ລາວຫາລືວາງແຜນຜະລິດກະສິກຳອິນຊີ

          ກອງປະຊຸມປຶກສາຫາລືກ່ຽວກັບການຜະລິດກະສິກຳອິນຊີຄັ້ງທີ 5 ປະຈຳປີ 2016 ໄດ້ຈັດຂຶ້ນໃນວັນທີ 15 ມິຖຸນານີ້, ທີ່ນະຄອນ ຫຼວງວຽງຈັນ, ໂດຍກົງປູກຝັ່ງກະຊວງກະສິກຳ ແລະ ປ່າໄມ້, ພາຍໃຕ້ຫົວຂໍ້ ” ການສ້າງຄວາມຍືນຍົງໃຫ້ການຜະລິດກະສິກຳອິນຊີຢູ່ ສປປລາວ ” ຊຶ່ງມີ ທ່ານ ດຣ ບຸນຂວາງ ຄຳບຸນເຮືອງ ຮອງລັດຖະມົນຕີກະຊວງດັ່ງກ່າວ, ພ້ອມດ້ວຍຜູ້ປະກອບການຜະລິດເຂົ້າຮ່ວມເປັນຈຳນວນຫຼາຍ.

          ທ່ານ ຮອງລັດຖະມົນຕີກ່າວວ່າ: ໂດຍປະຕິບັດຕາມທິດກະສິກຳສະອາດທີ່ພັກ - ລັດຖະບານເຮົາວາງອອກ, ໂດຍສະເພາະແມ່ນການສະໜັບສະໜູນການຜະລິດກະສິກຳອິນຊີ ຊຶ່ງແມ່ນໜຶ່ງໃນເປົ້າໝາຍຂອງກະສິກຳສະອາດ, ຊຶ່ງປະເທດເຮົາມີຂໍ້ໄດ້ປຽບຫຼາຍດ້ານໃນການຜະລິດດັ່ງກ່າວ, ເປັນຕົ້ນແມ່ນທ່າແຮງທາງທຳມະຊາດເຊັ່ນ: ດິນ, ນ້ຳ ແລະ ສະພາບແວດລ້ອມທີ່ຍັງສະອາດ ແລະ ບໍລິສຸດ, ແຕ່ສິ່ງທ້າທາຍ

ທີ່ພວກເຮົາຈະຕ້ອງເອົາໃຈໃສ່ຮັກສາສິ່ງທີ່ມີຢູ່ໃຫ້ມີຄວາມຍືນຍົງ, , ໃນຂະນະທີ່ພື້ນ ຖານວັດຖຸ-ເຕັກນິກການຜະລິດຂອງປະເທດເຮົາພັດຍັງອ່ອນນ້ອຍ, ການຜະລິດກະແຈກກະຈາຍບໍ່ສາມາດແຂ່ງຂັນທາງດ້ານປະລິມານ ແລະ ຄຸນະພາບເຮັດໃຫ້ການຜະລິດເປັນສິນຄ້າຂອງປະເທດເຮົາປະເຊີນໜ້າກັບອຸປະສັກ ແລະ ສິ່ງທ້າທາຍຫຼາຍຢ່າງ ແລະ ເພື່ອແກ້ໄຂບັນຫາດັ່ງກ່າວນັ້ນມັນຮຽກ ຮ້ອງໃຫ້ປະເທດເຮົາຕ້ອງສຸມໃສ່ປັບປຸງໂຄງຮ່າງພື້ນຖານ, ລະບຽບຄຸ້ມຄອງ,ໂດຍສະ ເພາະແມ່ນມາດ ຕະຖານການຜະລິດໄປຄຽງຄູ່ກັບການສ້າງບຸກຄະລາກອນເພື່ອມາປັບປຸງຄຸນນະພາບການຜະລິດໃຫ້ໄດ້ມາດຕະຖານ, ມີຄວາມປອດໄພ ແລະ ມີລາຄາທີ່ສາມາດແຂ່ງຂັນໄດ້ ເຖິງວ່າຜ່ານມາພວກເຮົາໄດ້ລິເລີ່ມສົ່ງເສີມການຜະລິດກະສິກຳສະອາດໃນຫຼາຍດ້ານ, ເປັນຕົ້ນແມ່ນດ້ານນິຕິກຳ ແລະ ເຕັກນິກຕ່າງໆລົງສູ່ປະຊາຊົນ, ແຕ່ການພັດທະນາ ແລະ ສົ່ງເສີມຍັງຢູ່ໃນຂອບເຂດຈຳກັດ, ເນື່ອງຈາກວ່າພວກເຮົາຍັງບໍ່ທັນມີແຜນການເປົ້າໝາຍສູ້ຊົນລະອຽດວ່າ: ຈະຜະລິດກະສິກຳສະອາດຕາມມາດຕະ ຖານໃດ, ໃຫ້ໄດ້ຫຼາຍປານໃດ, ຢູ່ເຂດໃດ, ເມືອງໃດ, ແຂວງໃດ ແລະ ຕ້ອງໃຫ້ເຂົ້າໃຈວ່າການຜະລິດກະສິກຳນັ້ນບໍ່ແມ່ນພາກລັດຈະໄປເຮັດໂດຍກົງ, ຊຶ່ງຜູ້ທີ່ຂັບເຄື່ອນການຜະລິດໂດຍກົງກໍແມ່ນກະສິ ກອນ ແລະ ຜູ້ປະກອບການຕ່າງໆ, ຊຶ່ງພາກລັດຈະເປັນຜູ້ອຳນວຍຄວາມສະດວກ, ໃຫ້ຄຳປຶກສາດ້ານເຕັກນິກ ແລະ ຄຸ້ມຄອງດ້ານລະບຽບການ, ດັ່ງນັ້ນກອງປະຊຸມຄັ້ງນີ້ຈຶ່ງເປັນການລວມຕົວຄັ້ງສຳຄັນໃນການເຕົ້າໂຮມກ້ອນກຳລັງຂອງຂະແໜງການຜະລິດກະສິກຳອິນຊີ ແລະ ເຊື້ອໜັ້ນວ່າພວກເຮົາຈະສາມາດຊອກຫາຊ່ອງທາງ ແລະ ວິທີການທີ່ດີໃນການນຳເອົານະໂຍບາຍກໍຄືແນວທາງການຜະລິດກະສິກຳສະອາດມາຈັດຕັ້ງປະຕິບັດໃຫ້ປະກົດຜົນເປັນຈິງ.

          ທ່ານຮອງລັດຖະມົນຕີໃຫ້ຮູ້ວ່າ: ປັດຈຸບັນຄວາມຕ້ອງການຄຸນນະພາບ, ຄວາມປອດໄພ ແລະ ການຜະລິດທີ່ເປັນມິດກັບສິ່ງແວດລ້ອມຂອງຜູ້ບໍລິໂພກທັງພາຍໃນ ແລະ ຕ່າງປະເທດ. ມີນັບມື້ສູງຂຶ້ນ,ດັ່ງັ້ນມັນມີຄວາມຈຳເປັນສຳລັບປະເທດເຮົາທີ່ຈະຕ້ອງໄດ້ພັດທະນາລະບຽບແລະ ຫຼັກການການຜະລິດກະສິກຳໃຫ້ເຂົ້າສູ່ລະບົບມາດຕະຖານ, ເພື່ອຮອງຮັບກັບທ່າອ່ຽງຂອງສັງຄົມ ແລະ ສາມາດເຊື່ອມໂຍງເຂົ້າກັບສາກົນ ແລະ ພາກພື້ນ, ພ້ອມດຽວກັນນັ້ນກໍຂະຫຍາຍຖານການຜະລິດ, ໂດຍສະເພາະແມ່ນການຜະລິດກະສິກຳສະອາດລົງສູ່ທ້ອງຖິ່ນໃຫ້ກ້ວາງຂວາງຫຼາຍຂຶ້ນ.