ອາຊຽນພາກພື້ນທີ່ມີຄວາມສໍາຄັນຕໍ່ການລົງທຶນ

            ໃນໂອກາດທີ່ ສປປ ລາວ ໄດ້ເປັນເຈົ້າພາບຈັດກອງປະຊຸມສຸດຍອດອາຊຽນຄັ້ງທີ 28, 29 ແລະ ກອງປະຊຸມປິ່ນອ້ອມສຳຄັນອື່ນໆໃນລະຫວ່າງວັນທີ 6-8 ກັນຍາຜ່ານມານັ້ນ, ກໍໄດ້ມີກອງປະ ຊຸມສຸດຍອດອາຊຽນດ້ານທຸລະກິດ ແລະ ການລົງທຶນໄຂຂຶ້ນໃນຫົວຂໍ້ “ ທຸລະກິດສາມາດປະສົບຜົນ ສຳເລັດໃນການພັດທະນາເສດຖະກິດອາຊຽນ ” ແລະ ອີກຫົວຂໍ້ໜຶ່ງແມ່ນ “ ມຸມມອງໃນການພັດທະ ນາເສດຖະກິດອາຊຽນ”. ການສົນທະນາໃນສອງຫົວຂໍ້ນີ້ຢູ່ກອງປະຊຸມດັ່ງກ່າວນີ້ ກໍຍ້ອນວ່າເສດຖະ ກິດຂອງບັນດາປະເທດອາຊຽນພວມມີການຂະຫຍາຍຕົວເພີ່ມຂຶ້ນ, ຈຶ່ງເຮັດໃຫ້ນັກລົງທຶນຈາກຕ່າງປະ ເທດໃນທົ່ວໂລກມີຄວາມສົນໃຈຢາກເຂົ້າມາລົງທຶນໃນພາກພື້ນອາຊຽນນັບມື້ຫລາຍຂຶ້ນ.

          ທ່ານກຳມະການຜູ້ຈັດການກອງທຶນການເງິນລະຫວ່າງປະເທດ (IMF) ນາງ ຄຣິສຕີນ ລາກາດ ໄດ້ ກ່າວບາງຕອນໃນລະຫວ່າງການໃຫ້ສໍາພາດທ່ານ ໂຄຼອີ້ໂຊ ບັນນາທິການບໍລິຫານສະຖານີໂທລະພາບນິວເອເຊຍ ວ່າ: ເຖິງວ່າເສດຖະກິດຂອງອາຊຽນໄດ້ເຕີບໃຫຍ່ຂະຫຍາຍຕົວໄວກໍຕາມ, ແຕ່ການພົວພັນດ້ານການຄ້າຂອງບັນດາປະເທດໃນອາຊຽນກໍຖືວ່າຍັງບໍ່ຫລາຍ ເມື່ອທຽບໃສ່ເອີຣົບ.       ສະນັ້ນ ມັນຈຶ່ງເປັນຈຸດສຳຄັນຂອງພວກເຮົາໃນການຮ່ວມມືໃນຕໍ່ໜ້າ. ການເປັນປະຊາຄົມເສດຖະກິດອາຊຽນແມ່ນທຸກປະເທດໃນພາກພື້ນຈະຕ້ອງໄດ້ພ້ອມກັນກ້າວສູ່ການເປັນຖານການຜະລິດດຽວ ແລະ ຕະຫລາດໜຶ່ງດຽວ.

             ໃນການສົນທະນາເຈາະເລິກດ້ານທຸລະກິດໃນຂົງເຂດອາຊຽນຂອງໂທລະພາບນິວເອເຊຍທີ່ຖ່າຍທຳໃນໂອກາດກອງປະຊຸມດັ່ງກ່າວ ເຊິ່ງໄດ້ເຊີນເອົາຜູ້ຕາງໜ້າທຸລະກິດລາວ ຄືທ່ານນາງ ແອນນາ ກລິນ ຜູ້ບໍລິຫານທະນາຄານເອແອັມແຊັດລາວ, ທ່ານ ຄຳສິນທະວົງ ຫຍຸຍວານສີວົງ ທີ່ປຶກສາບໍລິ ສັດ ST ກຣຸບ, ທ່ານ ອາຫລຽນ ແສງແກ້ວປະເສີດ ຜູ້ບໍລິຫານກາເຟກລີນຮີວ ແລະ ທ່ານ ວັນເພັງ ສົມຊະນະ ຜູ້ອຳນວຍການບໍລິສັດຄຳໄຜ່ຊະນະກຣບ ເພື່ອສົນທະນາໃນຫລາຍມຸມມອງ ເປັນຕົ້ນ: ໂອ ກາດ ແລະ ຊ່ອງທາງໃນການດຳເນີນທຸລະກິດ, ການບໍລິຫານການເງິນ, ການເຂົ້າເຖິງແຫລ່ງທຶນ, ການແຂ່ງຂັນໃນຕະຫລາດພາຍໃນ ແລະ ຕ່າງປະເທດ ແລະ ອື່ນໆ.

             ທ່ານປະທານສະພາທຸລະກິດ ທັງເປັນທີ່ປຶກສາອາຊຽນ ອຸເດດ ສຸວັນນະວົງ ກ່າວວ່າ: ກອງປະຊຸມຄັ້ງນີ້ໄດ້ມີການປຶກສາຫາລືຫລາຍບັນຫາທີ່ພາກເອກະຊົນຂອງບັນດາປະເທດອາຊຽນຜະເຊີນ, ໂດຍສະເພາະຫົວໜ່ວຍທຸລະກິດຂະໜາດນ້ອຍ ແລະ ກາງ ເພື່ອຈະພ້ອມກັນຊອກຫາຊ່ອງທາງແກ້ໄຂ ແລະ ຮ່ວມມືກັນ ເພື່ອພັດທະນາເສດຖະກິດຂອງພາກພື້ນນີ້ໃຫ້ເຂັ້ມແຂງ.