ກອງປະຊຸມເຜີຍແຜ່ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງຢູ່ ສປປ ລາວ

          ເຊົ້າວັນທີ 24 ຕຸລາ ຜ່ານມານີ້ກົມອົງການຈັດຕັ້ງສາກົນກະຊວງການຕ່າງປະເທດ,   ໄດ້ຈັດກອງປະຊຸມເຜີຍແຜ່ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (SDGs) ໃຫ້ແກ່ພະ ນັກງານຄູອາຈານແລະນັກສຶກສາຢູ່ມະຫາວິທະຍາໄລແຫ່ງຊາດດົງໂດກພາຍໃຕ້ການເປັນປະທານຂອງທ່ານຄຳອິນຄິດຈະເດດ, ຫົວໜ້າກົມອົງການຈັດຕັ້ງສາກົນ, ທັງເປັນຫົວໜ້າກອງເລຂາຄະນະຊີ້ນຳລະດັບຊາດເພື່ອຕິດຕາມການຈັດຕັ້ງປະຕິບັດເປົ້າໝາຍການພັດທະນາແບບຍືນ ແລະ ມີທ່ານ ອຸດົມ ພອນຄໍາເພັງ, ຮອງອະທິການບໍດີມະຫາວິທະຍາໄລແຫ່ງຊາດ ເຂົ້າຮ່ວມນຳດ້ວຍ ກອງປະຊຸມໄດ້ຮັບຟັງ

ລາຍງານກ່ຽວກັບເປົ້າຫມາຍການພັດທະນາແບບຍືນຍົງແລະ ການເຊື່ອມສານເປົ້າໝາຍດັ່ງກ່າວເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 8 ກໍຄືຍຸດທະສາດການພັດທະນາເສດຖະກິດ-ສັງຄົມ ຮອດປີ 2025 ແລະ ວິໄສທັດ ປີ 2030 ຂອງ ສປປ ລາວ ເພື່ອຮັບຮູ້ ແລະ ເຂົ້າ ໃຈກ່ຽວກັບເປົ້າຫມາຍການພັດທະນາດັ່ງກ່າວເຊິ່ງກອງປະຊຸມສຸດຍອດ ອົງການສະຫະປະຊາຊາດ ເພື່ອຮັບຮອງເອົາວາລະການພັດທະນາໃໝ່ຂອງສາກົນທີ່ເປັນປະຫວັດສາດ ທີ່ເອີ້ນວ່າ "ຫັນປ່ຽນໂລກຂອງພວກເຮົາ: ວາລະ2030ເພື່ອການພັດທະນາແບບຍືນຍົງ", ເຊິ່ງລວມເຖິງເປົ້າຫມາຍການພັດທະ ນາແບບຍືນຍົງທີກວມເອົາດ້ານເສດຖະກິດ, ສັງຄົມແລະສິ່ງແວດລ້ອມລວມທັງໝົດ 17ເປົ້າໝາຍຄື:

ລຶບລ້າງຄວາມທຸກຍາກທຸກຮູບແບບໃນທົ່ວໂລກ; ລຶບລ້າງຄວາມອຶດຫິວ, ບັນລຸການຄ້ຳປະກັນສະ ບຽງອາຫານແລະປັບປຸງດ້ານໂພຊະນາການແລະສົ່ງເສີມການກະສິກຳແບບຍືນຍົງ;  ຮັບປະກັນການມີສຸຂະພາບທີ່ດີແລະສົ່ງເສີມຊີວິດການເປັນຢູ່ທີ່ດີຂອງທຸກຄົນທຸກເກນອາຍຸ; ຮັບປະກັນການສຶກສາທີ່ມີຄຸນນະພາບ, ເທົ່າທຽມກັນແລະທົ່ວເຖີງແລະສົ່ງເສີມກາລະໂອກາດໃນການຮຽນຮູ້ຕະຫຼອດຊີວິດສຳລັບໝົດທຸກຄົນ; ບັນລຸຄວາມສະເໝີພາບລະຫວ່າງຍິງ-ຊາຍ, ສ້າງຄວາມເຂັ້ມແຂງໃຫ້ແກ່ແມ່ຍິງແລະເດັກຍິງທຸກຄົນ; ຮັບປະກັນໃຫ້ມີນ້ຳໃຊ້ແລະການບໍລິຫານນ້ຳແບບຍືນຍົງແລະສຸຂະອະນາໄມສຳລັບໝົດທຸກຄົນ; ຮັບປະກັນການເຂົ້າເຖີງພະລັງງານທີ່ທັນສະໄໝ, ຍືນຍົງ, ເຊື່ອຖືໄດ້ແລະລາຄາບໍ່ແພງສຳລັບໝົດທຸກຄົນ; ສົ່ງເສີມການຂະຫຍາຍຕົວທາງດ້ານເສດຖະກິດທີ່ຕໍ່ເນື່ອງ, ທົ່ວເຖີງແລະຍືນຍົງ, ການມີວຽກເຮັດງານທຳທີ່ມີປະສິດທິຜົນແລະເຕັມສ່ວນແລະວຽກທີ່ມີຄຸນຄ່າສຳລັບໝົດທຸກຄົນ;

  ສ້າງພື້ນຖານໂຄງລ່າງທີ່ໝັ້ນຄົງທົນທານ, ສົ່ງເສີມການຫັນເປັນອຸດສາຫະກຳແບບຍືນຍົງແລະທົ່ວເຖີງແລະສົ່ງເສີມນະວັດຕະກຳ; ຫຼຸດຜ່ອນຄວາມບໍ່ສະເໝີພາບຢູ່ພາຍໃນປະເທດແລະລະຫວ່າງປະເທດ;

  ສ້າງຕົວເມືອງແລະທີ່ພັກພາອາໃສຂອງປະຊາຊົນໃຫ້ທົ່ວເຖີງ, ປອດໄພ, ໝັ້ນຄົງທົນທານແລະຍືນຍົງ; ຮັບປະກັນຮູບແບບການອຸປະໂພກບໍລິໂພກ ແລະການຜະລິດໃຫ້ມີຄວາມຍືນຍົງ;  ເອົາມາດຕະການອັນຮີບດ່ວນເພື່ອແກ້ໄຂບັນຫາການປ່ຽນແປງດິນຟ້າອາກາດແລະຮັບມືຜົນກະທົບຈາກບັນຫາດັ່ງກ່າວ; ອະນຸລັກແລະຊົມໃຊ້ມະຫາສະມຸດ, ທະເລແລະຊັບພະຍາກອນທາງທະເລແບບຍືນຍົງເພື່ອການພັດທະນາແບບຍືນຍົງ; ປົກປ້ອງ, ຟື້ນຟູແລະສົ່ງເສີມການນຳໃຊ້ລະບົບນິເວດແບບຍືນຍົງ, ຄຸ້ມຄອງປ່າໄມ້ແບບຍືນຍົງ, ຕ້ານການກາຍເປັນທະເລຊາຍ, ຢຸດຕິແລະຟື້ນຟູການເສື່ອມໂຊມຂອງດິນແລະຢຸດການສູນເສຍຊີວະນາໆພັນ; ສົ່ງເສີມໃຫ້ສັງຄົມມີຄວາມສະຫງົບສຸກແລະກວມລວມເພື່ອການພັດທະນາແບບຍືນຍົງ, ໃຫ້ທຸກຄົນສາມາດເຂົ້າເຖີງຄວາມຍຸຕິທຳແລະສ້າງສະຖາບັນມີປະສິດທິພາບ, ມີຄວາມຮັບຜິດຊອບແລະທົ່ວເຖີງໃນທຸກລະດັບ ແລະ ການສ້າງຄວາມເຂັ້ມແຂງໃຫ້ແກ່ການຈັດຕັ້ງປະຕິບັດແລະຟື້ນຟູການເປັນຄູ່ຮ່ວມສາກົນເພື່ອການພັດທະນາແບບຍືນຍົງ; ພ້ອມນັ້ນ ລັດຖະບານ ສປປ ລາວ ຍັງໄດ້ຮັບຮອງເອົາເປົ້າຫມາຍການພັດທະນາແບບຍືນຍົງທີ 18“ຊີວິດທີ່ປອດໄພຈາກລະເບີດທີ່ຍັງບໍ່ທັນແຕກ” ຢ່າງເປັນທາງການໃນວັນທີ 7 ກັນຍາ 2016 ທີ່ຫໍປະຊຸມແຫ່ງຊາດ ເຊິ່ງເປັນການສານຕໍ່ຄວາມພະຍາຍາມຈັດຕັ້ງປະຕິບັດເປົ້າຫມາຍສະຫັດສະຫວັດດ້ານການພັດທະນາ ທີ 9ກ່ຽວກັບການແກ້ໄຂຜົນກະທົບຂອງລະເບີດທີ່ຍັງບໍ່ທັນແຕກໃຫ້ໄດ້ຮັບຜົນ.