ຜົນສໍາເລັດການຢ້ຽມຢາມສັນຖະວະໄມຕີ ສປປ ລາວ ຢ່າງເປັນທາງການຂອງສະຫາຍເລຂາທິການໃຫຍ່ພັກກອມມູນິດຫວຽດນາມ

           ຕອບສະໜອງຕາມຄຳເຊີນຂອງສະຫາຍ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາ ຊົນລາວ, ສະຫາຍ ຫງວຽນ ຟູ ຈ້ອງ, ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ແລະ ຄະນະຜູ້ແທນຂັ້ນສູງພັກ, ລັດ ສາທາລະນະລັດສັງຄົມນິຍົມຫວຽດນາມ ໄດ້ຢ້ຽມຢາມສັນຖະ ວະໄມຕີສາທາລະນະລັດ ປະຊາທິປະໄຕ ປະຊາຊົນລາວ ຢ່າງເປັນທາງການ ແຕ່ວັນທີ 24-26ພະຈິກ 2016.

          ໃນໄລຍະຢ້ຽມຢາມ, ສະຫາຍເລຂາທິການໃຫຍ່ ຫງວຽນ ຟູ ຈ້ອງ ໄດ້ພົບປະເຈລະຈາກັບສະຫາຍ

ເລຂາທິການໃຫຍ່ ບຸນຍັງ ວໍລະຈິດ ແລກປ່ຽນຄຳຄິດເຫັນກັບສະຫາຍ ທອງລຸນ ສີສຸລິດ ນາຍົກລັດຖະມົນຕີ ແລະ ສະຫາຍ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ຮັບຕ້ອນການເຂົ້າຢ້ຽມຂໍ່ານັບຂອງປະທານສູນກາງແນວລາວສ້າງຊາດ ໄຊສົມພອນ ພົມວິຫານ, ປະທານສະມາຄົມມິດຕະພາບລາວ-ຫວຽດນາມ ວິໄລວົງ ບຸດດາຄໍາ ແລະ ຢ້ຽມຢາມບັນດາສະຫາຍອະດີດການນໍາຂັ້ນສູງພັກ-ລັດລາວ, ຢ້ຽມຢາມ ແລະ ໂອ້ລົມບັນດາພະນັກງານ, ຄູອາຈານ, ນັກສຶກສມະຫາວິທະຍາໄລແຫ່ງຊາດລາວ, ຢ້ຽມຢາມພື້ນຖານເສດຖະກິດ, ວັດທະນະທໍາຈໍານວນໜຶ່ງຢູ່ນະຄອນຫລວງວຽງຈັນ ແລະ ແຂວງບໍລິຄໍາໄຊ.

          ໃນການພົບປະເຈລະຈາ, ແລກປ່ຽນຄຳຄິດຄຳເຫັນໄດ້ດຳເນີນໄປໃນບັນຍາກາດ ທີ່ເຕັມໄປດ້ວຍໄມ ຕີຈິດມິດຕະພາບ, ຄວາມສາມັກຄີພິເສດ ແລະ ເຊື່ອໝັ້ນເຊິ່ງກັນ ແລະ ກັນ, ສອງຝ່າຍ ໄດ້ແຈ້ງໃຫ້ກັນຊາບກ່ຽວກັບສະພາບຂອງແຕ່ລະພັກ, ແຕ່ລະປະເທດໃນການຈັດຕັ້ງປະຕິບັດ ມະຕິກອງປະຊຸມໃຫຍ່ຂອງແຕ່ລະພັກ; ແລກປ່ຽນຄຳຄິດເຫັນກ່ຽວກັບແຜນນະໂຍບາຍ, ມາດຕະການເພື່ອສືບຕໍ່ເຮັດໃຫ້ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ-ຫວຽດ ນາມ ໃຫ້ນັບມື້ໄດ້ຮັບການເສີມຂະຫຍາຍເຂົ້າສູ່ລວງເລິກ, ມີປະສິດທິຜົນ ແລະ ແທດຕົວຈິງ; ພ້ອມກັນນັ້ນສອງຝ່າຍໄດ້ແລກປ່ຽນຄຳຄິດຄຳເຫັນນຳກັນ ກ່ຽວກັບບັນຫາພາກພື້ນ ແລະ ສາກົນ ທີ່ສອງຝ່າຍຕ່າງມີຄວາມສົນໃຈ.

          ສະຫາຍ ເລຂາທິການໃຫຍ່ ຫງວຽນຟູຈ້ອງ ແລະ ເລຂາທິການໃຫຍ່, ປະທານປະເທດ ບຸນຍັງ ວໍລະຈິດ ຊົມເຊີຍຢ່າງຈິງໃຈຕໍ່ຜົນສຳເລັດອັນໃຫຍ່ຫລວງ, ມີຄວາມໝາຍປະຫວັດສາດໃນໄລຍະ 30 ປີ ແຫ່ງການປ່ຽນແປງໃໝ່ຂອງແຕ່ລະປະເທດ, ບັນດາຜົນສຳເລັດທີ່ສຳຄັນ ໃນການຈັດຕັ້ງປະຕິບັດມະຕິກອງປະຊຸມໃຫຍ່ຂອງແຕ່ລະພັກ; ສະແດງຄວາມເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນຳພາຂອງພັກປະຊາຊົນ ປະຕິວັດລາວ ແລະ ພັກກອມມູນິດຫວຽດນາມ, ພາລະກິດປ່ຽນແປງໃໝ່, ປົກປັກຮັກສາ ແລະ ສ້າງສາປະເທດຊາດຢູ່ລາວ ແລະ ຫວຽດນາມ ຈະສືບຕໍ່ຍາດໄດ້ຜົນສຳເລັດໃໝ່, ໃຫຍ່ຫລວງກວ່າເກົ່າ, ສ້າງສາປະເທດລາວ ແລະ ປະເທດຫວຽດນາມ ໃຫ້ນັບມື້ນັບຮັ່ງມີ ເຂັ້ມແຂງ, ສືບຕໍ່ຍົກສູງຖານະບົດບາດຂອງສອງປະເທດຢູ່ໃນ ພາກພື້ນ ແລະ ໃນໂລກ.

          ສອງຝ່າຍສືບຕໍ່ຢືນຢັນວ່າ ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ໂດຍແມ່ນປະທານ ໂຮ່ຈີາມິງ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ເຄົາລົບຮັກ ແລະ ບັນດາການນຳຮຸ່ນຕ່າງໆຂອງສອງພັກ-ລັດ ແລະ ປະຊາຊົນສອງຊາດ ໄດ້ເພີ່ມພູນຄູນສ້າງເປັນມໍລະດົກອັນລໍ້າຄ່າລວມຂອງສອງພັກ, ສອງຊາດ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງແຕ່ລະປະເທດ.

          ສອງຝ່າຍສະແດງຄວາມຂອບໃຈຢ່າງຈິງໃຈຕໍ່ການສະໜັບສະໜູນ ແລະ ຊ່ວຍເຫລືອອັນໃຫຍ່ ຫລວງ, ລ້ຳຄ່າ, ໝົດຈິດໝົດໃຈເຊິ່ງສອງພັກ, ສອງລັດ ແລະ ປະຊາຊົນສອງປະເທດ ມີໃຫ້ແກ່ກັນ ແລະກັນ ໃນຕະຫລອດໄລຍະແຫ່ງການຕໍ່ສູ້ປົດປ່ອຍຊາດ, ທ້ອນໂຮມປະເທດຊາດໃນເມື່ອກ່ອນ ກໍຄື ໃນພາ ລະກິດປ່ຽນແປງໃໝ່, ສ້າງສາພັດທະນາ ແລະ ປົກປັກຮັກສາປະເທດຊາດໃນປັດຈຸບັນ.

          ສອງຝ່າຍສະແດງຄວາມພາກພູມໃຈເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີແບບພິເສດ ແລະ ການຮ່ວມມືຮອບ ດ້ານລະຫວ່າງ ລາວ-ຫວຽດນາມ ສືບຕໍ່ໄດ້ຮັບການປັບປຸງ ແລະ ເສີມຂະຫຍາຍຢ່າງບໍ່ຢຸດຢັ້ງ, ນັບມື້ນັບເຂົ້າສູ່ລວງເລິກ, ແທດຕົວຈິງ ແລະ ມີປະສິດທິຜົນໃນທຸກຂົງເຂດ ໃນທ່າມກາງສະພາບການສາກົນ ແລະ ພາກພື້ນມີການຜັນແປຢ່າງໄວວາ ແລະ ສັບສົນນັ້ນ ການເສີມຂະຫຍາຍສາຍພົວພັນສາມັກຄີທີ່ມີຄວາມໝາຍເປັນຕາຍນີ້ ແມ່ນຄວາມຮັບຜິ ຊອບລວມຂອງສອງພັກ, ສອງລັດ ແລະ ປະຊາຊົນສອງປະເທດ, ເປັນຕົ້ນແມ່ນຄວາມຮັບຜິດຊອບຂອງຄົນລຸ້ນໜຸ່ມ ຕໍ່ກັບປະຫວັດສາດຂອງສອງຊາດ ເພື່ອຮັບປະກັນການພັດທະນາແບບຍືນຍົງຂອງສອງປະເທດ ແລະ ປະກອບສ່ວນຢ່າງຕັ້ງໜ້າເຂົ້າໃນພາລະກິດສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາຢູ່ພາກພື້ນ ແລະ ສາກົນ.

          ສອງຝ່າຍເຫັນດີເປັນເອກະພາບເພີ່ມທະວີການພົວພັນທາງດ້ານການເມືອງ; ຮັກສາບັນດາການພົບປະ, ຢ້ຽມຢາມ, ໄປມາຫາສູ່ກັນຢ່າງເປັນປະຈຳ ລະຫ່ວາງການນຳຂັ້ນສູງຂອງສອງພັກ, ສອງລັດ; ສືບຕໍ່ປັບປຸງ, ບູລະນະ, ຍົກສູງປະສິດທິຜົນຂອງບັນດາກົນໄກການຮ່ວມມື ລະຫວ່າງສອງພັກ, ສອງປະເທດ; ເປີດກວ້າງການຮ່ວມມື, ຊ່ວຍເຫລືອເຊິ່ງກັນ ແລະ ກັນ ລະຫວ່າງບັນດາຄະນະຂອງພັກ, ບັນດາກະຊວງ, ຂະແໜງການ, ກຳມາທິການຂອງສະພາແຫ່ງຊາດ, ແນວໂຮມ, ອົງການ ຈັດຕັ້ງມະຫາຊົນ ແລະ ບັນດາທ້ອງຖິ່ນຂອງສອງປະເທດ; ລົງເລິກການແລກປ່ຽນບົດຮຽນດ້ານທິດສະດີ-ພຶດຕິກຳ, ບົດຮຽນໃນວຽກງານກໍ່ສ້າງພັກ, ກໍ່ສ້າງລະບົບການເມືອງ, ພັດທະນາເສດຖະກິດ-ສັງຄົມ ແລະ ເຊື່ອມໂຍງສາກົນ; ເອົາໃຈໃສ່ວຽກງານກໍ່ສ້າງ, ບຳລຸງພະນັກງານ, ເປັນຕົ້ນແມ່ນພະ ນັກງານການນຳ ແລະ ຄຸ້ມຄອງທຸກຂັ້ນ; ຍູ້ແຮງການໂຄສະນາ, ສຶກສາກ່ຽວກັບມູນເຊື້ອແຫ່ງການພົວພັນພິເສດ ລາວ-ຫວຽດນາມ ໃນຖັນແຖວພະນັກງານ, ສະມາຊິກພັກ ແລະ ປະຊາຊົນຊັ້ນຄົນຕ່າງໆ, ເປັນຕົ້ນແມ່ນຄົນຮຸ້ນໜຸ່ມຂອງສອງປະເທດ; ປະສານສົມທົບກັນເປັນຢ່າງດີ ໃນການຈັດຕັ້ງບັນດາກິດຈະກຳ ເພື່ອສະເຫລີມສະຫລອງວັນສ້າງຕັ້ງສາຍພົວພັນການທູດ ຄົບຮອບ 55 ປີ ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ຄົບຮອບ 40 ປີໃນປີ 2017; ສືບຕໍ່ປະສານສົມທົບໃນການກໍ່ສ້າງບັນດາໂຄງການ ແລະ ບູລະນະບັນດາຮ່ອງຮອຍປະຫວັດສາດກ່ຽວກັບການພົວພັນພິເສດ ລາວ-ຫວຽດນາມ ຢູ່ແຕ່ລະປະເທດ.

          ສອງຝ່າຍ ຢືນຢັນເຖິງຄວາມໝາຍສຳຄັນ ແລະ ເຫັນດີອອກແຮງຊຸກຍູ້, ເປີດກວ້າງ ແລະ ຍົກສູງປະສິດທິຜົນຂອງການຮ່ວມມືໃນຂົງເຂດເສດຖະກິດ, ວັດທະນະທຳ, ສຶກສາ, ວິທະຍາສາດ-ເຕັກ ນິກ ໃນສະພາບແວດລ້ອມແຫ່ງໂລກາພິວັດ ແລະ ການເຊື່ອມໂຍງສາກົນໃນປັດຈຸບັນ; ບົນພື້ນຖານດັ່ງກ່າວນັ້ນ, ສອງຝ່າຍເຫັນດີປະສານສົມທົບໃນການເສີມຂະຫຍາຍ ບັນດາຄວາມອາດສາມາດ ແລະ ທ່າແຮງບົ່ມຊ້ອນຂອງແຕ່ລະປະເທດຢ່າງມີປະສິດທິຜົນ; ຈັດຕັ້ງຜັນຂະຫຍາຍບັນດາຂໍ້ຕົກລົງຂັ້ນສູງ, ບັນດາສັນຍາຮ່ວມມືລະຫວ່າງສອງລັດຖະບານ ແລະ ບັນດາແຜນການຮ່ວມມື ລະຫວ່າງ ບັນດາກະຊວງ, ຄະນະຂອງສູນ ກາງພັກ, ຂະແໜງການ, ທ້ອງຖິ່ນຂອງສອງປະເທດໃຫ້ດີ, ໃນນັ້ນ ໃຫ້ບູລິມະສິດແກ່ການເຊື່ອມຕໍ່ສອງພື້ນຖານເສດຖະກິດ, ເປັນຕົ້ນແມ່ນການເຊື່ອມຕໍ່ດ້ານລະບອບລະບຽບ, ພື້ນຖານໂຄງລ່າງຄົມມະນາຄົມ, ພະລັງງານ, ທ່ອງທ່ຽວ ແລະ ນຳໃຊ້ບັນດາທ່າກຳປັ່ນຂອງຫວຽດ ນາມ ຢ່າງມີປະສິດທິຜົນ. ພ້ອມດຽວກັນນັ້ນ, ສອງຝ່າຍປຶກສາຫາລືກ່ຽວກັບບັນດາມາດຕະການອັນລະອຽດ ເພື່ອຮັບປະກັນຄວາມຄືບໜ້າ ແລະ ຄຸນນະພາບຂອງບັນດາໂຄງການລົງທຶນຂອງຫວຽດ ນາມຢູ່ລາວ, ເພີ່ມບໍລິມາດການແລກປ່ຽນການຄ້າສອງ ສົ້ນ; ຄຸ້ມຄອງ ແລະ ນຳໃຊ້ບັນດາແຫລ່ງທຶນຊ່ວຍເຫລືອຂອງຫວຽດນາມ ໃຫ້ແກ່ລາວ ຢ່າງມີປະສິດທິຜົນ; ຍົກສູງຄຸນນະພາບການຮ່ວມມືໃນຂົງເຂດການສຶກສາ-ກໍ່ສ້າງ ແລະພັດທະນາແຫລ່ງຊັບພະຍາກອນມະນຸດ.

          ສອງຝ່າຍເປັນເອກະພາບ ສືບຕໍ່ອຳນວຍຄວາມສະດວກໃຫ້ແກ່ພົນລະເມືອງຂອງກັນ ແລະ ກັນ ໃນການດຳລົງຊີວິດ, ທຳມາຫາກິນ, ສຶກສາຮໍ່າຮຽນຢູ່ແຕ່ລະປະເທດ ໂດຍສອດຄ່ອງກັບບັນດາຂໍ້ກຳ ນົດ, ກົດໝາຍຂອງແຕ່ລະປະເທດ ແລະ ປະເພນີສາກົນ.

          ສອງຝ່າຍເຫັນດີເປັນເອກະພາບກັນສືບຕໍ່ເພີ່ມທະວີການຮ່ວມມືໃນຂົງເຂດປ້ອງກັນຊາດ, ປ້ອງກັນຄວາມສະຫງົບ ແນໃສ່ຮັບປະກັນສະເຖຍລະພາບທາງດ້ານການເມືອງ, ຄວາມເປັນລະບຽບຮຽບຮ້ອຍ ແລະ ຄວາມສະຫງົບດ້ານສັງຄົມຢູ່ແຕ່ລະປະເທດ; ຈັດຕັ້ງປະຕິບັດບັນດາຂໍ້ຕົກລົງຮ່ວມມື ດ້ານປ້ອງກັນຊາດ, ປ້ອງກັນຄວາມສະຫງົບຢ່າງມີປະສິດທິຜົນ; ເພີ່ມທະວີປະສານງານໃນການຄຸ້ມຄອງ, ສ້າງເສັ້ນຊາຍແດນ ລາວ-ຫວຽດນາມ ໃຫ້ມີສັນຕິພາບ, ມິດຕະພາບ, ການຮ່ວມມື ແລະ ພັດທະນາແບບຢືນຍົງ; ສືບຕໍ່ປະສານສົມທົບໃນການຈັດຕັ້ງປະຕິບັດບັນດາຂໍ້ຕົກລົງຂັ້ນລັດຖະບານ ກ່ຽວກັບການແກ້ໄຂການເຄື່ອນຍ້າຍໄປມາຕາມລຳພັງໃຈ ແລະ ການແຕ່ງງານທີ່ບໍ່ຖືກຕ້ອງຕາມກົດໝາຍຂອງປະຊາຊົນ ໃນເຂດຊາຍແດນຂອງສອງປະເທດ; ປະສານສົມທົບກັນຢ່າງແໜ້ນແຟ້ນໃນການຕ້ານ, ສະກັັດກັ້ນບັນດາອາຊະຍາກຳຂ້າມຊາດ, ເປັນ ຕົ້ນແມ່ນການຄ້າຂາຍເຖື່ອນ ແລະ ການຂົນສົ່ງຢາເສບຕິດ; ສືບຕໍ່ອອກແຮງປະສານສົມທົບກັນໃນການຊອກຄົ້ນຫາ ແລະ ຈັດສົ່ງອັດຖິຂອງທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍຊີວິດຢູ່ລາວ ກັບຄືນປະເທດ.

          ສອງຝ່າຍ ເປັນເອກະພາບແລກປ່ຽນຂໍ້ມູນຂ່າວສານຢ່າງທັນການ ແລະ ປະສານສົມທົບກັນຢ່າງແໜ້ນແຟ້ນໃນເວທີພາກພື້ນ ແລະ ສາກົນ, ເປັນຕົ້ນແມ່ນໃນອົງການສະຫະປະຊາຊາດ, ອາຊຽນ ແລະ ບັນດາກົນໄກການຮ່ວມມືອະນຸພາກພື້ນ ປະກອບສ່ວນເຂົ້າໃນການຮັກສາສະພາບແວດລ້ອມສາກົນທີ່ມີສັນຕິພາບ, ສະເຖຍລະພາບ, ການຮ່ວມມື ແລະ ພັດທະນາໃນພາກພື້ນອາຊີອາຄະເນ ແລະ ໃນໂລກ; ຫວຽດນາມ ຕີລາຄາສູງ ແລະ ຊົມເຊີຍບັນດາການເຄື່ອນໄຫວ ແລະ ຜົນສຳເລັດຂອງ ສປປ ລາວ ໃນການເປັນປະ ທານອາຊຽນ ໃນປີ 2016. ສປປ ລາວ ໄດ້ສະແດງຄວາມຂອບໃຈຢ່າງຈິງໃຈ ຫວຽດນາມ ຕໍ່ການສະໜັບສະໜູນ ແລະ ປະສານງານຢ່າງແໜ້ນແຟ້ນ ເຮັດໃຫ້ ສປປ ລາວ ປະສົບຜົນສຳເລັດໃນໜ້າທີ່ອັນສູງສົ່ງຂອງການເປັນປະທານອາຊຽນ.

          ສອງຝ່າຍເປັນເອກະພາບສືບຕໍ່ເພີ່ມທະວີການຮ່ວມມື, ປະສານສົມທົບຢ່າງແໜ້ນ ແຟ້ນນຳກັນ ແລະ ກັບບັນດາປະເທດ, ບັນດາອົງການຈັດຕັ້ງສາກົນທີ່ກ່ຽວຂ້ອງເພື່ອຄຸ້ມຄອງ, ນຳໃຊ້ແຫລ່ງນ້ຳໃນແມ່ນ້ຳຂອງໃຫ້ມີປະສິດທິຜົນ ແລະ ຍືນຍົງບົນພື້ນຖານແຫ່ງການຮັບປະກັນຜົນປະໂຫຍດຢ່າງກົມ ກຽວຂອງປະຊາຊົົນບັນດາປະເທດຕາມລຳນ້ຳຂອງ; ເພີ່ມທະວີການປະສານສົມທົບກັບກຳປູເຈຍໃນ ການຈັດຕັ້ງປະຕິບັດບັນ ດາເນື້ອໃນຂໍ້ຕົກລົງ ລະຫວ່າງນາຍົກຂອງສາມປະເທດກຳປູເຈຍ, ລາວ ແລະ ຫວຽດນາມ ກ່ຽວກັບສາມຫລ່ຽມພັດທະນາຢ່າງມີປະສິດທິຜົນ.

          ສອງຝ່າຍ ສືບຕໍ່ເນັ້ນເຖິງຄວາມສຳຄັນຂອງການປົກປັກຮັກສາສັນຕິພາບ, ສະເຖຍລະພາບ, ຄວາມສະຫງົບປອດໄພຢູ່ທະເລຈີນໃຕ້ (ຫວຽດນາມ ເອີ້ນວ່າ: ທະເລຕາເວັນອອກ); ເຫັນດີຊຸກຍູ້ການແກ້ໄຂບັນດາຂໍ້ຂັດແຍ້ງໃນທະເລຈີນໃຕ້ ໂດຍສັນຕິວິທີບົນພື້ນຖານກົດໝາຍສາກົນ, ນັບທັງສົນທິສັນຍາຂອງອົງການສະຫະປະຊາຊາດ ກ່ຽວກັບກົດໝາຍທະເລ 1982 ແລະ ປະຕິບັດຖະ ແຫລງການກ່ຽວກັບການປະພຶດຂອງບັນດາຝ່າຍທີ່ກ່ຽວຂ້ອງຢູ່ທະເລຈີນໃຕ້ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ກ້າວໄປສູ່ການບັນລຸຫລັກການ ກ່ຽວກັບການປະພຶດຂອງບັນດາຝ່າຍທີ່ກ່ຽວຂ້ອງໃນທະເລຈີນໃຕ້ (COC) ປະກອບສ່ວນເຂົ້າໃນການປົກປັກຮັກສາສັນຕິພາບ, ສະເຖຍລະພາບ, ການຮ່ວມມື ແລະ ການພັດທະນາຢູ່ໃນພາກພື້ນ ແລະ ໃນໂລກ.

          ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ແລະ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ໄດ້ເປັນສັກຂີພິຍານ ໃນພິທີເຊັນບັນດາເອກະສານຮ່ວມມື ລະຫວ່າງ ສອງປະເທດ: ບົດບັນທຶກຊ່ວຍຈຳວ່າດ້ວຍການຊ່ວຍເຫລືອໂຄງການກໍ່ສ້າງຫໍສະພາແຫ່ງຊາດ; ບົດບັນທຶກຊ່ວຍຈຳວ່າດ້ວຍການຊ່ວຍເຫລືອໂຄງການກໍ່ ສ້າງໂຮງຮຽນມັດທະຍົມສຶກສາໃຫ້ແກ່ແຂວງບໍລິຄຳໄຊ; ຂໍ້ຕົກລົງວ່າດ້ວຍການຮ່ວມມື ລະຫວ່າງ ສູນກາງແນວລາວສ້າງຊາດ ແລະ ຄະນະຂົນຂວາຍປະຊາຊົນສູນກາງພັກກອມມູນິດຫວຽດ ນາມໃນໄລຍະ ປີ 2016-2020; ຂໍ້ຕົກລົງ ລະຫວ່າງ ລັດຖະບານ ສປປ ລາວ ແລະ ສສ ຫວຽດນາມ ວ່າດ້ວຍການ ດັດປັບຂໍ້ຕົກລົງວ່າດ້ວຍ ຍຸດທະສາດການຮ່ວມມື ລາວ-ຫວຽດນາມ ຢູ່ແຂວງຫົວພັນ ແລະ ແຂວງຊຽງຂວາງ, ສປປ ລາວ ຮອດປີ 2020; ຂໍ້ຕົກລົງ ລະຫວ່າງກະຊວງໂຍທາທິການ ແລະ ຂົນສົ່ງ ສປປ ລາວ ແລະ ກະຊວງຄົມມະນາຄົມ ແລະ ຂົນສົ່ງ ສສ ຫວຽດນາມ ວ່າດ້ວຍການສ້າງເສັ້ນທາງດ່ວນວຽງຈັນ-ຮ່າໂນ້ຍ; ຂໍ້ຕົກລົງລະຫວ່າງກະຊວງໂຍທາທິການ ແລະ ຂົນສົ່ງ ສປປ ລາວ ແລະ ກະຊວງຄົມມະນາຄົມ ແລະ ຂົນສົ່ງ ສສ ຫວຽດນາມ ກ່ຽວກັບແຜນການ 5 ປີ (2016-2020) ວ່າດ້ວຍການຈັດຕັ້ງປະຕິບັດ ບົດບັນທຶກກ່ຽວກັບຍຸດທະສາດການຮ່ວມມືດ້ານ ຄົມມະນາຄົມ-ຂົນສົ່ງ ລາວ-ຫວຽດນາມ; ບົດບັນທຶກຊ່ວຍຈຳລະຫວ່າງກະຊວງອຸດສາຫະກຳ-ການຄ້າ ລາວ ແລະ ຫວຽດ ນາມ ວ່າດ້ວຍການສ້າງເວບໄຊຮ່ວມກັນກ່ຽວກັບການ ຮ່ວມມືດ້ານເສດຖະກິດ, ການຄ້າ.

          ສອງຝ່າຍຕີລາຄາສູງຕໍ່ຜົນສຳເລັດອັນຈົບງາມ ແລະ ມີຄວາມໝາຍອັນເລິກເຊິ່ງ ຂອງການຢ້ຽມຢາມສັນຖະວະໄມຕີສປປ ລາວ ຢ່າງເປັນທາງການຂອງສະຫາຍ ຫງວຽນ ຟູ້ ຈ້ອງ, ເລຂາທິ ການໃຫຍ່ຄະນະບໍລິຫານງານສູນກາງພັກກອມມຸນິດຫວຽດນາມ ເຊິ່ງເປັນການປະກອບສ່ວນອັນສຳຄັນເຂົ້າໃນການເຮັດໃຫ້ສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ ນັບມື້ນັບໄດ້ຮັບການເສີມຂະຫຍາຍເຂົ້າສູ່ລວງເລິກ, ແທດຕົວຈິງ ແລະ ມີປະສິດທິຜົນ, ຕອບສະ  ໜອງຕາມຄວາມມຸ່ງມາດປາດຖະໜາຂອງປະຊາຊົນສອງປະເທດ, ເພື່ອສັນຕິພາບ, ສະເຖຍລະພາບ, ການຮ່ວມມື ແລະ ການພັດທະນາໃນພາກພື້ນ ແລະ ໃນໂລກ.

             ເລຂາທິການໃຫຍ່ ຫງວຽນຟູຈ້ອງ ໄດ້ເຊື້ອເຊີນສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ປະທານປະເທດແຫ່ງສາທາລະນະລັດ ປະ ຊາທິປະໄຕປະຊາຊົນລາວ ແລະ ບັນດາສະຫາຍການນຳຂັ້ນສູງຂອງພັກ, ລັດລາວ ໄປຢ້ຽມຢາມຫວຽດນາມໃນເວລາອັນເໝາະສົມ.