ພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ ໄດ້ອອກແຈ້ງການໃນວັນທີ 19 ພຶດສະພານີ້ ເຖິງສະມາຄົມລົດຂົນສົ່ງ, ຜູ້ປະກອບການ, ບໍລິສັດດຳເນີນທຸລະກິດຂົນສົ່ງໃນນະຄອນ ຫລວງວຽງຈັນ ໂດຍສະເພາະລົດບັນທຸກທີ່ແລ່ນຕາມເສັ້ນທາງດິນແດງ, ທາງທຳມະຊາດໃຫ້ຫລຸດ ຜ່ອນນ້ຳໜັກລວມຂອງລົດທີ່ບັນທຸກລົງ 20% ໃນຊ່ວງໄລຍະລະດູຝົນ, ກໍຄືແຕ່ເດືອນມິຖຸນາ-ເດືອນພະຈິກ 2016 ເພື່ອເປັນການປົກປັກຮັກສາທາງໃຫ້ມີອາຍຸນຳໃຊ້ໄດ້ຍາວນານ ແລະ ຮັບປະກັນໃຫ້ທຽວໄດ້ສອງລະດູ ທັງເປັນການປະຢັດງົບປະມານລັດໃນການກໍ່ສ້າງສ້ອມແປງເສັ້ນທາງອີກດ້ວຍ. ຖ້າລົດບັນທຸກຄັນໃດຫາກລະເມີດແຈ້ງການນີ້ ເມື່ອເຈົ້າໜ້າທີ່ກວດພົບຈະຖືກຄ່ຽນຖ່າຍວັດຖຸທີ່ນ້ຳໜັກເກີນອອກ ແລະ ປັບໄໝຕາມລະບຽບການ ໂດຍມອບໃຫ້ໜ່ວຍງານຄຸ້ມຄອງລົດບັນທຸກໜັກຂອງພາກ ສ່ວນກ່ຽວຂ້ອງເອົາໃຈໃສ່ຕິດຕາມກວດກາຢ່າງເຂັ້ມງວດ.
ທ່ານຫົວໜ້າພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນ ໃຫ້ຮູ້ວ່າ: ສາເຫດຕົ້ນຕໍທີ່ພາໃຫ້ເສັ້ນທາງເກີດການເປ່ເພຫລາຍໃນແຕ່ລະປີຜ່ານມາແມ່ນຍ້ອນໃນຊ່ວງລະດູຝົນຈະເຮັດໃຫ້ຫລາຍເສັ້ນທາງດິນແດງ, ທາງທຳມະຊາດມັກມີນ້ຳອັ່ງຂັງ
ແລະ ເມື່ອລົດບັນທຸກໜັກຜ່ານໄປມາຫລາຍກໍຈະເຮັດໃຫ້ເສັ້ນທາງເປ່ເພໄດ້ງ່າຍ ແລະ ສ້າງຄວາມຫຍຸ້ງຍາກລຳບາກຕໍ່ການສັນຈອນຂອງສັງຄົມ. ສະນັ້ນ ຈຶ່ງຂໍໃຫ້ບັນດາຜູ້ປະກອບການຂົນສົ່ງຈົ່ງພ້ອມກັນປະຕິບັດຕາມແຈ້ງການດັ່ງກ່າວຢ່າງເຂັ້ມງວດດ້ວຍ.
No comments:
Post a Comment