ລັດຖະບານຈະດຳເນີນມາດຕະການເດັດຂາດຕໍ່ຜູ້ຈຳໜ່າຍສິນຄ້າປອມແປງ

          ໃນໂອກາດຊີ້ແຈງຕໍ່ກອງປະຊຸມສະພາແຫ່ງຊາດກ່ຽວກັບການຄຸ້ມຄອງຄວາມປອດໄພຈາກການຊົມໃຊ້ສິນຄ້າອຸປະໂພກ-ບໍລິໂພກ ທີ່ມີຜົນກະທົບໄວຕໍ່ຊີວິດການເປັນຢູ່ຂອງປະຊາຊົນເປັນຕົ້ນ ສິນຄ້າທີ່ການປົນເປື້ອນສານເຄມີ, ສິນຄ້າປອມແປງ, ສິນຄ້າເສຍຄຸນ ແລະ ອື່ນໆ ທີ່ສັງຄົມຍັງມີຄວາມເປັນຫວ່ງຕໍ່ຄວາມປອດໄພ, ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ຊີ້ແຈງວ່າ: ໃນຖານະເປັນເຈົ້າການຮັບຜິດຊອບວຽກງານປົກປ້ອງຜູ້ຊົມໃຊ້, ຈະສືບຕໍ່ຈັດຕັ້ງປະຕິບັດ ປັບປຸງການປະສານສົມທົບກັບຂະແໜງການຕ່າງໆ ເພື່ອສ້າງເປັນຈຸດປະສານງານໃນການປົກປ້ອງຜູ້ຊົມໃຊ້ ກໍຄືການແກ້ໄຂຄຳຮ້ອງທຸກ ຫລື ຂໍ້ຂັດແຍ່ງຕ່າງໆ ລະຫວ່າງຜູ້ຊົມໃຊ້ ແລະ ຜູ້ສະໜອງສິນຄ້າ ແລະ ການບໍລິການໃຫ້ມີປະສິດທິຜົນຂຶ້ນກວ່າເກົ່າ, ຄົ້ນຄວ້າສ້າງລະບຽບການ, ອອກນິຕິກຳອັນລະອຽດເພີ່ມຕື່ມ ເພື່ອຜັນ

ຂະຫຍາຍເນື້ອໃນກົດໝາຍວ່າດ້ວຍການປົກປ້ອງຜູ້ຊົມໃຊ້ເພື່ອເປັນບ່ອນອີງໃນການຈັດຕັ້ງປະຕິບັດວຽກ ງານປົກປ້ອງຜູ້ຊົມໃຊ້ເປັນຕົ້ນ: ຂໍ້ຕົກລົງ, ຄຳສັ່ງ ຫລື ແຈ້ງການເພື່ອປົກປ້ອງກ່ຽວກັບການໂຄສະນາສິນຄ້າ ແລະ ສັນຍາຕ່າງໆ, ເພີ່ມທະວີການປະສານງານກັບບັນດາຂະແໜງການທີ່ກ່ຽວຂ້ອງໃນການລົງຊຸກຍູ້, ຕິດຕາມກວດກາການຜະລິດ, ນຳເຂົ້າສິນຄ້າເຄື່ອງຂອງ, ການຈຳໜ່າຍສິນຄ້າຢູ່ຕາມທ້ອງຕະຫລາດ ແລະ ສະຖານທີ່ໃຫ້ການບໍລິການຕ່າງໆ, ດຳເນີນມາດຕະການເດັດຂາດກັບຜູ້ຈຳໜ່າຍສິນຄ້າທີ່ບໍ່ຕິດສະຫລາກ ດ້ວຍການປັບໃໝ ແລະ ການຢຶດສິນຄ້າ, ເພີ່ມທະວີຍົກລະດັບຄວາມສາມາດຂອງເຈົ້າໜ້າທີ່ກວດກາການຄ້າ ເພື່ອເຮັດວຽກງານປົກປ້ອງໃຫ້ມີປະສິດທິພາບ, ດຳເນີນການໂຄສະນາວຽກງານປົກປ້ອງຜູ້ຊົມໃຊ້ໃຫ້ກວ້າງຂວາງດ້ວຍການນຳໃຊ້ສື່ຕ່າງໆ, ພ້ອມນີ້ ໃນອານະຄົດ ຈະມີການຊຸກຍູ້ການສ້າງຕັ້ງສະມາຄົມຜູ້ຊົມໃຊ້, ໂດຍຈະອາໃສສະມາຄົມດັ່ງກ່າວ ຊ່ວຍໃນການເປັນຫູເປັນຕາ ແລະ ກ່າວຟ້ອງຜູ້ລະເມີດການປົກປ້ອງຜູ້ຊົມໃຊ້. ນອກນີ້ ຍັງໄດ້ຂໍຄວາມຮ່ວມມືກັບສະມາຊິກສະພາແຫ່ງຊາດ, ສະພາທ້ອງຖິ່ນຊ່ວຍໂຄສະນາໃຫ້ຜູ້ບໍລິໂພກຮັບຮູ້ສິດໃນການປົກປ້ອງຕົນເອງ, ໂດຍການຮ້ອງຟ້ອງຕໍ່ເຈົ້າໜ້າທີ່ປາບປາມຜູ້ລະເມີດນຳອີກ.

          ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ກ່າວວ່າ: ການປົກປ້ອງຜູ້ຊົມໃຊ້ແມ່ນການປົກປ້ອງສິດ ແລະ ຜົນປະໂຫຍດ ອັນຊອບທຳຂອງຜູ້ຊົມໃຊ້ທາງດ້ານຊີວິດ, ສຸຂະພາບ ແລະ ຊັບສິນ ໄປຄຽງຄູ່ກັບການສົ່ງເສີມການຜະລິດ, ການນຳເຂົ້າ ແລະ ການຈຳໜ່າຍສິນຄ້າ ແລະ ການບໍລິການໃຫ້ມີຄຸນນະພາບ ແລະ ໄດ້ມາດຕະຖານຕາມທີ່ຂະແໜງການທີ່ກ່ຽວຂ້ອງໄດ້ກຳນົດໄວ້, ໃນນັ້ນ ກະຊວງອຸດສາຫະກຳ ແລະ ການຄ້າ ຍັງໄດ້ເປີດຊ່ອງທາງໃຫ້ຜູ້ຊົມໃຊ້ໄດ້ເຂົ້າເຖິງຂະບວນການແກ້ໄຂບັນຫາທີ່ເກີດຈາກການບໍລິໂພກສິນຄ້າຕ່າງໆໃນສັງຄົມ, ກົມການຄ້າພາຍໃນ ກໍໄດ້ເປີດການນຳໃຊ້ໂທລະສັບສາຍດ່ວນ 1510 ຂຶ້ນໃນເດືອນມີຖຸນາຜ່ານມານີ້, ຊຶ່ງຜູ້ຊົມໃຊ້ສາມາດຮ້ອງທຸກ ຫລື ແຈ້ງຂໍ້ມູນກ່ຽວກັບສິນຄ້າ ແລະ ການບໍລິການ ທີ່ບໍ່ມີຄຸນນະພາບ ແລະ ບໍ່ໄດ້ມາດ ຕະຖານ ແລະ ອື່ນໆ, ມາຮອດປັດຈຸບັນ ໄດ້ມີຜູ້ຮ້ອງທຸກເຂົ້າມາປະມານ 60 ກວ່າສາຍ, ຊຶ່ງສ່ວນໃຫຍ່ແມ່ນກ່ຽວກັບສິນຄ້າອຸປະໂພກໝົດອາຍຸ, ຄ່າບໍລິການທີ່ແພງເກີນໄປ (ຄ່າໄຟຟ້າ, ໂດຍສານ, ບໍລິການໂທລະສັບ ແລະ ລະບົບອິນເຕີເນັດ), ບັນດາຄຳຮ້ອງທຸກເຫລົ່ານັ້ນ ຈຳນວນໜຶ່ງ ກໍໄດ້ຮັບການແກ້ໄຂເປັນທີ່ຮຽບຮ້ອຍແລ້ວ ພ້ອມທັງຢຶດສິນຄ້າ ແລະ ທຳລາຍຖີ້ມ, ແຕ່ບາງກໍລະນີ ກໍຍັງຢູ່ໃນໄລຍະການແກ້ໄຂໂດຍການສົມທົບກັບພາກສ່ວນກ່ຽວຂ້ອງເພື່ອດຳເນີນມາດຕະການຢ່າງຮີບດ່ວນ.