ເຈົ້າຄອງແນະນຳໃຫ້ຄະນະນຳເມືອງໄຊທານີເອົາໃຈໃສ່ການວາງແຜນຜັງເມືອງໃຫ້ດີ

              ໃນໂອກາດລົງຕິດຕາມຜົນເສຍຫາຍຈາກສະພາບນ້້ຳຖ້ວມຢູ່ເຂດເມືອງໄຊທານີຂອງທ່ານເຈົ້າຄອງນະຄອນຫລວງວຽງຈັນ ສິນລະວົງ ຄຸດໄພທູນ ເມື່ອບໍ່ດົນມານີ້, ທ່ານໄດ້ແນະນຳໃຫ້ຄະນະນຳເມືອງດັ່ງກ່າວເອົາໃຈໃສ່ວຽກງານຜັງເມືອງໃຫ້ຮັບປະກັນຫລາຍຂຶ້ນ, ໂດຍສະເພາະການວາງແຜນຜັງຮ່ອງລະບາຍນ້ຳຕາມເສັ້ນທາງ, ຫ້ວຍນ້ຳທຳມະຊາດ ຕ້ອງໄດ້ຮັບການປັບປຸງແກ້ໄຂບໍ່ໃຫ້ມີສິ່ງອຸດຕັນ ລວມເຖິງການສ້າງສາພັດທະນາຕ່າງໆຂອງປະຊາຊົນ ເປັນຕົ້ນ: ເຮັດສວນ, ເຮັດນາ, ປຸກສ້າງເຮືອນ ຫລື ອື່ນໆ ກໍຕ້ອງໃຫ້ຖືກຕ້ອງສອດຄ່ອງກັບລະບຽບຫລັກການຂອງຂະແໜງກ່ຽວຂ້ອງ ເພື່ອຮັບປະກັນບໍ່ໃຫ້ມີຜົນກະທົບຕໍ່ສິ່ງແວດລ້ອມ ແລະ ສັງຄົມ

ຕາມມາ ແລະ ບັນຫາສຳຄັນແມ່ນຫລຸດ ຜ່ອນຄວາມສ່ຽງ ແລະ ຜົນເສຍຫາຍຈາກໄພທຳມະຊາດຕ່າງໆທີ່ຈະເກີດຂຶ້ນໃນຕໍ່ໜ້າ ເພື່ອບໍ່ໃຫ້ເປັນຄືດັ່ງກໍລະນີສະພາບໄພນ້ຳຖ້ວມໃນໄລຍະຕົ້ນເດືອນກັນຍາຜ່ານມານີ້, ອັນໄດ້ເຮັດໃຫ້ຫລາຍພື້ນທີ່ໄດ້ຮັບຜົນກະທົບຫລາຍສົມຄວນ.

             ທ່ານເຈົ້າເມືອງໄຊທານີ ຈັນທະລາ ອິນທະລັງສີ ໃຫ້ຮູ້ວ່າ: ພາຍຫລັງເກີດມີຝົນຕົກໜັກຕິດຕໍ່ກັນແຕ່ວັນທີ 5-6 ກັນຍານີ້, ໄດ້ເຮັດໃຫ້ເສັ້ນທາງຫລາຍສາຍ, ເນື້ອທີ່ການຜະລິດ ແລະ ເຮືອນຊານປະຊາຊົນຖືກນ້ຳຖ້ວມ ຄື: ເສັ້ນທາງໄກສອນພົມວິຫານ, ທາງ 13 ໃຕ້, ເຂດບ້ານລາດຄວາຍ-ໂນນແຕ້, ນາສາລາ-ນາມົນ, ໜອງບົວ-ນາລ້ອມ ຖືກນ້ຳຖ້ວມເປັນບໍລິເວນກວ້າງ ແລະ ມີເຮືອນປະຊາຊົນສີບກວ່າຫລັງ, ໂຮງຮຽນ 3 ແຫ່ງ ແລະ ວັດ ໄດ້ຮັບຜົນເສຍຫາຍເຊັ່ນກັນ ແລະ ພາຍຫລັງເກີດໄພທຳມະຊາດດັ່ງກ່າວອຳນາດການປົກຄອງເມືອງໄດ້ລະດົມລົດຈົກຈຳນວນໜຶ່ງໄປລ່ວງຄອງລະບາຍນ້ຳທີ່ມີຄວາມຍາວຫລາຍກວ່າ 20 ກິໂລແມັດ ເພື່ອເປັນການປ້ອງກັນສະພາບນ້ຳຖ້ວມທີ່ອາດຈະເກີດຂຶ້ນອີກ.