ລາວປຶກສາຫາລືການເຂົ້າຫາແຫລ່ງທຶນ

           ໃນວັນທີ 11 ພະຈິກນີ້, ທະນາຄານແຫ່ງ ສປປ ລາວ ແລະ ຫ້ອງວ່າການສຳນັກງານນາຍົກ ລັດຖະມົນຕີ, ໄດ້ຈັດກອງປະຊຸມພົບປະລະຫວ່າງຂະແໜງການທະນາຄານກັບພາກທຸລະກິດລາວ ເພື່ອປຶກສາຫາລືກ່ຽວກັບຂໍ້ສະດວກ ແລະ ຂໍ້ຫຍຸ້ງຍາກໃນການເຂົ້າເຖິງແຫລ່ງທຶນຂອງພາກທຸລະກິດໃນໄລຍະຜ່ານມາ ແລະ ປັບປຸງກົນໄກໃຫ້ພາກສ່ວນດັ່ງກ່າວສາມາດເຂົ້າເຖິງແຫລ່ງທຶນໄດ້ສະດວກຂຶ້ນ ເພື່ອເປັນການກະຕຸກຊຸກຍູ້ໃຫ້ເສດຖະກິດຂອງປະເທດໄດ້ເຕີບໃຫຍ່ຂະຫຍາຍໂຕໄປເທື່ອລະກ້າວ, ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ມີຜູ້ວ່າການທະນາຄານແຫ່ງ ສປປ

ລາວ, ສະມາຄົມນັກທຸລະກິດລາວ ແລະ ສະພາການຄ້າ-ອຸດສາຫະກຳແຫ່ງຊາດ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນຈໍານວນຫລາຍ.

           ທ່ານຮອງນາຍົກລັດຖະມົນຕີ ກ່າວວ່າ: ການພັດທະນາເສດຖະກິດຂອງປະເທດເຮົາໃນໄລຍະຜ່ານມາເຫັນວ່າຕະຫລາດເງິນ ກໍຄືຂະແໜງການທະນາຄານ ໄດ້ປະກອບສ່ວນສຳຄັນໃນການຊຸກຍູ້ທຸກພາກສ່ວນເສດຖະກິດ, ໂດຍການສະໜອງສິນເຊື່ອນັບຕັ້ງແຕ່ການກໍ່ສ້າງພື້ນຖານໂຄງລ່າງ, ພາກອຸດສາຫະກຳ-ກະສິກຳ, ພາກການຄ້າ ແລະ ທຸລະກິດຂະໜາດນ້ອຍແບບຄອບຄົວໄດ້ເປັນຢ່າງດີ. ແຕ່ຄຽງຄູ່ກັນນັ້ນກໍຍັງເຫັນວ່າມີບາງຫົວໜ່ວຍທຸລະກິດທັງພາກລັດ ແລະ ເອກະຊົນ ຍັງພົບກັບຄວາມຫຍຸ້ງຍາກໃນການເຂົ້າຫາແຫລ່ງທຶນທະ ນາຄານ ຍ້ອນຍັງບໍ່ມີເງື່ອນໄຂພຽງພໍທີ່ຈະເຂົ້າຫາແຫລ່ງທຶນຂອງທະນາຄານຢ່າງຄົບຖ້ວນ, ເນື່ອງຈາກການກູ້ຍືມຈາກທະນາຄານຈະຕ້ອງໄດ້ປະຕິບັດຕາມລະ ບຽບ ແລະ ຫລັກການຢ່າງເຂັ້ມງວດເຊັ່ນ: ຕ້ອງມີຫລັກຊັບຄ້ຳປະກັນ, ບັນດາບໍລິສັດມີບັນຊີຖືກຕ້ອງ, ມີການກວດສອບ ແລະ ຕ້ອງເສຍພັນທະຄ່າທຳນຽມຕ່າງໆໃຫ້ຄົບຖ້ວນ. ສະນັ້ນ, ກອງປະຊຸມຄັ້ງນີ້ຈຶ່ງເປັນໂອກາດທີ່ດີສໍາລັບ ຂະແໜງການກ່ຽວຂ້ອງຈະໄດ້ປຶກສາຫາລືຮ່ວມກັນ, ຊອກຫາວິທີທາງອອກທີ່

ເໝາະສົມກັບທຸກພາກສ່ວນເພື່ອເຮັດໃຫ້ບັນດາຫົວໜ່ວຍທຸລະກິດຂອງປະເທດເຮົາມີຄວາມເຂັ້ມແຂງ ແລະ ເປັນກຳລັງແຮງອັນເປັນພື້ນຖານທີ່ໜັກແໜ້ນໃຫ້ແກ່ການພັດທະນາເສດຖະກິດ-ສັງຄົມຂອງປະເທດ ແລະ ສາມາດແຂ່ງຂັນກັບພາກພື້ນ ແລະ ສາກົນໄດ້.