ແອເອເຊຍ ໄດ້ຮັບລາງວັນສາຍການບິນລາຄາປະຢັດທີ່ສຸດໃນໂລກ 8 ປີຊ້ອນ

ໃນວັນທີ 12 ກໍລະກົດ 2016 ແອເອເຊຍ ໄດ້ຮັບໂຫວດຈັດອັນດັບ ຈາກສະກາຍ ແທຣກ ໃຫ້ເປັນສາຍການບິນລາຄາປະຢັດທີ່ດີທີ່ສຸດຂອງໂລກ ເປັນສະໄໝທີ 8 ຕິດຕໍ່ກັນ (2009-2016) ຢູ່ປະເທດອັງກິດ ພ້ອມທັງໄດ້ຮັບລາງວັນສາຍການບິນທີ່ດີທີ່ສຸດໃນອາຊີ ສ່ວນແອເອເຊຍ ເອັກ ສາຍການບິນໄລຍະໄກ ໄດ້ຮັບລາງວັນຊັ້ນໂດຍສານດີເດັ່ນທີ່ສຸດ ແລະ ບ່ອນ ນັ່ງຊັ້ນດີເດັ່ນທີ່ສຸດ ກຸ່ມການບິນປະຢັດ ເປັນປີທີ 4.

ລາງວັນຈາກການຈັດອັນດັບຂອງສະກາຍແທຣກ ຄືກັບລາງວັນອອສກາສໍາລັບກຸ່ມອຸດສາຫະກໍາການ ບິນ ເນື່ອງຈາກຊີ້ໃຫ້ເຫັນເຖິງປະສິດທິພາບ ແລະ ຄວາມໂດດເດັ່ນທາງການບິນ ຜ່ານແບບສອບຖາມ ຈາກຄົນທົ່ວໂລກຫຼາຍກວ່າ 19 ລ້ານຄົນ ຢູ່ 104 ປະເທດ ໂດຍນໍາໃຊ້ 41 ຕົວຊີ້ວັດ ຄວບ ຄຸມທາງດ້ານການບິນ ແລະ ຜະລິດຕະພັນຕ່າງໆ ຂອງສາຍການບິນ.

ແອເອເຊຍ ເປັນໜຶ່ງໃນສາຍການບິນທີ່ບໍລິການດ້ວຍເຮືອບິນແອບັດ A320 ທີ່ໃຫຍ່ທີ່ສຸດ ໂດຍມີອາຍຸການນໍາໃຊ້ວຽກສະເລ່ຍພຽງ 3 ປີ ແລະ ຍັງໄດ້ສັ່ງຊື້ເຮືອບິນແອບັດ A320 neo ຫຼາຍກວ່າ 300 ລໍາ ພາຍໃນປີ 2028 ນອກຈາກເຮືອບິນທີ່ທັນສະໄໝແລ້ວ ແອເອເຊຍຍັງຂະຫຍາຍເຄືອຂ່າຍເສັ້ນທາງການບິນຫຼາຍກວ່າ 100 ເສັ້ນທາງ ທົ່ວອາຊີ ປາຊີຟິກ ລວມທັງເສັ້ນທາງທີ່ສໍາຄັນໃນອາ ຊຽນ ແລະ ອື່ນໆ ເຊິ່ງປັດຈຸບັນແອເອເຊຍໄດ້ກາຍເປັນຜູ້ນໍາໃນກຸ່ມສາຍການບິນລາຄາປະຢັດຂອງອາຊີ, ມີເຄືອຂ່າຍການບໍລິການ 100 ຈຸດໝາຍປາຍທາງ. ໃນໄລຍະ 15 ປີຜ່ານມາ ແອເອເຊຍໃຫ້ບໍລິການຂົນສົ່ງຜູ້ໂດຍສານໄປແລ້ວຫຼາຍກວ່າ 330 ລ້ານຄົນ.