ເປີດໂຕທະນາຄານໄຊງ່ອນເທື່ອງຕິ່ນລາວສາຂາຈຳປາສັກ

     ພິທີເປີດໂຕທະນາຄານໄຊງ່ອນເທື່ອງຕິ່ນລາວຈຳກັດສາຂາແຂວງຈຳປາສັກ (ທະນາຄານຊາຄອມແບັງລາວ) ໄດ້ຈັດຂຶ້ນຢ່າງເປັນທາງການໃນວັນທີ 10 ມິຖຸນາ 2016 ນີ້ ທີ່ຕະຫລາດໃໝ່ປາກເຊ ໂດຍການໃຫ້ກຽດເຂົ້າຮ່ວມຕັດຖຽບຜ້າຂອງທ່ານ ບຸນຖອງ ດີວິໄຊ ກຳມະການສູນກາງພັກ, ເລ ຂາພັກແຂວງ, ເຈົ້າແຂວງຈຳປາສັກ, ທ່ານ ຫງຽນຫງ໋ອກຕວນ ຮອງປະທານສະພາບໍລິຫານທະນາ ຄານຊອມແຄມແບັງລາວ, ທ່ານ ຟ້າມກວາງຝູ ອຳນວຍການໃຫຍ່ທະນາຄານຊາຄອມແບັງລາວ, ທ່ານກົງສຸນໃຫຍ່ຫວຽດນາມປະຈຳພາກໃຕ້ລາວ, ທ່ານເຈົ້າເມືອງປາກເຊ, ຫົວໜ້າທະນາຄານ ສປປ ລາວ ພາກໃຕ້, ທະນາຄານທຸລະກິດ, ຂະແໜງການທີ່ກ່ຽວຂ້ອງທັງພາກລັດ ແລະ ເອກະຊົນເຂົ້າຮ່ວມເປັນຈຳນວນຫລາຍ.

     ທ່ານ ຟ້າມກວາງຝູ ລາຍງານວ່າ: ທະນາຄານຊາຄອມແບັງ ໄດ້ເລີ່ມເຄື່ອນໄຫວທຸລະກິດຢູ່ ສປປ ລາວ ແຕ່ປີ 2008, ປັດຈຸບັນມີເຄືອຂ່າຍການດຳເນີນທຸລະກິດ 1 ສຳນັກງານໃຫຍ່, 2 ສາຂາ ແລະ 1 ໜ່ວຍບໍລິການ ເຊິ່ງຕັ້ງຢູ່ຈຸດສຳຄັນຂອງ ສປປ ລາວ ເຊັ່ນ: ນະຄອນຫລວງ ແລະ ແຂວງຈຳປາສັກ. ໄດ້ກາຍເປັນສ່ວນໜຶ່ງໃນການປະກອບສ່ວນພັດທະນາເສດຖະກິດຂອງ ສປປ ລາວ ໂດຍຜ່ານການສະໜອງການບໍລິການດ້ານການເງິນ-ການທະນາຄານທີ່ທັນສະໄໝ ແລະ ຫລາກຫລາຍໃຫ້ແກ່ລູກຄ້າທີ່ເປັນວິສາຫະກິດ ແລະ ບຸກຄົນຢູ່ໃນທ້ອງຖິ່ນ, ພ້ອມທັງບັນດາວິສາຫະກິດຫວຽດນາມທີ່ມາລົງທຶນຢູ່ ສປປ ລາວ. ນອກນັ້ນ ຍັງເປັນການສົ່ງເສີມສາຍພົວພັນທາງດ້ານການຄ້າລະຫວ່າງສອງປະເທດ ລາວ-ຫວຽດນາມ ໃຫ້ນັບມື້ເຕີບໃຫຍ່ຂະຫຍາຍຕົວ. ປັດຈຸບັນທະນາຄານໄຊງ່ອນເທື່ອງຕິ່ນລາວຈຳກັດມີຍອດຊັບສິນ 121,6 ລ້ານໂດລາສະຫະລັດ ແລະ ມີຫລາຍກວ່າ 3.100 ລູກຄ້າ.

     ທະນາຄານໄຊງ່ອນເທື່ອງຕິ່ນລາວຈຳກັດສາຂາຈຳປາສັກ ມີສຳນັກງານຕັ້ງຢູ່ຕະຫລາດໃໝ່ປາກເຊ (ຕະຫລາດດາວເຮືອງ) ແຄມເສັ້ນທາງສະລາຂຽວດົງຈອງ ຂຶ້ນກັບບ້ານໂພນກຸງ ເມືອງປາກເຊ ແຂວງຈຳປາສັກ, ເປັນທະນາຄານໜຶ່ງທີ່ສະໜອງທຸກຜະລິດຕະພັນ-ການບໍລິການທະນາຄານເຊັ່ນ: ເງິນຝາກ, ສິນເຊື່ອ (ເງິນກູ້ເພື່ອດຳເນີນທຸລະກິດ, ກູ້ເພື່ອຊົມໃຊ້, ກູ້ຊື້ລົດ, ກູ້ສຳລັບທຸລະກິດຂະໜາດນ້ອຍ ແລະ ກາງ), ໂອນເງິນດ່ວນພາຍໃນ 1 ຊົ່ວໂມງລະຫວ່າງ 3 ປະເທດ ລາວ-ຫວຽດນາມ-ກຳປູເຈຍ ກັບຄ່າທຳນຽມທີ່ຖືກ, ຊຳລະສະສາງສາກົນ, ການຄ້ຳປະກັນ ແລະ ອື່ນໆ.

     ໃນໂອກາດເປີດໂຕສາຂາທະນາຄານໄຊງ່ອນເທື່ອງຕິ່ນ, ທະນາຄານຍັງໄດ້ມອບເງິນຈຳນວນ 80 ລ້ານກີບ ເພື່ອປະກອບສ່ວນແກ່ກອງທຶນຊ່ວຍເຫລືອຜູ້ດ້ອຍໂອກາດ ແລະ ປະຊາຊົນຜູ້ທຸກຍາກຂອງແຂວງຈຳປາສັກ ແລະ ອຸດໜູນສະມາຄົມຫວຽດນາມຢູ່ເມືອງປາກເຊ ເພື່ອຊ່ວຍປະຊາຊົນຜູ້ຖືກເຄາະຮ້າຍຈາກເຫດການໄຟໄໝ້ຕະຫລາດເມື່ອກາງເດືອນພຶດສະພາຜ່ານມານີ້ ເພື່ອຫລຸດຜ່ອນບັນເທົາທຸກ. ນອກຈາກນີ້ ຍັງໄດ້ຈັດການແລ່ນມາລາທອນໃນຫົວຂໍ້ “ເພື່ອສຸຂະພາບກັບທະນາຄານໄຊງ່ອນເທື່ອງຕິ່ນລາວ” ໂດຍມີຜູ້ເຂົ້າຮ່ວມເຖິງ 300 ຄົນ.