ງານວາງສະແດງຈີນ-ອາຊຽນ ຄັ້ງທີ 13 ຈັດຂຶ້ນທີ່ໜານໜິງ ສປ ຈີນ

   ໃນວັນທີ 11 ກັນຍານີ້, ຄະນະຜູ້ແທນຂັ້ນສູງຂອງ ສປປ ລາວ ນໍາໂດຍທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ເຂົ້າຮ່ວມງານວາງສະແດງ ຈີນ-ອາຊຽນ ຄັ້ງທີ 13, ເຊິ່ງຈັດຂຶ້ນແຕ່ວັນທີ 9-13 ກັນຍາ 2016  ທີ່ ນະຄອນຫນານຫນິງ, ແຂວງ ກວາງຊີ, ສປ. ຈີນ. ໂອກາດດັ່ງ ກ່າວ, ທ່ານຮອງນາຍົກ ລັດຖະມົນຕີ ໄດ້ຢ້ຽມຊົມຫ້ອງວາງສະແດງຂອງ ສປປ ລາວ ແລະ ພົບປະກັບບັນດານັກທຸລະກິດລາວ ທີ່ເຂົ້າຮ່ວມງານວາງສະແດງດັ່ງກ່າວເປັນຈຳນວນຫລາຍ.

          ໃນໂອກາດນີ້, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ໄດ້ພົບປະສອງຝ່າຍກັບ   ທ່ານ ຈ່າງກ້າວລີ, ຄະນະປະຈໍາກໍາມະການກົມການເມືອງສູນກາງພັກຄອມມຸຍນິດຈີນ, ທັງເປັນຮອງນາຍົກລັດຖະມົນຕີ ແຫ່ງ ສປ ຈີນ, ໂດຍທັງສອງຝ່າຍໄດ້ຕີລາຄາສູງຕໍ່ການຮ່ວມມືສອງປະເທດລາວ-ຈີນ ໃນ

ໄລຍະຜ່ານມາ, ພ້ອມໄດ້ເປັນເອກະພາບກັນສືບຕໍ່ຊຸກຍູ້ບັນດາໂຄງການຮ່ວມມືຕ່າງໆ ທີ່ການ ນໍາຂັ້ນສູງຂອງສອງຝ່າຍໄດ້ຕົກລົງແລ້ວ ໃຫ້ປະກົດຜົນເປັນຈິງ, ເປັນຕົ້ນແມ່ນ ໂຄງການທາງລົດໄຟລາວ-ຈີນ, ໂຄງການດາວທຽມລາວ-ຈີນ ທີ່ເປັນໂຄງການຮ່ວມມືຂະຫນາດໃຫຍ່, ສອງຝ່າຍຍັງໄດ້ປຶກສາຫາລື ແລະ ແລກປ່ຽນທັດສະນະຮ່ວມກັນໃນການສືບຕໍ່ເສີມຂະຫຍາຍ ແລະ ຮັດແຫນ້ນການຮ່ວມມື ໃນຂົງເຂດການສຶກສາ, ການທ່ອງທ່ຽວ, ເຊິ່ງຝ່າຍຈີນໄດ້ຢືນຢັນວ່າຈະເພີ່ມທຶນການສຶກສາໃຫ້ແກ່ ສປປ ລາວຕື່ມອີກ ແລະ ປີນີ້ເປັນປີແຫ່ງການສະເຫລີມສະຫລອງສາຍພົວພັນການທູດ ລະ ຫວ່າງ ລາວ-ຈີນ ຄົບຮອບ 55 ປີ, ສອງຝ່າຍຈະຮ່ວມກັນຈັດງານຕ່າງໆເພື່ອສະເຫລີມສະຫລອງດ້ວຍຫລາຍຮູບແບບ.

          ໃນໂອກາດນີ້, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ຍັງໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງເຈົ້າແຂວງກວາງຊີ ເຊິ່ງສອງຝ່າຍໄດ້ປຶກສາຫາລືກັນຫລາຍບັນຫາກ່ຽວກັການຮ່ວມມືໂດຍສະເພາະການຮ່ວມມືລະຫວ່າງແຂວງກວາງຊີ ແລະ ສປປ ລາວ, ເຊິ່ງແຂວງກວາງຊີ ຖືເປັນແຂວງທີ່ມີການຮ່ວມມືດ້ານການສຶກສາ, ກະສິກໍາແລະ ການສົ່ງເສີມການທ່ອງທ່ຽວ ກັບ ສປປ ລາວ ມີທ່ວງທ່າດີຂຶ້ນເປັນລຳດັບ.

          ໃນວັນທີ 11 ກັນຍານີ້, ທ່ານຮອງນາຍົກລັດຖະມົນຕີ ສອນໄຊ ສີພັນດອນ ໄດ້ເຂົ້າຮ່ວມພິທີເປີດງານວາງສະແດງຈີນ-ອາຊຽນ ຄັ້ງທີ 13, ພ້ອມທັງໄດ້ຕາງໜ້າລັດຖະບານລາວ ຂຶ້ນກ່າວຄໍາເຫັນຕໍ່ພິທີ, ຊຶ່ງໄດ້ເນັ້ນ ເຖິງຄວາມສໍາຄັນງານວາງສະແດງດັ່ງກ່າວທີ່ເປັນເວທີສຳຄັນໃນການຮັດແຫນ້ນສາຍພົວພັນຮ່ວມມືລະຫວ່າງອາຊຽນ-ຈີນ, ໃນຂົງເຂດການຄ້າ, ການລົງທຶນ ແລະ ການບໍລິ ການລວມທັງການສ້າງຄວາມເຂົ້າອົກເຂົ້າໃຈ ລະຫວ່າງປະຊາຊົນຂອງບັນດາປະເທດສະມາຊິກອາ ຊຽນ ແລະ ສປ ຈີນ, ໃຫ້ນັບມື້ແໜ້ນແຟ້ນຍິ່ງຂຶ້ນ. ໂອກາດດັ່ງກ່າວ, ທ່ານຮອງນາຍົກລັດຖະມົນຕີ ສອນໄຊ ສີພັນດອນກໍໄດ້ແຈ້ງຜົນສໍາເລັດຂອງການເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 28-29 ແລະ ກອງປະຊຸມອື່ນໆທີ່ກ່ຽວຂ້ອງ ທີ່ນະຄອນຫລວງວຽງຈັນ ແລະ ໄດ້ສະແດງຄວາມຊົມເຊີຍຕໍ່ລັດຖະບານຈີນທີ່ປະສົບຜົນສໍາເລັດໃນການເປັນເຈົ້າພາບຈັດກອງປະຊຸມສຸດຍອດ G20ອີກດ້ວຍ.

          ການເຂົ້າຮ່ວມງານວາງສະແດງຈີນ-ອາຊຽນ  ຂອງຄະນະຜູ້ແທນຂັ້ນສູງຂອງ ສປປ ລາວ ບໍ່ພຽງແຕ່ເປັນການຮັດແຫນ້ນການຮ່ວມມືໃນຂອບວຽກງານອາຊຽນ-ຈີນ ເທົ່ານັ້ນ ແຕ່ຍັງເປັນການປະກອບສ່ວນເຂົ້າໃນການໄປມາຫາສູ່ ກໍ່ຄືການພົບປະແລກປ່ຽນຂອງການນຳຂັ້ນສູງລະຫວ່າງສອງຝ່າຍນໍາອີກ ເພື່ອ ປະກອບສ່ວນເຂົ້າໃນການເພີ່ມທະວີສາຍພົວພັນຄູ່ຮ່ວມຍຸດທະສາດຮອບດ້ານລະຫວ່າງ ສອງປະເທດລາວ-ຈີນ ໃຫ້ແໜ້ນແຟ້ນຂຶ້ນ.