ລັດຖະມົນຕີກະຊວງອຸດສະຫະກໍາ ແລະ ການຄ້າອອກຄໍາສັ່ງໃຫ້ໜ່ວຍງານຂອງຕົນປະຕິບັດແຈ້ງການເລກທີ 15 ຂອງນາຍົກຢ່າງເຂັ້ມງວດ

     ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ອອກຄຳສັ່ງແນະນຳເຖິງບັນດາພະແນກອຸດສາຫະກຳ ແລະ ການຄ້າແຂວງ, ນະຄອນຫລວງ ເອົາໃຈໃສ່ຜັນຂະຫຍາຍແຈ້ງການເລກທີ 15/ນຍ ຂອງນາຍົກລັດຖະມົນຕີ ແຫ່ງ ສປປ ລາວ ວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້, ເຄື່ອນຍ້າຍໄມ້ ແລະ ທຸລະກິດໄມ້ ເພື່ອເພີ່ມທະວີຄວາມຮັບຜິດ ຊອບ ແລະ ຮັບປະກັນຄວາມເປັນເອກະພາບໃນການຈັດຕັ້ງຜັນຂະຫຍາຍແຈ້ງການດັ່ງກ່າວມີຜົນສັກສິດ ແລະ ປາກົດຜົນເປັນຈິງ ຄືຮີບຮ້ອນຈັດຕັ້ງການເຜີຍແຜ່, ເຊື່ອມຊຶມແຈ້ງການສະບັບດັ່ງກ່າວໃຫ້ແກ່ພະນັກງານ, ບັນດາຫົວໜ່ວຍທຸລະກິດໃຫ້ກຳແໜ້ນ, ເຂົ້າໃຈເລິກເຊິ່ງ ແລະ ເປັນເອກະພາບກັນ ແລະ ພ້ອມກັນປະຕິບັດໃຫ້ໄດ້ຮັບຜົນດີ, ເພີ່ມທະວີຄວາມເອົາໃຈໃສ່ໃນການປະຕິບັດໜ້າທີ່ຕາມພາລະບົດບາດ ແລະ ຄວາມຮັບຜິດຊອບຂອງຕົນໃຫ້ຖືກຕ້ອງສອດຄ່ອງຕາມລະບຽບກົດໝາຍ ແລະ ນິຕິກຳຕ່າງໆທີ່ກ່ຽວຂ້ອງໃນການຄຸ້ມຄອງ

ການເຄື່ອນຍ້າຍໄມ້ ແລະ ທຸລະກິດໄມ້. ພ້ອມນີ້ກໍຕ້ອງອຳນວຍຄວາມສະດວກໃຫ້ຄວາມຮ່ວມມືກັບບັນດາຂະແໜງການກ່ຽວຂ້ອງເປັນເຈົ້າການຕິດຕາມ, ກວດກາການຈັດຕັ້ງປະຕິບັດແຈ້ງການດັ່ງກ່າວຢ່າງເຂັ້ມງວດ, ຖ້າພົບເຫັນກໍລະນີທີ່ມີການລະເມີດຝ່າຝືນແມ່ນໃຫ້ດຳເນີນຄະດີຕາມລະບຽບກົດໝາຍຢ່າງເຄັ່ງຄັດ, ໃຫ້ທຸກພະແນກອຸດສາຫະກຳ ແລະ ການຄ້າແຂວງ, ນະຄອນຫລວງຢຸດເຊົາການອອກໃບອະນຸຍາດສົ່ງອອກໄມ້ທຸກປະເພດ ແລະ ເຄື່ອງປ່າຂອງດົງ ລວມທັງໄມ້ຜ່ານ ສປປ ລາວ ໄປຕ່າງປະເທດໃນທຸກກໍລະນີ, ອັນຮີບດ່ວນແມ່ນໃຫ້ສຸມໃສ່ແກ້ໄຂບັນດາໂຮງງານທີ່ຢູ່ໃນເຂດປ່າສະຫງວນແຫ່ງຊາດ, ປ່າປ້ອງກັນ ແລະ ປ່າຜະລິດ ຖ້າພົບກໍລະນີລະເມີດ ຫລື ສ້າງຕັ້ງໂຮງງານບໍ່ຖືກຕ້ອງຕາມກົດໝາຍແມ່ນໃຫ້ປະສານສົມທົບກັບພາກສ່ວນກ່ຽວ ຂ້ອງຢຸດຕິ, ຍຸບເລີກ, ຢຶດໄວ້ເປັນຂອງລັດ ແລະ ດຳເນີນການຕາມລະບຽບກົດໝາຍຢ່າງເຂັ້ມງວດ. ສຳລັບການປະມູນຂາຍໄມ້ແມ່ນໃຫ້ພະແນກອຸດສາຫະກຳ ແລະ ການຄ້າແຂວງ, ນະຄອນຫລວງວຽງຈັນເປັນເຈົ້າການປະສານສົມທົບກັບພາກສ່ວນກ່ຽວຂ້ອງຈັດຕັ້ງການປະມູນຂາຍແບບເປີດກວ້າງ ໂດຍໃຫ້ບູລິມະສິດແກ່ບັນດາໂຮງງານປຸງແຕ່ງໄມ້ທີ່ເປັນສະມາຊິກຂອງສະມາຄົມປຸງແຕ່ງໄມ້ແຫ່ງຊາດ ແລະ ສະມາຄົມເຟີນີເຈີລາວ, ພ້ອມທັງລາຍງານຜົນການຜັນຂະຫຍາຍ ແລະ ຈັດຕັ້ງປະຕິບັດແຈ້ງການເລກທີ 15/ນຍ ແລະ ຄຳສັ່ງແນະນຳສະບັບນີ້ໃຫ້ກະຊວງອຸດສາຫະກຳ ແລະ ການຄ້າຊາບ ເພື່ອຊີ້ນຳແກ້ໄຂບັນຫາໃຫ້ທັນການ.