ທ່ານຮອງປະທານປະເທດ ພັນຄໍາ ວິພາວັນ ຕ້ອນຮັບທູດອາເມລິກາເຂົ້າອໍາລາ

  ໃນວັນທີ 13 ກັນຍານີ້, ຢູ່ທໍານຽບປະທານປະເທດ (ຫໍຄໍາ), ທ່ານຮອງປະທານປະເທດແຫ່ງ ສປປ ລາວ ພັນຄໍາ ວິພາວັນ, ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງທ່ານ ດານຽວ ເອ ຄລູນ (Daniel A Clune) ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງສະຫະລັອາເມລິກາ ປະຈໍາລາວ ເພື່ອອຳລາ, ພາຍຫລັງທີ່ທ່ານໄດ້ສໍາເລັດການປະຕິບັດໜ້າທີ່ການທູດຢູ່ ສປປ ລາວ ເປັນເວລາ 3 ປີ.

   ໃນໂອກາດດັ່ງກ່າວ, ທ່ານຮອງປະທານປະເທດແຫ່ງ ສ ປປ ລາວ, ໄດ້ສະແດງຄວາມຊົມເຊີຍ, ຍິນດີຕ້ອນຮັບ ແລະ ຂອບໃຈຕໍ່ທ່ານທູດ ດານຽວ ເອ ຄລູນ ໃນການມາປະຕິບັດໜ້າທີ່ການທູດຢູ່ລາວໃນໄລຍະຜ່ານມາ, ອັນໄດ້ປະກອບສ່ວນສຳຄັນເຂົ້າໃນການຊຸກຍູ້ສົ່ງເສີມການພົວພັນຮ່ວມມືລະຫວ່າງລາວ

ແລະ ສະຫະລັດອາເມລິກາ ໃຫ້ກວ້າງຂວາງຍິ່ງຂຶ້ນ, ໂດຍສະເພາະນັບແຕ່ປີ 2013 ເປັນຕົ້ນມາ, ທ່ານທູດໄດ້ປະກອບສ່ວນສົ່ງເສີມໃນຫລາຍດ້ານການພົວພັນຮ່ວມມືລາວ-ອາເມລິກາ ເປັນຕົ້ນ: ຊຸກຍູ້ການຢ້ຽມຢາມທາງການ ສ ປປ ລາວ ຂອງຜູ້ນໍາຂັ້ນສູງຂອງສະຫະລັດອາເມລິກາ ແລະ ໄດ້ຍົກລະດັບການຮ່ວມມືເປັນຄູ່ຮ່ວມມືແບບກວມລວມທີ່ເປັນຫລັກການໃນຂອບການຮ່ວມມືໃນຫລາຍດ້ານ, ໂດຍສະເພາະດ້ານເສດຖະກິດ, ການລົງທຶນ, ການສຶກສາ, ສາທາລະນະສຸກ ແລະ ວັດ ທະນະທໍາ ເຊິ່ງເປັນການນໍາເອົາຜົນປະໂຫຍດມາສູ່ປະຊາຊົນສອງຊາດລາວ-ອາເມລິກາ. ພ້ອມນີ້, ທ່ານຮອງປະທານປະເທດ ໄດ້ອວຍໄຊໃຫ້ພອນແກ່ທ່ານທູດ ດານຽວ ຄລູນ ຈົ່ງມີສຸຂະພາບເຂັ້ມແຂງ, ມີພະລານາໄມສົມບູນປະສົບຜົນສໍາເລັດໃນການປະຕິບັດໜ້າທີ່ໃໝ່.

  ພ້ອມດຽວກັນນີ້, ທ່ານ ດານຽວ ຄລູນ ໄດ້ສະແດງຄວາມຂອບອົກຂອບໃຈຕໍ່ ທ່ານຮອງປະທານປະເທດ ກໍຄືລັດຖະບານລາວ ທີ່ໄດ້ໃຫ້ການສະໜັບສະໜູນ, ຊຸກຍູ້ຊ່ວຍເຫລືອໃຫ້ການຮ່ວມມືດ້ວຍດີຕະຫລອດໄລຍະທີ່ໄດ້ມາປະຕິບັດໜ້າທີ່ການທູດຢູ່ ສ ປປ ລາວ ຈົນໄດ້ຮັບຜົນສໍາເລັດເປັນທີ່ໜ້າພໍໃຈ.