ຍົກລະດັບການກວດກາໃຫ້ສະຖາບັນການເງິນລາວ

ໃນວັນທີ 28-29 ມັງກອນຜ່ານມານີ້ ກົມຄຸ້ມຄອງສະຖາບັນການເງິນ ທະນາຄານແຫ່ງ ສປປ ລາວ (ທຫລ) ຮ່ວມກັບສະຫະພັນສະຫະກອນ ອາຊຽນ (ACCU) ໄດ້ຈັດການຝຶກອົບຮົມວຽກງານຄຸ້ມຄອງສະຫະກອນສິນເຊື່ອ ແລະ ເງິນຝາກປະຢັດ  ຂຶ້ນເປັນເວລາ 2 ວັນທີ່ ໂດຍການເຂົ້າຮ່ວມຂອງທ່ານຮອງຫົວໜ້າກົມຄຸ້ມຄອງສະຖາບັນການເງິນ ພ້ອມທ່ານ ທີ່ປຶກສາສະຫະພັນສະຫະກອນ ອາຊຽນ   ແລະ ນັກຝຶກອົບຮົມທີ່ເຮັດວຽກງານກວດກາຈໍານວນໜຶ່ງຈາກບັນດາກົມກອງຂອງ ທຫລ ກໍໄດ້ເຂົ້າຮ່ວມຢ່າງພ້ອມພຽງໄດ້ມີຄວາມເຂົ້າໃຈໜ້າທີ່ ແລະ ຄວາມຮັບຜິດຊອບຂອງການຕິດຕາມ,  ກວດກາ, ງົບການເງິນຂອງສະຫະກອນສິນເຊື່ອ ແລະ ເງິນຝາກປະຢັດ, ປະເມີນຄວາມພຽງພໍລະບົບການຄວບຄຸມພາຍໃນຂອງ

ສະຫະກອນສິນເຊື່ອ ແລະ ເງິນຝາກປະຢັດ, ມີຄວາມເຂົ້າໃຈໃນການຢືນຢັນການບໍລິຫານຈັດການໃນງົບການເງິນ, ການພັດທະນາຂັ້ນຕອນ, ຈຸດປະສົງຂອງການຕິດຕາມ-ກວດກາ ແລະ ການປະເມີນພະນັກງານຕິດຕາມ, ການກວດກາ-ຄວບຄຸມທີ່ມີປະສິດທິຜົນ, ພິເສດ ການຝຶກອົບຮົມໃນ 2 ມື້ຍັງເປີດໂອກາດໃຫ້ບັນດານັກຝຶກອົມຮົມໄດ້ ຂຽນໃບເກັບກ່ຽວຜົນການຝຶກອົບຮົມ (ໃບປະເມີນ) ແລະ ສ້າງແຜນປະຕິບັດງານໃນຕໍ່ໜ້າເພື່ອເປັນການສ້າງຄວາມເຂັ້ມແຂງໃຫ້ອົງກອນໃນອະນາຄົດ.

ການຝຶກອົບຮົມໃນຄັ້ງນີ້ ມີຄວາມສໍາຄັນຫຼາຍ ເພາະນອກຈາກພວກເຮົາຈະມີປະສົບການພາຍໃນປະເທດແລ້ວ ຍັງໄດ້ຮຽນຮູ້ ແລະ ເຫັນໄດ້ບາງບົດຮຽນຂອງສາກົນໂດຍສະ ເພາະວຽກງານສະຫະກອນສິນເຊື່ອ ແລະ ເງິນຝາກປະຢັດໃນປະຊາຄົມ ອາຊຽນ  ເຊິ່ງມັນຈະສົ່ງຜົນດີໃຫ້ແກ່ພະນັກງານທີ່ປະຕິບັດໜ້າທີ່ກວດກາ, ການຕິດຕາມ ແລະ ການປະເມີນຜົນຂອງວຽກງານ.