ລັດຖະບານເນັ້ນໃຫ້ທຸກພາກສ່ວນປະຕິບັດຄຳສັ່ງເລກທີ 15 ນຍ ຢ່າງເຂັ້ມງວດ

            ລັດຖະບານໄດ້ເນັ້ນໃຫ້ທຸກພາກສ່ວນທັງສູນກາງ ແລະ ທ້ອງຖິ່ນຈົ່ງສືບຕໍ່ເພີ່ມທະວີຄວາມເອົາໃຈໃສ່ປະຕິບັດຄຳສັ່ງເລກທີ 15/ນຍ ຂອງນາຍົກລັດຖະມົນຕີ ວ່າດ້ວຍການເພີ່ມທະວີການຄຸ້ມຄອງໄມ້, ການເຄື່ອນຍ້າຍໄມ້ ແລະ ທຸລະກິດໄມ້ໃຫ້ເຂັ້ມງວດກວ່າເກົ່າ, ພາຍຫລັງເຫັນວ່າການປະຕິບັດຄຳສັ່ງດັ່ງກ່າວໃນໄລຍະຜ່ານມາມີຜົນສຳເລັດທີ່ໜ້າພໍໃຈ ແລະ ສາມາດສະກັດກັ້ນປາກົດ ການຫຍໍ້ໍທໍ້ຕ່າງໆກ່ຽວກັບການລັກລອບທຳລາຍປ່າໄມ້ໄດ້ເປັນຢ່າງດີ.

     ການຊີ້ນຳຕໍ່ບັນຫາດັ່ງກ່າວມີຂຶ້ນໃນກອງປະຊຸມຮ່ວມລະຫວ່າງນາຍົກ-ຮອງນາຍົກກ່ຽວກັບການ

ຈັດຕັ້ງປະຕິບັດຄຳສັ່ງເລກທີ 15/ນຍ ເມື່ອບໍ່ດົນມານີ້, ໂດຍໄດ້ແນະນຳວ່າ: ການຈັດຕັ້ງ ຫລື ບຸກຄົນໃດຫາມີຜົນງານດີເດັ່ນ, ຕັ້ງໜ້າປະຕິບັດກົດໝາຍ, ລະບຽບການ ແລະ ຄຳສັ່ງດັ່ງກ່າວຢ່າງເຂັ້ມງວດແມ່ນໃຫ້ຍ້ອງຍໍຊົມເຊີຍຕາມນະໂຍບາຍຂອງພັກ ແລະ ລັດ, ກົງກັນຂ້າມການຈັດຕັ້ງ ຫລື ບຸກຄົນໃດຫາກມີການລະເມີດກົດໝາຍ ຫລື ຄຳສັ່ງດັ່ງກ່າວແມ່ນໃຫ້ດຳເນີນມາດຕະການຕາມລະບຽບກົດໝາຍ. ມອບໃຫ້

ກະຊວງອຸດສາຫະກຳ ແລະ ການຄ້າ, ກະຊວງກະສິກຳ-ປ່າໄມ້ ສົມທົບກັບກະຊວງກ່ຽວຂ້ອງ ແລະ ອຳນາດການປົກຄອງທ້ອງຖິ່ນປຶກສາຫາລື, ຈັດຕັ້ງຜັນຂະຫຍາຍ ແລະ ວາງມາດຕະການຈັດຕັ້ງປະຕິບັດໃຫ້ເໝາະສົມກັບຕົວຈິງ, ເຂັ້ມງວດ ແລະ ມີຜົນສັກສິດ. ມອບໃຫ້ຄະນະກວດກາສະເພາະກິດຂັ້ນສູນກາງ ແລະ ແຂວງສືບຕໍ່ຕິດຕາມ, ກວດກາ, ຊຸກຍູ້ການຈັດຕັ້ງປະຕິບັດຄຳສັ່ງດັ່ງກ່າວໃຫ້ປາກົດຜົນເປັນຈິງ. ມອບໃຫ້ອົງການກວດກາລັດຖະບານ, ກະຊວງພາຍໃນສົມທົບກັບຄະນະຈັດຕັ້ງສູນກາງ ກໍຄືຄະນະພັກ, ອົງການປົກຄອງທ້ອງຖິ່ນເອົາໃຈໃສ່ຕິດຕາມ, ກວດກາ ແລະ ມີມາດຕະການທີ່ເໝາະສົມ ເພື່ອຍ້ອງຍໍສັນລະເສີນຕໍ່ການຈັດຕັ້ງ ແລະ ບຸກຄົນທີ່ມີຜົນງານ ແລະ ແກ້ໄຂຕໍ່ບຸກຄົນ ຫລື ການຈັດຕັ້ງທີ່ລະເມີດຄຳສັ່ງດັ່ງກ່າວ ແລະ ກົດໝາຍໃຫ້ທັນເວລາ. ທັງນີ້ກໍເພື່ອແນໃສ່ປົກປ້ອງຜົນປະ ໂຫຍດຂອງຊາດ ແລະ ປະຊາຊົນ ກໍຄືຜູ້ປະກອບການທັງພາກລັດ ແລະ ເອກະຊົນໃຫ້ມີຄວາມສະເໝີ ພາບ ແລະ ຍຸຕິທຳ.