ລະວັງພະຍຸດີເປຣຊັນ ອາດຈະພັດເຂົ້າພາກໃຕ້ລາວແຕ່ວັນທີ 13-15 ກັນຍານີ້

          ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ພາຍຸດີເປຣຊັນ ໄດ້ກໍ່ຕົວຂຶ້ນຢູ່ເຂດທະເລຈີນໃຕ້ຕອນກາງ, ໃນວັນທີ 12 ກັນຍານີ້, ມີຈຸດສູນກາງຢູ່ເສັ້ນຂະໜານທີ 13,9 ອົງສາເໜືອ ແລະ ເສັ້ນແວງທີ 111,7 ອົງສາຕາເວັນອອກ ແລະ ຫ່າງຈາກແຄມຝັ່ງຊາຍແດນ ສສ ຫວຽດນາມ 295 ກິໂລ ແມັດ, ພາຍຸຫົວດັ່ງກ່າວ ກຳລັງເຄື່ອນທີ່ໄປທາງທິດຕາເວັນຕົກ-ຕາເວັນຕົກສ່ຽງເໜືອດ້ວຍຄວາມໄວ 15 ກິໂລແມັດຕໍ່ຊົ່ວໂມງ ແລະ ຈະເຄື່ອນຂຶ້ນຝັ່ງ ສສ ຫວຽດນາມ ຜ່ານເມືອງດານັງໃນຕອນເຊົ້າວັນທີ 13 ກັນຍານີ້, ຈາກນັ້ນ ກໍຈະເຄື່ອນຜ່ານແຂວງເຊກອງ ແລະ ສາລະວັນໃນບ່າຍວັນດຽວກັນ, ຊຶ່ງຈະເຮັດໃຫ້ເກີດມີຝົນຕົກໜັກ ພ້ອມມີລົມພັດແຮງຢູ່ບັນດາແຂວງພາກກາງລົງຫາພາກໃຕ້ໃນໄລຍະແຕ່ວັນທີ 12-14 ກັນຍານີ້. ດັ່ງນັ້ນ ຈຶ່ງແຈ້ງເຕືອນເຖິງປະຊາຊົນ ແລະ ອົງການຈັດຕັ້ງທຸກພາກສ່ວນຢູ່ບັນ ດາແຂວງຄຳມ່ວນ, ສະຫວັນນະເຂດ, ສາລະວັນ, ເຊກອງ, ຈຳປາສັກ ແລະ ອັດຕະປື ຈົ່ງມີສະຕິກຽມ ພ້ອມຮັບມືກັບສະພາບຝົນຕົກຟ້າຄະນອງ, ດິນເຈື່ອນ, ນ້ຳຖ້ວມໄຫລຊຸແຮງ, ນ້ຳຖ້ວມອັ່ງ ໃນໄລຍະວັນທີ 13-15 ກັນຍານີ້ ແລະ ເກັບມ້ຽນວັດຖຸສິ່ງຂອງທີ່ມີຄ່າພ້ອມທັງສັດລ້ຽງໄວ້ບ່ອນທີ່ປອດໄພ, ພ້ອມທັງໃຫ້ຕິດຕາມການລາຍງານສະພາບອາການຈາກກົມອຸຕຸນິຍົມ ແລະ ອຸທົກກະສາດເປັນປະຈຳ.