ລາວເຜີຍແຜ່ບົດລາຍງານຄ່າໃຊ້ຈ່າຍທີ່ຈໍາເປັນໃນການຊ່ວຍເຫລືອແມ່ຍິງຈາກຄວາມຮຸນແຮງ

          ວັນທີ 30 ມິຖຸນານີ້ທີ່ຫໍປະຊຸມແຫ່ງຊາດ, ຄະນະກໍາມາທິການເພື່ອຄວາມກ້າວໜ້າຂອງແມ່ຍິງແຫ່ງຊາດ (ຄກມຊ) ໄດ້ຈັດກອງປະຊຸມເຜີຍແຜ່ບົດລາຍງານການສຶກສາ ຄາດຄະເນຄ່າໃຊ້ຈ່າຍ ທີ່ຈໍາເປັນຂອງຫລາຍພາກສ່ວນ ສໍາລັບໃຫ້ບໍລິການຊ່ວຍເຫລືອແມ່ຍິງຜູ້ຖືກເຄາະຮ້າຍ ຈາກຄວາມຮຸນແຮງໃນລາວ ໂດຍການເປັນປະທານຂອງທ່ານນາງ ບັນດິດ ປະທຸມວັນ ຮັກສາການປະທານ ຄກມຊ ຮອງປະທານສູນກາງສະຫະພັນແມ່ຍິງລາວ ແລະ ທ່ານນາງ ແອນນາ ກາຣິນເຈັດເຕີ ຮອງຫົວໜ້າອົງ ການ UN Women ປະຈໍາຂົງເຂດອາຊີ-ປາຊີຟິກ, ມີຕາງໜ້າຈາກບັນດາກະຊວງ, ອົງການກ່ຽວຂ້ອງເຂົ້າຮ່ວມເປັນຈຳນວນຫລາຍ.

          ເພື່ອອະທິບາຍ ແລະ ປັບປຸງໂຄງປະກອບທີ່ສໍາຄັນຂອງຊຸດບໍລິການ ທີ່ຈໍາເປັນຂອງຫລາຍພາກສ່ວນ, ສ້າງຄວາມຮັບຮູ້ເຂົ້າໃຈໃນຄວາມຕ້ອງການຊັບພະຍາກອນສໍາລັບການບໍລິການທີ່ມີຢູ່ ແລະ ຄາດຄະເນຄວາມຕ້ອງການຊັບພະຍາກອນ ຊຸດບໍລິການອັນຈໍາເປັນພື້ນຖານທີ່ຈະນໍາໃຊ້ປະກອບ ມີ: ສາຍດ່ວນແຫ່ງຊາດໃຫ້ຄໍາປຶກສາຕະຫລອດ 24 ຊົ່ວໂມງ, ສູນກາງບໍລິການຊ່ວຍເຫລືອຢູ່ຈຸດດຽວ, ບ້ານພັກສຸກເສີນ, ໂຄງການໃຫ້ຄໍາປຶກສາໃນໂຮງໝໍ, ສຸກສາລາໃນເຂດຊົນນະບົດ, ໂຮງຮຽນ ແລະ ສະຖານທີ່ເຮັດວຽກ, ການບໍລິການບັງຄັບໃຊ້ກົດໝາຍ ແລະ ລະບົບຍຸຕິທໍາ ທີ່ພະນັກງານໄດ້ຮັບການຝຶກອົບຮົມປະຈໍາຢູ່ຫ້ອງການຕໍາຫລວດ, ສານສະເພາະສໍາລັບຄວາມຮຸນແຮງຕໍ່ແມ່ຍິງ, ໜ່ວຍໄກ່ເກ່ຍຂັ້ນບ້ານ, ເຄືອຂ່າຍສົ່ງຕໍ່ແມ່ຍິງ ທີ່ຖືກເຄາະຮ້າຍຈາກຄວາມຮຸນແຮງ ແລະ ການສ້າງຄວາມອາດສາມາດ ໃຫ້ຄູ່ຮ່ວມງານໃນວຽກງານອື່ນໆທີ່ກ່ຽວຂ້ອງ, ສໍາລັບໄລຍະ 3 ປີ ນັບແຕ່ປີ 2015-2017ແມ່ນຈະໄດ້ນໍາໃຊ້ເງິນຈຳນວນ 13,5 ລ້ານໂດລາສະຫະລັດ ຫລື ເທົ່າກັບ 0,25% ຂອງລວມຍອດຜະລິດຕະພັນພາຍໃນ GDP ຂອງລາວ ໃນປີ 2014, ຄ່າໃຊ້ຈ່າຍເຫລົ່ານີ້ປະກອບມີໃຊ້ຈ່າຍເບື້ອງຕົ້ນ, ການບໍລິຫານດໍາເນີນງານ, ສ້າງບ້ານພັກສຸກເສີນຂອບເຂດທົ່ວປະເທດ, ການເພີ່ມບໍລິການໃຫ້ຄໍາປຶກສາໃນໂຮງໝໍ, ສຸກສາລາໃນເຂດຊົນນະບົດ ແລະ ອື່ນໆ.