ຜູ້ນໍາພັກ-ລັດ ແລະ ຊາວພຸດລາວຮ່ວມໃສ່ບາດບຸນນະມັດສະການພະທາດຫລວງ

            ເຊົ້າວັນທີ 14 ພະຈິກນີ້, ຊຶ່ງກົງກັບມື້ຂຶ້ນ 15 ຄໍ່າເດືອນ 12 ເພັງ,ບັນດາຜູ້ນໍາພັກ-ລັດ, ຊຶ່ງນໍາໂດຍທ່ານເລຂາທິການໃຫຍ່, ປະທານປະເທດ ບຸນຍັງ ວໍລະຈິດ, ທ່ານຮອງປະທານປະເທດ ພັນຄໍາ ວິພາວັນ, ທ່ານນາຍົກລັດຖະມົນຕີ ທອງລຸນ ສີສຸລິດ, ພ້ອມດ້ວຍການນໍາຂັ້ນສູງພັກ-ລັດອີກຫລາຍທ່ານ ແລະ ຊາວພຸດລາວໃນນະຄອນຫລວງວຽງຈັນ ກໍຄືແຂວງຕ່າງໆໄດ້ຮ່ວມພິທີທໍາບຸນໃສ່ບາດໃນມື້ສຸດທ້າຍຂອງງານບຸນນະມັດສະການພະທາດຫລວງປີນີ້ດ້ວຍບັນຍາກາດອັນຟົດຟື້ນຕາມຮີດຄອງປະເພນີ ແລະ ວັດທະນາທໍາອັນດີງາມຂອງຊາດ.

            ພິທີດັ່ງກ່າວ, ໄດ້ມີຂຶ້ນຢູ່ໃນກົມມະລຽນອ້ອມຮອບພະທາດຫລວງ ລວມໄປເຖິງບໍລິເວນເດີ່ນດ້ານນອກຂອງພະທາດກໍມີມວນຊົນຫລາຍໝືນຄົນໄດ້ມາໃສ່ບາດຖວາຍສັງຄະທານແດ່ພະສົງທີ່ມາຈາກເຂດແຂວງຕ່າງໆໃນທົ່ວປະເທດ ແລະ ຕ່າງປະເທດນັບເປັນຈໍານວນຫລາຍພັນອົງທີ່ມາຮ່ວມນະມັດສະການ ແລະ ກາບໄຫວພະທາດຫລວງທີ່ສັກສິດເປັນມິ່ງຂວັນຂອງຊາດລາວ, ຊຶ່ງໜຶ່ງປີມີຄັ້ງໜຶ່ງເພື່ອອຸທິດເຖິງດວງວິນຍານຂອງບັນພະບູລຸດ ແລະ ປະຊາຊົນລາວທີ່ມີຄຸນງາມຄວາມດີ ແລະ ຜົນງານອັນລໍ້າຄ່າໃນການອຸທິດເຫື່ອແຮງ ແລະ ສະຕິປັນຍາຂອງຕົນເຂົ້າໃນການສ້າງ ແລະ ປະຕິສັງ ຂອນອົງພະທາດຈົນສໍາເລັດໃນປີ ຄສ 1566 ແລະ ມາຮອດປັດຈຸບັນອົງພະທາດຫລວງວຽງຈັນໄດ້ກາຍເປັນມິ່ງຂວັນ ແລະ ມໍລະດົກອັນລໍ້າຄ່າທີ່ຊາວລາວທົ່ວທັງປະເທດໄດ້ພ້ອມພາກັນສັກກະລະບູຊາ, ກາບໄຫວ້ສືບທອດກັນມາຮອດເທົ່າທຸກວັນນີ້.

             ໃນຕອນບ່າຍຂອງວັນດຽວກັນ, ຍັງໄດ້ຈັດຕັ້ງການແຂ່ງຂັນຕີຄີ ອັນເປັນປະເພນີທີ່ເຄີຍເຮັດມາ ພາຍຫລັງມື້ສຸດທ້າຍຂອງງານບຸນດັ່ງກ່າວ ລະຫວ່າງຝ່າຍປະຊາຊົນ ແລະ ຝ່າຍລັດຖະບານຢູ່ທີ່ເດີ່ນດ້ານໜ້າພະທາດຫລວງ ເພື່ອຮັດແໜ້ນຄວາມສາມັກຄີ ແລະ ທັງເປັນການປະຕິບັດຕາມຮີດ 12 ຄອງ 14 ທີ່ບັນພະບູລຸດລາວໄດ້ກໍານົດໄວ້ໃຫ້ຕິດພັນກັບບຸນນະມັດສະການພະທາດຫລວງ ແລະ ໃນຕອນຄໍ່າຂອງມື້ດຽວກັນກໍມີພິທີສູດປະລິຕະມົງຄຸນ, ວຽນທຽນ ແລະ ຈູດບັ້ງໄຟດອກເພື່ອສັກກະລະບູຊາພະທາດຫລວງໃຫ້ມີຄວາມຮູ່ງເຮືອງສວຍງາມຢູ່ຄູ່ປະຊາຊົນ ແລະ ຊາດລາວຕະຫລອດຊົ່ວກາລະນານ.