ຫົວເຫວີຍສືບຕໍ່ຄອງສ່ວນແບ່ງຫລາຍສົມຄວນໃນຕະຫລາດສະມາດໂຟນທົ່ວໂລກ

          ປີ 2016 ນີ້, ຜູ້ຈຳໜ່າຍສະມາດໂຟນ ໄດ້ຈັດສົ່ງໂທລະສັບມືຖືຫົວເຫວີຍ ໄປ ຈຳໜ່າຍໃນທົ່ວໂລກເພີ່ມຂຶ້ນຈາກປີຜ່ານມາພຽງ 0,3%, ແຕ່ກໍຍັງສາມາດຮັກສາຕຳແໜ່ງ ອັນດັບ 3 ໃນການຈຳໜ່າຍໂທລະສັບມືຖືສະມາດໂຟນໃນທົ່ວໂລກໄດ້, ຊຶ່ງເພີ້ມຂຶ້ນຈາກ 342,4 ລ້ານໜ່ວຍໃນປີຜ່ານມາເປັນ 343,3 ລ້ານໜ່ວຍໃນປີນີ້. ສຳລັບການຂະຫຍາຍຕົວຂອງການຈັດສົ່ງສະມາດໂຟນ 2,2 ລ້ານໜ່ວຍ, ສະເລ່ຍ 71% ໃນປີ 2016, ສ່ວນແທັບເລັດແມ່ນຫລຸດລົງຈາກ 44,1 ລ້ານໜ່ວຍ ມາເປັນ 38,7 ລ້ານໜ່ວຍ ສະເລ່ຍ 12,3%, ຊຶ່ງຜູ້ຈຳໜ່າຍມືຖືສະມາດໂຟນໃນທົ່ວໂລກທີ່ຢູ່ໃນ 5 ອັນດັບສູງສຸດຄື: ແອັບໂປ, ຊຳຊຸງ, ເລໂນໂວ, ຫົວເຫວີຍ ແລະ ອາເມຊອນ.

          ຂ່າວໃຫ້ຮູ້ວ່າ: ສ່ວນແບ່ງການຕະຫລາດສະມາດໂຟນທົ່ວໂລກຂອງຫົວເຫວີຍມີເຖິງ 11,4% ໃນທ້າຍເດືອນພຶດສະພາຜ່ານມາ, ເຮັດໃຫ້ຫົວເຫວີຍກາຍເປັນໜຶ່ງໃນສາມຜູ້ຈຳໜ່າຍສະມາດໂຟນສູງສຸດຂອງໂລກ ແລະ ສ່ວນແບ່ງການຕະຫລາດຂອງຫົວເຫວີຍໃນສະມາດໂຟນລາຄາ 500-600 ໂດລາສະຫະລັດ, ສະເລ່ຍເພີ້ມຂຶ້ນປະມານ 10% ຈາກປີຜ່ານມາ, ສຳລັບໃນປະເທດຈີນ ຫົວເຫວີຍຍັງສືບຕໍ່ເປັນຜູ້ນຳອຸດສາຫະກຳດ້ວຍສ່ວນແບ່ງການຕະຫລາດ 18,6% ໃນເດືອນມີຖຸນານີ້ ແລະ ຍັງສືບຕໍ່ຮັກສາຕຳແໜ່ງອັນດັບທີ 3 ໄວ້ໄດ້ດ້ວຍ 9% ຂອງສ່ວນແບ່ງການຕະຫລາດສະມາດໂຟນທົ່ວໂລກໃນປີ 2016, ຢູ່ປະເທດຈີນ ການຈັດສົ່ງສະມາດໂຟນແມ່ນເພີ່ມຂຶ້ນເປັນ 4%, ຈາກ 105,1 ລ້ານໜ່ວຍ ມາເປັນ 109 ລ້ານໜ່ວຍໃນປີ 2016 ອີກດ້ວຍ.