ປະທານາທິບໍດີ ສ.ເກົາຫລີ ຢ້ຽມຢາມ ສປປ ລາວ ຢ່າງເປັນທາງການ

  ຕອບ​ສະໜອງ​ຕາມ​ຄຳ​ເຊີນ​ຂອງ​ທ່ານ ບຸນຍັງ ວໍລະຈິດ ປະທານປະເທດ ​ແຫ່ງ ສາທາລະ ນະ​ລັດ ປະຊາທິປະ​ໄຕ ປະຊາຊົນ​ລາວ, ທ່ານນາງ ປັກ ກຶນ ເຮ ປະທານາທິບໍດີ ແຫ່ງ ສາທາລະນະ​ລັດ ເກົາຫລີ   ໄດ້​ເດີນທາງ​ມາ​ຢ້ຽມຢາມທາງການ ທີ່ ສາທາລະນະ​ລັດ ປະຊາທິປະ​ໄຕປະຊາ ຊົນ​ລາວ ​ໃນວັນ​ທີ 9 ກັນຍາ  ໃນໂອກາດເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 28, 29 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງທີ່ ສປປ ລາວ. ການເດີນທາງຢ້ຽມຢາມທາງການ ສປປ ລາວ ຄັ້ງນີ້, ໄດ້ກາຍເປັນເຫດການປະຫວັດສາດໜຶ່ງທີ່ສຳຄັນ ໃນການປະກອບສ່ວນເຂົ້າໃນການເສີມຂະຫຍາຍ​ສາຍ​ພົວພັນ​ມິດຕະພາບ ແລະ ການ​ຮ່ວມ​ມື​ທີ່ດີ ລະຫວ່າງ​ ສອງ​ປະ​ເທດ ລາວ ​ແລະ ສ ເກົາຫລີ ໃຫ້ນັບມື້ນັບແຕກດອກອອກຜົນງອກ​ງາມຍິ່ງໆຂຶ້ນ.

ພິທີ​ຕ້ອນຮັບຢ່າງເປັນທາງການ​ໄດ້​ມີ​ຂຶ້ນ ທີ່ທຳນຽບປະທານປະເທດໂດຍ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ ໄດ້​ໃຫ້​ກຽດຕ້ອນຮັບທ່ານນາງ ປັກ ກຶນ ເຮ ປະທານາທິບໍດີ ແຫ່ງ ສາທາລະນະລັດ ເກົາຫລີ ຢ່າງສົມກຽດ, ຫລັງຈາກນັ້ນກໍໄດ້ມີການພົບປະສອງຝ່າຍຂຶ້ນ. ໃນການພົບປະຄັ້ງ​ນີ້ ສອງຝ່າຍ​ໄດ້​ສະ​ແດງຄວາມຍິນດີ ແລະ ຕີລາຄາສູງຕໍ່ການພົວພັນຮ່ວມມືສອງຝ່າຍ ໃນໄລຍະຜ່ານມາເຫັນວ່າ ການພົວພັນຮ່ວມມືຂອງສອງປະເທດມີຫລາຍດ້ານທີ່ພົ້ນເດັ່ນ, ເຊິ່ງສະແດງອອກໃນການແລກປ່ຽນການຢ້ຽມຢາມ ເຊິ່ງກັນ ແລະ ກັນ ຂອງຄະນະຜູ້ແທນລະດັບສູງຂອງສອງປະເທດ ເປັນຕົ້ນ ແມ່ນການຢ້ຽມຢາມ ສ ເກົາຫລີ ຢ່າງເປັນທາງການຂອງ ທ່ານປະທານປະເທດ ແຫ່ງ ສປປ ລາວ ໃນປີ 2013, ການຢ້ຽມຢາມ ສປປ ລາວ ຢ່າງເປັນທາງການຂອງ ທ່ານນາຍົກລັດຖະມົນຕີ ແຫ່ງ ສ ເກົາຫລີ ໃນປີ 2015. ການຮ່ວມມືດ້ານເສດ ຖະກິດ-ການຄ້າ ກໍນັບມື້ນັບໄດ້ຮັບການຂະຫຍາຍຕົວ, ອັນພົ້ນເດັ່ນແມ່ນການລົງທຶນຂອງ ສ ເກົາຫລີ ຢູ່ ສປປ ລາວ ທີ່ຈັດຢູ່ໃນອັນດັບ 5 ຂອງການລົງທຶນຕ່າງປະເທດ ລວມມູນຄ່າ 700 ກວ່າລ້ານໂດລາສະ ຫະລັດ; ການຄ້າສອງຝ່າຍ ສາມາດບັນລຸໄດ້ 197 ລ້ານໂດລາສະຫະລັດ ໃນປີ 2015. ສອງຝ່າຍຍິນດີສືບຕໍ່ປຶກສາຫາລື ແລະ ຊຸກຍູ້ການຮ່ວມມືດ້ານເສດຖະກິດ-ການຄ້າ, ການສຶກສາ ລວມທັງບັນດາວຽກງານຂະແໜງການຕ່າງໆ ເຊັ່ນ: ດ້ານກະສິກຳ, ສາທາລະນະສຸກ, ການພັດທະນາຊັບພະຍາກອນມະນຸດ, ວັດ ທະນະທຳ-ສັງຄົມ ແລະ ການທ່ອງທ່ຽວ, ເຊິ່ງມີນັກທຸລະກິດ-ນັກທ່ອງທ່ຽວຈາກ ສ ເກົາຫລີ ເດີນ ທາງເຂົ້າມາ ສປປ ລາວ ເປັນຈຳນວນ 160.000 ເທື່ອຄົນ ໃນປີ 2015, ພາຍຫລັງທີ່ ສປປ ລາວ ແລະ ສ ເກົາຫລີ ໄດ້ເປີດສາຍການບິນໂດຍກົງຮ່ວມກັນ ຕັ້ງແຕ່ປີ 2012 ເປັນຕົ້ນມາ.

ສ.ເກົາຫລີ ໄດ້ໃຫ້ການຊ່ວຍເຫລືອທາງການເພື່ອການພັດທະນາ (ODA) ແກ່ ສປປ ລາວ ໃນຫລາຍຂະແໜງການ ເປັນຕົ້ນແມ່ນການພັດທະນາຊົນນະບົດ, ການສຶກສາ ແລະ ສາທາ ລະນະສຸກ,​ ເຊິ່ງເປັນການປະກອບສ່ວນອັນສໍາຄັນເຂົ້າໃນການປະຕິບັດແຜນພັດທະນາເສດຖະກິດ-ສັງຄົມ ຂອງ ລາວ. ນອກຈາກນີ້, ສອງຝ່າຍຍັງໄດ້ແລກປ່ຽນຄຳຄິດຄຳເຫັນ ການຮ່ວມມືໃນຂອບການຮ່ວມມືພາກພື້ນ ແລະ ສາກົນ, ເຊິ່ງສອງຝ່າຍຈະສືບຕໍ່ໃຫ້ການຊ່ວຍເຫລືອ, ປຶກສາຫາລື ແລະ ສະໜັບສະໜູນເຊິ່ງກັນ ແລະ ກັນ ໃຫ້ຫລາຍຂຶ້ນກວ່າເກົ່າ.

ໃນໂອກາດດັ່ງກ່າວ, ທ່ານປະທານປະເທດ ບຸນຍັງ ວໍລະຈິດ ໄດ້ສະແດງຄວາມຂອບໃຈຢ່າງຈິງໃຈຕໍ່ ທ່ານນາງ ປັກ ກຶນ ເຮ ປະທານາທິບໍດີ ແຫ່ງ ສ ເກົາຫລີ ທີ່ໄດ້ຢ້ຽມຢາມ ສປປ ລາວ ຢ່າງເປັນທາງການເທື່ອທຳອິດ ແລະ ສະແດງຄວາມຂອບໃຈ ຜ່ານທ່ານ ໄປຍັງລັດຖະບານ ແລະ ປະຊາຊົນ ແຫ່ງ ສ ເກົາຫລີ ທີ່ໄດ້ໃຫ້ການສະໜັບສະໜູນຊ່ວຍເຫລື​ອ ສປປ ລາວ ໄລຍະຜ່ານມາ, ອວຍ ພອນໄຊອັນປະເສີດມາຍັງທ່ານ ຈົ່ງປະສົບຜົນສໍາເລັດໃໝ່ອັນໃຫຍ່ຫລວງກວ່າເກົ່າ ໃນພາລະກິດແຫ່ງການພັດທະນາ ແລະ ສ້າງສາປະເທດຊາດ ແລະ ຫວັງຢ່າງຍິ່ງວ່າ ທ່ານ ຈະສືບຕໍ່ໃຫ້ການຮ່ວມມື ແລະ ເພີ່ມການສະໜັບສະໜູນຊ່ວຍເຫລືອ ແກ່ ສປປ ລາວໃຫ້ຫລາຍຂຶ້ນ. ພາຍຫລັງການພົບປະ ສອງຝ່າຍຍັງໄດ້ຮ່ວມກັນເປັນສັກຂີພິຍານ ໃນການລົງນາມບົດບັນທຶກຄວາມເຂົ້າໃຈ ການຮ່ວມມືດ້ານຕ່າງໆຈຳນວນ 8 ສະບັບ​ ເຊັ່ນ: ບົດ​ບັນທຶກ​ຄວາມ​ເຂົ້າ​ໃຈ​ວ່າ​ດ້ວຍ​ບັນຊີ​ລາຍ​ຊື່​ໂຄງການ​ຊ່ວຍ​ເຫລືອ​ຫລ້າ​ ໂດຍ​ຜ່ານ​ອົງການ​ຮ່ວມ​ມື​ສາກົນ Koika, ບົດ​ບັນທຶກ​ຄວາມ​ເຂົ້າ​ໃຈ​ ວ່າ​ດ້ວຍ​ການ​ເພີ່ມ​ທະວີ​ການ​ຮ່ວມ​ມື​ດ້ານ​ອຸດສາຫະກໍາ ​ແລະ ການ​ຄ້າ, ບົດ​ບັນທຶກ​ຄວາມ​ເຂົ້າ​ໃຈ​ວ່າ​ດ້ວຍ​ການ​ຮ່ວມ​ມື​ດ້ານ​ວັດທະນະ​ທໍາ ​ແລະ ສິລະ​ປະ, ບົດ​ບັນທຶກ​ຄວາມ​ເຂົ້າ​ໃຈ​ ວ່າ​ດ້ວຍ​ການ​ເພີ່ມ​ທະວີ​ການ​ຮ່ວມ​ມື​ດ້ານ​ພະນັກງານ ​ແລະ ​ແຮ່​ທາດ, ບົດບັນທຶກ​ຄວາມ​ເຂົ້າ​ໃຈ​ວ່າ​ດ້ວຍ​ການ​ຮ່ວມ​ມື​ດ້ານ​ຕົວ​ແບບໝູ່​ບ້ານ​ດີເດັ່ນ ​ຕໍ່​ສິ່ງ​ແວດ​ລ້ອມດ້ານ​ພະລັງງານ​, ບົດ​ບັນທຶກ​ຄວາມ​ເຂົ້າ​ໃຈ​ ວ່າ​ດ້ວຍ​ການ​ສົ່ງ​​ແຮງ​ງານ​ລາວ​ໄປ​ເຮັດ​ວຽກ​ຢູ່ ສ ​ເກົາຫລີ, ບົດ​ບັນທຶກ​ວ່າ​ດ້ວຍ​ການ​ຮ່ວມ​ມື​ດ້ານ​ສະຫວັດດີ​ການ-ສັງ​ຄົມ ​ແລະ ບົດ​ບັນທຶກ​ວ່າ​ດ້ວຍ​ການ​ຮ່ວມ​ມື​ ດ້ານ​ຂົງ​ເຂດ​ສາທາລະນະ​ສຸກ ​ແລະ ວິທະຍາສາດ​ການ​ແພດ.

ໃນຕອນບ່າຍຂອງ​ວັນ​ດຽວກັນ ທ່ານປະທານປະເທດ​ ບຸນ​ຍັງ ວໍລະ​ຈິດໄດ້​ຈັດ​ງານ​ລ້ຽງອາຫານທ່ຽງ ​ເພື່ອ​ເປັນກຽດແກ່ທ່ານປະທານ​າທິບໍດີ ແຫ່ງ ສ ເກົາຫລີ, ທີ່ທໍານຽບປະທານ​ປະ​ເທດ ແຫ່ງ ສປປ ລາວ. ຫລັງຈາກນັ້ນ, ປະທານາທິບໍດີ ສ ເກົາຫລີ ໄດ້ເດີນທາງກັບປະເທດດ້ວຍ​ຄວາມ​ສະຫວັດດີພາບ.