ນາຍົກຊີ້ຈະໃຊ້ມາດຕະການເດັດຂາດຕໍ່ຜູ້ລະເມີດວິໄນການເງິນ

           ນາຍົກລັດຖະມົນຕີ ທອງລຸນ ສີສຸລິດ, ໄດ້ຢືນຢັນຕໍ່ສະພາແຫ່ງຊາດ ເມື່ອບໍ່ດົນມານີ້ວ່າ: ລັດຖະ ບານຈະສືບຕໍ່ຈັດຕັ້ງປະຕິບັດມາດຕະການຕ່າງໆຕໍ່ຜູ້ລະເມີດວິໄນແຜນການ-ການເງິນຢ່າງເດັດ ຂາດ, ພ້ອມຈະນໍາໃຊ້ສື່ມວນຊົນຊ່ວຍອີກແຮງໜຶ່ງເພື່ອຕິດຕາມກວດກາການເຄື່ອນໄຫວວຽກງານຂອງບັນດາຂະແໜງການຕ່າງໆ ແລະ ຄວາມບໍ່ໂປ່ງໃສຂອງສະມາຊິກພັກພະນັກງານ.

            ທ່ານນາຍົກລັດຖະມົນຕີ ກ່າວວ່າ: ການລະເມີດວິໄນແຜນການ-ການເງິນ ແມ່ນບັນຫາເຄັ່ງ ຮ້ອນໃນປັດຈຸບັນ ອັນໄດ້ສົ່ງຜົນກະທົບບໍ່ດີຫລາຍດ້ານຕໍ່ເສດຖະກິດ ແລະ ການພັດທະນາປະເທດ, ຖ້າບໍ່ຮີບຮ້ອນແກ້ໄຂໂດຍໄວແມ່ນຈະເປັນໄພອັນຕະລາຍຮ້າຍແຮງ ຄື: ໃນ

ໄລຍະ 6 ເດືອນຜ່ານມາ, ລັດ ຖະບານກໍໄດ້ເອົາໃຈໃສ່ຕໍ່ບັນຫາດັ່ງກ່າວ ແລະ ໄດ້ອອກຄຳສັ່ງວ່າດ້ວຍການຈັດຕັ້ງຜັນຂະຫຍາຍມະຕິກອງປະຊຸມເປີດກວ້າງວຽກງານກວດສອບປະຈຳປີ 2015 ເພື່ອເນັ້ນໃຫ້ບັນດາຂະແໜງການ ແລະ ທ້ອງຖິ່ນຈັດຕັ້ງປະຕິບັດ, ພ້ອມທັງໄດ້ມອບໃຫ້ອົງການກວດກາລັດຖະບານສົມທົບກັບອົງການທີ່ຄຸ້ມຄອງເປົ້າໝາຍຖືກກວດສອບແກ້ໄຂຂໍ້ຄົງຄ້າງບົນພື້ນຖານລະບຽບກົດໝາຍໃຫ້ເຂັ້ມງວດ ແລະ ຈະສືບຕໍ່ເພີ່ມທະວີຄວາມເດັດຂາດໃນການຈັດຕັ້ງປະຕິບັດລະບຽບກົດໝາຍ ແລະ ວິໄນແຜນການ-ການເງິນ ໂດຍຈະເລັ່ງໃສ່ບາງມາດຕະການຄື: ພາຍຫລັງກອງປະຊຸມສະພາແຫ່ງຊາດເທື່ອນີ້ໄດ້ມີມະຕິຮັບຮອງເອົາຜົນການກວດສອບຂອງອົງການກວດສອບແຫ່ງລັດແລ້ວ, ລັດຖະບານຈະຮີບຮ້ອນຊີ້ນຳໃຫ້ຂະແໜງການ ແລະ ທ້ອງຖິ່ນຈັດຕັ້ງປະຕິບັດຜົນການກວດສອບຢ່າງເຂັ້ມງວດ ແລະ ສ້າງກົນໄກເພື່ອຕິດຕາມ-ກວດກາການຈັດຕັ້ງປະຕິບັດໃຫ້ລະອຽດ, ແທດເຖິງຕົວຈິງ ແລະ ສາມາດປະຕິບັດໄດ້, ໂດຍຈະມອບໃຫ້ຂະແໜງການກ່ຽວຂ້ອງຄົ້ນຄວ້າສ້າງ ແລະ ປັບປຸງນິຕິກຳຈຳນວນໜຶ່ງທີ່ເຫັນວ່າບໍ່ສອດຄ່ອງກັບສະພາບການໃໝ່ ເປັນຕົ້ນ: ນິຕິກຳກ່ຽວກັບການຄຸ້ມຄອງລາຍຮັບວິຊາການ, ການນຳໃຊ້ເງິນເກີນແຜນ, ການກຳນົດລະດັບເງິນແຮ ແລະ ເງິນສົດຄ້າງຄັງ ເພື່ອໃຫ້ຫົວໜ່ວຍງົບປະມານສາມາດນຳໃຊ້ເຂົ້າໃນວຽກງານທີ່ຈຳເປັນ ແລະ ຮີບດ່ວນໃຫ້ຄ່ອງຕົວ, ຈະສຸມໃສ່ການຈັດຕັ້ງປະຕິບັດການກວດກາໂຄງການລົງທຶນຂອງລັດແຕ່ຫົວທີ ແລະ ເປັນລະບົບປົກກະຕິຕາມດຳລັດທີ່ໄດ້ປະກາດໃຊ້ແລ້ວ, ນຳໃຊ້ລະບົບເຕັກໂນໂລຊີ ເພື່ອເກັບກຳຂໍ້ມູນຂ່າວສານທັນສະໄໝ (ໄອທີ) ເຂົ້າໃນການຈັດເກັບລາຍຮັບ ແລະ ການຊຳລະສະສາງຜ່ານລະບົບທະນາຄານໃຫ້ຫລາຍຂຶ້ນ ເພື່ອຈຳກັດຊ່ອງຫວ່າງ, ສ້າງຄວາມໂປ່ງໃສ ແລະ ສາມາດກວດສອບໄດ້ໃນຂະບວນການຄຸ້ມຄອງການເກັບລາຍຮັບ ແລະ ການຊຳລະສະສາງງົບປະມານ, ຈະຊຸກຍູ້ໃຫ້ອົງການຈັດຕັ້ງມະຫາຊົນ, ອົງການຈັດຕັ້ງທາງສັງຄົມ, ສື່ມວນຊົນ ແລະ ທຸກຊັ້ນຄົນໃນສັງຄົມມີສ່ວນຮ່ວມໃນການຕິດຕາມ-ກວດກາປາກົດການຫຍໍ້ທໍ້ຕ່າງໆທີ່ເກີດຂຶ້ນໃນຖັນແຖວພະນັກງານລັດຖະກອນ ເພື່ອຫລຸດຜ່ອນ ແລະ ກ້າວໄປເຖິງການແກ້ໄຂປາກົດ ການຫຍໍ້ທໍ້ຕ່າງໆຢ່າງຂາດຕົວ, ຈະສຳຫລວດກວດກາຄວາມຮັບຜິດຊອບທາງດ້ານການເມືອງຂອງຜູ້ສັ່ງການຂອງຫົວໜ່ວຍງົບປະມານທີ່ລະເມີດລະບຽບການເງິນ-ງົບປະມານແຫ່ງລັດ, ຊຸກຍູ້ໃຫ້ການ ຈັດຕັ້ງພັກຮາກຖານ, ສະມາຊິກສະພາແຫ່ງຊາດ, ສະພາປະຊາຊົນແຂວງຍົກສູງຄວາມຮັບຜິດຊອບໃນການຕິດຕາມ-ກວດກາໃຫ້ຂໍ້ມູນ ແລະ ສະຫລຸບລາຍງານການກະທຳຜິດຕໍ່ວິໄນແຜນການ-ການເງິນ ເພື່ອໃຫ້ການຕັກເຕືອນ, ຕຳນິສົ່ງຂ່າວຢ່າງສ້າງສັນ, ຈະປະຕິບັດລະບຽບວິໄນຢ່າງເຂັ້ມງວດ, ລົງໂທດຕໍ່ຜູ້ລະເມີດລະບຽບກົດໝາຍ ແລະ ເອົາໃຈໃສ່ຕໍ່ວຽກງານນະໂຍບາຍ, ຊຸກຍູ້ສົ່ງເສີມ, ຍ້ອງຍໍ ແລະ ສັນລະເສີນຕໍ່ບຸກຄົນ ແລະ ການຈັດຕັ້ງທີ່ມີຜົນງານໃນການປະຕິບັດລະບຽບການເງິນ-ງົບປະ ມານຢ່າງເຂັ້ມງວດ ແລະ ມີປະສິດທິຜົນ.