ທະນາຄານລາວກໍ່ສ້າງມອບລາງວັນໃຫ້ລູກຄ້າຜູ້ໂຊກດີ

            ພາຍຫຼັງມີການຈັບສະຫຼາກຫາລູກຄ້າຜູ້ໂຊກດີ ໃນໂຄງການເປີດບັນຊີມະຫາໂຊກ-ມະ ຫາຊັບກັບທະນາຄານລາວກໍ່ສ້າງຄັ້ງທີ 4 ປະຈຳປີ 2016, ໃນທ້າຍເດືອນສິງຫາຜ່ານມາ ແລະ ໃນວັນທີ 12 ກັນຍານີ້, ທະນາຄານດັ່ງກ່າວໄດ້ຈັດພິທີມອບລາງວັນໃຫ້ລູກຄ້າຜູ້ໂຊກດີ ໃນໂຄງການດັ່ງກ່າວ ທີ່ສຳນັກງານໃຫຍ່ຕົນ, ບ້ານໂພນສີນວນ, ເມືອງສີສັດຕະນາກ, ນະຄອນຫຼວງວຽງຈັນ, ໂດຍມີທ່ານ ດາໂຕສິຣິ ຢູຮາວ ອາຍຊິນເຈຍໂຫຼ ປະທານສະພາຄຸ້ມຄອງ ແລະ ກວດກາ ທະນາຄານລາວກໍ່ສ້າງ, ທ່ານນາງ ບຸນມີ ເທບພະວົງ ຮອງປະທານສະພາບໍລິຫານ ທະນາຄານລາວກໍ່ສ້າງ, ພ້ອມດ້ວຍລູກຄ້າຜູ້ໂຊກດີເຂົ້າຮ່ວມຢ່າງພ້ອມພຽງ.

          ໂຄງການດັ່ງກ່າວ ລວມມີທັງໝົດ 9 ລາງວັນ ແລະ ມີຜູ້ໂຊກດີທັງໝົດ 45 ຄົນ, ໃນນັ້ນຜູ້ໄດ້

ລາງວັນທີ 1 ລົດໂຕໂຍຕາ ແລນຄຸຍເຊີ (TOYOTA LANDCRUISER VX LIMITED) ແມ່ນທ່ານນາງ ຈັນເພັງ ດວງພະຈັນ, ລາງວັນທີ 2 ລົດໂຕໂຍຕາ ລີໂວ້ (TOYOTA REVO) ແມ່ນທ່ານ ຄຳສະຫວັນ ມິ່ງຈຳປາບານ, ລາງວັນທີ 3  ລົດຮຸນໃດ ອີອອນ (HYUNDAI EON) ແມ່ນທ່ານ ອາດີສອນ ພົມມະຈັນ, ນອກນີ້ຍັງມີຜູ້ໄດ້ຮັບລາງວັນອື່ນໆອີກເຊັ່ນ: ລົດຈັກ, ສາຍຄໍຄຳ, ບັນຊີເງິນຝາກ, ພ້ອມທັງໄດ້ມອບເງິນຊ່ວຍເຫລືອສູນຟືນຟູໜ້າທີ່ການ, ບ້ານຄູວຽງ ຈຳນວນ 20 ລ້ານກີບ ແລະ ສຳລັບໂປໂມຊັນໃນສົກປີ 2016-2017 ນີ້ທະນາຄານຍັງຈະເພີ່ມມູນຄ່າຂອງລາງວັນໃຫ້ຫຼາຍຂື້ນກວ່າເກົ່າ.

          ປະທານສະພາຄຸ້ມຄອງ ແລະ ກວດກາທະນາຄານດັ່ງກ່າວ ໃຫ້ຮູ້ວ່າ: ທະນາຄານລາວກໍ່ສ້າງ ເປັນທະນາຄານຮ່ວມທຸລະກິດ ລະຫວ່າງນັກທຸລະກິດເອກະຊົນລາວກັບນັກ ທຸລະກິດຕ່າງປະເທດ, ຊຶ່ງໄດ້ຮັບການອະນຸຍາດສ້າງຕັ້ງຂຶ້ນໃນເດືອນກຸມພາ 2012 ແລະ ຕະຫຼອດໄລຍະ 5 ປີຜ່ານມາ, ໄດ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ, ຍ້ອນໄດ້ຮັບຄວາມໄວ້ເນື້ອເຊື່ອໃຈ ແລະ ເຊື່ອໝັ້ນຈາກລູກຄ້າຄື: ໃນປີ 2014 ຍອດເງິນຝາກລວມທຸກສະກຸນເງິນເພີ່ມຂື້ນ 9%, ປີ 2015 ເພີ່ມຂຶ້ນ 33,19% ແລະ ເພີ່ມຂຶ້ນຢ່າງຕໍ່ເນື່ອງເຖິງ 27,24% ໃນປີ 2016, ໃນນັ້ນບັນຊີເງິນຝາກປະຈຳ ຫຼື ຝາກມີກຳນົດໄດ້ກວມເອົາ 66,25% ຂອງບັນຊີເງິນຝາກທັງໝົດ ແລະ ເພີ່ມຂື້ນ ໂດຍສະເລ່ຍ 21,47% ຕໍ່ປີ, ຊຶ່ງເຮັດໃຫ້ທະນາຄານໄດ້ນຳໃຊ້ແຫຼ່ງທືນຈາກເງິນຝາກດັ່ງກ່າວປະກອບສ່ວນເຂົ້າໃນວຽກງານສິນເຊື່ອໃຫ້ແກ່ນັກລົງທືນ, ນັກທຸລະກິດ, ພໍ່ຄ້າ-ຊາວຂາຍ ເພື່ອປະກອບສ່ວນເຂົ້າໃນການສ້າງສາພັດທະນາປະເທດຊາດໃຫ້ຈະເລີນຮຸ່ງເຮືອງ.