# ວິເສດ ສະແຫວງສຶກສາ
ຫລາຍທ່ານອາດຮູ້ແລ້ວວ່າ ຄໍລຳ
“ເບິ່ງກວ້າງເຫັນໄກ” ນີ້ມີເປົ້າໝາຍນຳສະເໜີກ່ຽວກັບມາດຕະການທາງກົດໝາຍ, ລະບຽບການ ກໍຄືນະໂຍບາຍອັນຈຳເປັນທີ່ບ້ານເພິ່ນເມືອງທ່ານນຳໃຊ້ ເພື່ອຄຸ້ມຄອງລັດຄຸ້ມຄອງສັງຄົມ. ສຳລັບບົດປະຈຳວັນນີ້ຂໍສຸມໃສ່ບາງບັນຫາທີ່ເກີດຂຶ້ນໃນ ສ.ເກົາຫລີ ແລະ ເບິ່ງວ່າເພິ່ນແກ້ກັນແນວໃດ.
ບັນຫາທີໜຶ່ງແມ່ນເລື່ອງການຫລົບຫລີກພາສີ ຫລື
ການຜ່ອນສັ້ນຜ່ອນຍາວເລື່ອງພາສີດ້ວຍຮູບການຕີຄໍເຂົ້າກັນລະຫວ່າງພະນັກງານເກັບພາສີຂອງລັດກັບຄະນະນຳຂອງບັນດາບໍລິສັດເອກະຊົນ ເຊິ່ງເກີດຂຶ້ນໃນລັກສະນະຕ່ອງໂສ້ມາແຕ່ 3-4 ປີຢ້ອນຫລັງ ອັນເປັນເຫດໃຫ້ທາງການ ສ.ເກົາຫລີ ໂດຍສະເພາະແມ່ນໜ່ວຍງານບໍລິການພາສີແຫ່ງຊາດ (National
Tax Service) ຂຽນຫຍໍ້ວ່າ NTS ຕ້ອງໄດ້ອອກກົດລະບຽບຫ້າມພະນັກງານການນຳຂອງ NTS ຮ່ວມຮັບປະທານອາຫານ ແລະ ຫລິ້ນກິລາຕີກ໋ອບ
ຢ່າງເດັດຂາດກັບການນຳລະດັບຜູ້ຈັດການຂອງບໍລິສັດໃຫຍ່ໆຈຳນວນ 100 ບໍລິສັດ ທີ່ຖືກໝາຍຫົວໄວ້ວ່າມີພຶດຕິກຳຫລົບຫລີກການເສຍພາສີ. ສ່ວນພະນັກງານຂອງ NTS ທີ່ຕິດຂໍ້ຫ້າມນັ້ນແມ່ນນັບແຕ່ຂັ້ນຫົວໜ້າກົມ
ຫລື ຜູ້ອຳນວຍການຈົນຮອດປະທານ-ຮອງປະທານຂອງ NTS. ທາງການ ສ.ເກົາຫລີ ຖືວ່າການທີ່ພະນັກງານຂັ້ນສູງຂອງ NTS ຮ່ວມຮັບປະທານອາຫານ ຫລື
ຮ່ວມຫລິ້ນກິລາຕີກ໋ອບກັບບຸກຄົນການນຳຂອງບໍລິສັດສຳຄັນນັ້ນຈະກາຍເປັນຊ່ອງຫວ່າງແບບຊີ້ນໄປ-ປາມາ, ເຮັດໃຫ້ມີການຜ່ອນສັ້ນຜ່ອນຍາວ ຫລື ຕີຄໍເຂົ້າກັນແບບຜີບ້ານພ້ອມຜີປ່າ. ສ.ເກົາຫລີ ເປັນປະເທດອຸດສາຫະກຳທີ່ກ້າວໜ້າອັນດັບທີ
10 ຂອງໂລກ (ສະຖິຕິເມື່ອ 5 ປີຜ່ານມາ) ລາຍໄດ້ແຫ່ງລັດກາງຕໍ່ພາສີຈາກບໍລິສັດໃຫຍ່ໆ,
ແຕ່ໃນຊຸມປີຫລັງໆມານີ້ ສັງຄົມເລີ່ມເສື່ອມສັດທາຕໍ່ມາດຕະການຂອງ NTS ໃນການເກັບພາສີໃຫ້ໄດ້ຕາມລະດັບຄາດໝາຍ ເພາະມີຕົວຢ່າງ “ຜີບ້ານພ້ອມຜີປ່າ” ໃຫ້ເຫັນຫລາຍກໍລະນີ ອັນໄດ້ເຮັດໃຫ້ມີພິລຸດຜິດປົກກະຕິໃນການເກັບພາສີຈາກ 100 ບໍລິສັດໃຫຍ່ໆທີ່ເປັນເປົ້າໝາຍ. ໃນຕົ້ນເດືອນສິງຫາປີ
2013, ພະນັກງານຂັ້ນນຳຂອງ NTS 2 ຄົນຖືກຈັບໄດ້ໄລ່ທັນວ່າຮັບສິນບົນຈາກບໍລິສັດ CJ Croup. ທ່ານ
ຈູນກຸນຜິວ (Jeon
Goonpyo) ປະທານ NTS ຖືກຫາວ່າຮັບສິນບົນມູນຄ່າ 300.000 ໂດລາສະຫະລັດ ແລະ ໂມງລາຄາແພງຈາກບໍລິສັດ CJ Croup ເພື່ອແລກກັບການເອື້ອອຳນວຍໃຫ້ທາງບໍລິສັດເວລາມີການກວດສອບເລື່ອງການເສຍພາສີ.
ເລື່ອງທີສອງແມ່ນກ່ຽວກັບມາດຕະການເຫລັກທີ່ ສ.ເກົາຫລີ ພວມເອົາໃຈໃສ່ ກໍຄືການລົງໂທດບໍລິສັດ ຫລື ບຸກຄົນທີ່ລັກເຕັກໂນໂລຊີຂອງພາກສ່ວນເສດຖະກິດຂະໜາດນ້ອຍ ແລະ ຂະໜາດກາງ (SME) ເຊິ່ງ ສ.ເກົາຫລີ ໃຫ້ຄວາມສຳຄັນເປັນພິເສດ ໂດຍກຳນົດໂທດໄວ້ວ່າ ບຸກຄົນ ຫລື
ບໍລິສັດໃດກໍຕາມທີ່ລັກ ຫລື
ເປີດເຜີຍຂໍ້ມູນກ່ຽວກັບເຕັກໂນໂລຊີຂອງ SME ຈະຕ້ອງໄດ້ທົດແທນ 3 ທົບຂອງມູນຄ່າຄວາມເສຍຫາຍ. ເຫດຜົນທີ່ຕ້ອງມີມາດຕະການເຫລັກ ເພື່ອປ້ອງກັນການຮົ່ວໄຫລຂອງຂໍ້ມູນກ່ຽວກັບເຕັກໂນໂລຊີຂອງ SME ກໍເພາະວ່າ SME ໄດ້ຮັບຜົນກະທົບອັນໜັກໜ່ວງຈາກການລັກລອບ ແລະ ຮົ່ວໄຫລຂອງເຕັກໂນໂລຊີນັບແຕ່ປີ
2012 ເປັນຕົ້ນມາ. ນອກຈາກນັ້ນ ຍັງມີຫລັກຖານຊີ້ໃຫ້ເຫັນວ່າ ບາງປະເທດໄດ້ລັກເຕັກໂນໂລຊີ
SME ຂອງ ສ.ເກົາຫລີ ໄປນຳໃຊ້ການປັບໄໝສຳລັບການລັກເຕັກໂນໂລຊີ
SME ລະຫວ່າງປະເທດຈະເພີ່ມຈາກ 100 ລ້ານວອນ (87.000 ໂດລາສະຫະລັດ) ເປັນ 1 ຕື້ວອນ, ຖ້າເປັນການລັກລອບຢູ່ພາຍໃນປະເທດການປັບໄໝຈະເພີ່ມຈາກ 50 ລ້ານວອນ ເປັນ 500 ລ້ານວອນ (ເທົ່າກັບ 435.000 ໂດລາສະຫະລັດ).
No comments:
Post a Comment