັນຍາລັກຂອງເທດສະການປີໃໝ່ປະຈໍາຊາດຫວຽດນາມ ແລະ ຊາວຈີນທີ່ພວມກະກຽມສະເຫລີມສະຫລອງກັນຢ່າງມ່ວນຊື່ນ.
ປະເທດລາວ, ແມ່ນປະເທດໜຶ່ງທີ່ມີຄົນເຊື້ອສາຍຫວຽດນາມ ແລະ ຈີນໄດ້ເຈືອຈາງຢູ່ອາໄສມາດົນນານ, ໂດຍຜ່ານການເຂົ້າມາດໍາລົງຊີວິດ, ເຄື່ອນໄຫວເຮັດທຸລະກິດ, ທ່ອງທ່ຽວ ແລະ
ອື່ນໆເປັນຈໍານວນຫລາຍ.ດັ່ງນັ້ນໃນແຕ່ລະປີເມື່ອຮອດເທດສະການປີໃໝ່ດັງກ່າວແລ້ວເຂົາເຈົ້າກໍຈະຈັດສະເຫລີມສະຫລອງຕາມຮີດຄອງປະເພນີທີ່ສືບທອດກັນມາແຕ່ດຶກດໍາບັນດ້ວຍບັນຍາກາດເບີກບານມ່ວນຊື່ນ.
ສໍາລັບປີໃໝ່ປີນີ້ກໍເຊັ່ນກັນ, ປາກົດວ່າໄດ້ມີບັນຍາກາດ ແລະ ສີສັນຟົດຟື້ນແຕ່ຫົວທີ, ໂດຍສະເພາະຕາມຖະໜົນສາຍຕ່າງໆໃນຕົວເມືອງໄດ້ຖືກປະດັບເອ້ໄປດ້ວຍສີນຄ້າຫລາກຫລາຍປະເພດສໍາລັບການຊົມໃຊ້ເຂົ້າໃນເທດສະການດັ່ງກ່າວ, ນັບແຕ່ເຄື່ອງນຸ່ງຫົ່ມໄປຈົນຮອດອາຫານການກິນປະເພດຕ່າງໆກໍຖືກນໍາມາວາງຈໍາໜ່າຍຢ່າງຫລວງຫລາຍ ໂດຍສະເພາະແມ່ນເຂົ້າຕົ້ມ, ເຂົ້າໜົມມິດເຕັດ ເຊິ່ງເປັນອັນຂາດບໍ່ໄດ້ສຳລັບບຸນເຕດດັ່ງກ່າວ. ສ່ວນຢູ່ຕາມທ້ອງຕະຫລາດໃຫຍ່ສະພາບການຊື້ຂາຍສີນຄ້າປະເພດອຸປະໂພກ-ບໍລິໂພກໃນຊ່ວງໄລຍະນີ້ກໍນັບວ່າມີຄວາມຄືກຄື້ນດີສົມຄວນ.ຊຶ່ງຜ່ານການລົງຕິດຕາມເບິ່ງສີນຄ້າທີ່ຂາຍດີກວ່າໝູ່ແມ່ນປະເພດເຂົ້າ, ຊີ້ນໝູ ແລະ
ໄກ່, ສ່ວນປະເພດພືດຜັກກໍແມ່ນຜັກບົ່ວ, ຫອມປ້ອມ, ສະລັດເຫລົ່ານີ້ເປັນຕົ້ນ ແລະ ລາຄາກໍເຫັນວ່າຍັງຢູ່ໃນເກນປົກກະຕິ, ແຕ່ອາດຈະມີບາງລາຍການເໜັງຕິງແພງຂຶ້ນເລັກໜ້ອຍຕາມກົນໄກຕະຫລາດ.
ແນວໃດກໍຕາມ, ໃນໄລຍະເທດສະການດັ່ງກ່າວນີ້ກໍຂໍໃຫ້ພີ່ນ້ອງຄົນລາວທີ່ມີເຊື້ອສາຍຫວຽດນາມ
ແລະ ຈີນລວມເຖິງຊາວຫວຽດນາມ ແລະ
ຊາວຈີນທີ່ມາດໍາລົງຊີວິດ, ເຄື່ອນໄຫວເຮັດທຸລະກິດຕ່າງໆ ໄດ້ສະຫລອງບຸນດັ່ງກ່າວດ້ວຍຄວາມມ່ວນຊື່ນຕາມຮີດຄອງປະເພດນີອັນດີງາມ, ຂະນະດຽວກັນກໍໃຫ້ເອົາໃຈໃສ່ມີສະຕິລະວັງຕົວໃນການຮັກສາຄວາມເປັນລະບຽບຮຽບຮ້ອຍ
ແລະ ຄວາມສະຫງົບປອດໄພ ແລະ ອີກບັນຫາສໍາຄັນໜຶ່ງທີ່ຕ້ອງໄດ້ເອົາໃຈໃສ່ແມ່ນການໃຕ້ທູບທຽນບູຊາຕ່າງໆ ເມື່ອສໍາເລັດແລ້ວກໍໃຫ້ດັບມອດທັນທີເພື່ອຮັບປະກັນບໍ່ໃຫ້ມີອັກຄີໄພເກີດຂຶ້ນໄດ້ງ່າຍຄືດັ່ງແຕ່ລະປີຜ່ານມາ.
No comments:
Post a Comment