ລາວກຽມປະຕິບັດໂຄງການປັບຕົວເຂົ້າກັບການປ່ຽນແປງເຂດດິນບໍລິເວນນໍ້າ

ກົມສົ່ງເສີມຄຸນະພາບສິ່ງແວດລ້ອມ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ໄດ້ຈັດກອງປະຊຸມລິເລີ່ມ“ໂຄງການປັບຕົວເຂົ້າກັບການປ່ຽນແປງດິນຟ້າອາກາດໃນເຂດດິນບໍລິເວນນ້ຳຣາມຊາຢູ່ ສ ປປ ລາວ” ໃນວັນທີ 13 ກັນຍານີ້, ທີ່ໂຮງແຮມເມີກຽວ, ນະຄອນຫຼວງວຽງຈັນ, ໂດຍການເປັນປະທານຂອງທ່ານ ໂລນຄຳ ອາດສະນາວົງ ຮັກສາການຫົວໜ້າກົມສົ່ງເສີມຄຸນະພາບສິ່ງແວດລ້ອມ, ມີທ່ານ ສະຕີເຟນ ຣຸດກາດ (Stephen Rusgard) ຜູ້ຕາງໜ້າອົງການອາຫານ ແລະ ການກະເສດ ອົງການສະຫະປະຊາຊາດ (FAO) ພ້ອມດ້ວຍຂະແໜງການກ່ຽວຂ້ອງຈາກແຂວງສະຫວັນນະເຂດ, ຈໍາປາສັກ ແລະ ອົງການສາກົນເຂົ້າຮ່ວມຢ່າງພ້ອມພຽງ.

  ໂຄງການດັ່ງກ່າວ, ແມ່ນໄດ້ຮັບທຶນຊ່ວຍເຫຼືອລ້າຈາກກອງທຶນສິ່ງແວດລ້ອມໂລກ (GEF) ໃນມູນຄ່າ 4,7 ລ້ານກວ່າໂດລາສະຫະລັດ ຫຼື ປະມານ 37 ຕື້ກວ່າກີບ, ໂດຍແມ່ນກົມສົ່ງເສີມຄຸນະ ພາບສິ່ງແວດລ້ອມ ແລະ ອົງການອາຫານ ແລະ ການກະເສດເປັນຜູ້ຈັດຕັ້ງປະຕິບັດຮ່ວມກັນ. ສໍາລັບພື້ນທີ່ຈະຈັດຕັ້ງປະຕິບັດແມ່ນຢູ່ເຂດດິນບໍລິເວນນ້ຳເຊຈຳພອນ, ແຂວງສະຫວັນນະເຂດ ແລະ ບຶງກຽດໂງ້ງ ແຂວງຈຳປາສັກ ໃນໄລຍະ 2016-2020. ຈຸດປະສົງຂອງໂຄງການ ນີ້ແມ່ນເພື່ອຄຸ້ມຄອງ ແລະ ຫຼຸດຜ່ອນຜົນກະທົບຈາກການປ່ຽນແປງດິນຟ້າອາ ກາດຢູ່ເຂດດິນບໍລິເວນນ້ຳຣາມຊາໃນລະດັບທ້ອງ ຖິ່ນ, ທັງເປັນການເພີ່ມຂີດຄວາມສາມາດ ແລະ ການມີສ່ວນຮ່ວມຂອງທ້ອງຖິ່ນໃນການຮັບມືຕໍ່ການປ່ຽນແປງດິນຟ້າອາກາດ ເປັນຕົ້ນ: ການສ້າງຄວາມເຂົ້າໃຈຕໍ່ຄວາມສ່ຽງ ແລະ ຜົນກະທົບຈາກການປ່ຽນແປງດິນຟ້າອາກາດຢູ່ໃນເຂດດິນບໍລິເວນດັ່ງກ່າວ. ສ້າງມາດຕະການທີ່ເໝາະສົມໃນການປັບຕົວຕໍ່ຜົນກະທົບຈາກການປ່ຽນແປງດິນຟ້າອາກາດໄພທຳມະຊາດທີ່ມີຕໍ່ລະບົບນິເວດ ແລະ ການດຳລົງຊີວິດຕໍ່ປະຊາຊົນທ້ອງຖິ່ນຢູ່ເຂດດິນບໍລິເວນນ້ຳຣາມຊາ ແລະ ສ້າງມາດຕະການຄຸ້ມຄອງໄພພິບັດ ແລະ ການປັບຕົວທີ່ເໝາະສົມຕໍ່ການປ່ຽນແປງດິນຟ້າອາກາດໃນເຂດດິນບໍລິເວນນ້ຳຣາມຊາໃຫ້ສອດຄ່ອງກັບຂະບວນການວາງແຜນໃນລະດັບທ້ອງຖິ່ນ ແລະ ລະດັບຊາດ.