ຄະນະຊີ້ນຳວຽກງານສຳຫລວດ ແລະ ຂຸດຄົ້ນສິ່ງເສດເຫລືອທະຫານອາເມລິກາ ລົງຕິດຕາມເບິ່ງການປະຕິບັດງານຢູ່ສອງແຂວງພາກເໜືອ

          ໃນວັນທີ 10-12 ມິຖຸນາ ນີ້, ຄະນະຊີ້ນຳຝ່າຍລາວຮັບຜິດຊອບວຽກງານການສຳຫລວດ ແລະ ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫລືອຂອງທະຫານອາເມລິກາ ທີ່ຫາຍສາບສູນໃນປາງສົງ ຄາມຢູ່ລາວ (MIA), ກະຊວງການຕ່າງປະເທດ ແລະ ກະຊວງປ້ອງກັນປະເທດ ນຳໂດຍທ່ານ ແສງເພັດ ຮຸ່ງບຸນຍວງ ຮອງລັດຖະມົນ ຕີກະຊວງການຕ່າງປະເທດ, ໄດ້ເດີນທາງໄປຢ້ຽມຢາມການປະຕິບັດງານຮ່ວມ ລາວ-ອາເມລິກາ ຢູ່ພາກສະໜາມ, ເຊິ່ງຢູ່ໃນໄລຍະການສຳຫລວດ ແລະ ຂຸດຄົ້ນໃນຄັ້ງທີ 4 ປະຈຳສົກປີ 2015-2016 ຢູ່ ແຂວງຊຽງຂວາງ ແລະ ແຂວງຫົວພັນ, ໂດຍສະເພາະ        ຢູ່ຈຸດກໍລະນີ 1541 ຢູ່ເຂດບ້ານນາກູດ, ເມືອງ

ຫ້ຽມ, ແຂວງຫົວ ພັນ ແລະ ຢູ່ເມືອງຄຳ ແຂວງຊຽງຂວາງ, ໂດຍໄດ້ມີການພົບປະ ແລະ ໂອ້ລົມກັບບັນດາພະນັກງານວິຊາການ ປະຈຳພາກສະໜາມກະຊວງການຕ່າງປະເທດ, ກະຊວງປ້ອງກັນປະເທດ ແລະ ອຳນາດການປົກຄອງທ້ອງຖິ່ນ ເພື່ອເປັນການກະຕຸກຊຸກຍູ້ໃຫ້ກຳລັງໃຈໃຫ້ແກ່ອ້າຍນ້ອງທີ່ກຳລັງປະຕິບັດໜ້າທີ່, ທັງເປັນການສະແດງໃຫ້ເຫັນຄວາມຈິງໃຈ ຂອງລັດຖະບານແຫ່ງ ສປປ ລາວ ທີ່ມີຕໍ່ວຽກງານການສຳຫລວດ, ຂຸດຄົ້ນເພື່ອຊອກຫາຮ່ອງຮອຍ ແລະ ສິ່ງເສດເຫລືອຂອງທະ ຫານອາເມລິກາ ທີ່ຫາຍສາບສູນໃນປາງສົງຄາມຢູ່ລາວ (MIA).

          ການຮ່ວມມືສອງຝ່າຍລາວ-ອາເມລິກາ ຕະຫລອດໄລຍະເວລາ 30 ກວ່າປີ ຂອງການດຳເນີນວຽກງານດັ່ງກ່າວ, ໄດ້ຮັບຜົນສຳເລັດຫລາຍກວ່າ 50% ຂອງຈຳນວນຜູ້ຫາຍສາບສູນທັງໝົດ 573 ຄົນ ແລະ ໄດ້ຄົ້ນພົບຊິ້ນສ່ວນທີ່ໄດ້ຮັບການຢັ້ງຢືນໄປແລ້ວຈຳນວນ 271 ຄົນ ໂດຍ ຍອດຜູ້ຫາຍສາບສູນຂອງທະຫານອາເມລິກາຢູ່ ສປປ ລາວ ຍັງເຫລືອຈຳນວນ 302 ຄົນ. ລັດຖະບານລາວ ຢືນຢັນວ່າຈະສືບຕໍ່ໃຫ້ການຮ່ວມມືໃນວຽກງານດັ່ງກ່າວ ຕາມຄວາມອາດສາມາດຕົວຈິງເພື່ອນຳເອົາສິ່ງເສດເຫລືອຂອງທະຫານອາເມລິກາ ທີ່ຫາຍສາບສູນໃນປາງສົງຄາມຢູ່ລາວ ສົ່ງຄືນໃຫ້ຄອບຄົວຂອງເຂົາເຈົ້າ.

          ເວົ້າລວມແລ້ວ, ການຮ່ວມມືໃນດ້ານນີ້ ໄດ້ຮັບຜົນສຳເລັດອັນດີເປັນກ້າວໆມາກໍ່ຍ້ອນຄວາມເອົາໃຈໃສ່ຢ່າງຈິງໃຈຂອງລັດຖະບານ ແລະ ເຈົ້າໜ້າທີ່ຂອງລາວທຸກໆຂັ້ນ ແຕ່ສູນກາງຫາທ້ອງຖິ່ນ ແລະການຮ່ວມມືອັນດີຂອງພໍ່ແມ່ປະຊາຊົນບັນດາເຜົ່າ, ສິ່ງເຫລົ່ານີ້ໄດ້ສະແດງໃຫ້ເຫັນເຖິງນະໂຍບາຍມະນຸດ ສະທຳອັນສະເໝີຕົ້ນສະເໝີປາຍ ຂອງລັດຖະບານແຫ່ງສາທາລະນະລັດ ປະຊາທິປະໄຕປະຊາ ຊົນລາວທີ່ມີຕໍ່ປະຊາຊົນອາເມລິກາ, ໂດຍສະເພາະຕໍ່ຄອບຄົວຍາດພີ່ນ້ອງ ຂອງຜູ້ທີ່ຫາຍສາບສູນໃນປາງສົງຄາມ.