ຕໍາຫລວດຄຳມ່ວນຈັບຜູ້ຄ້າຢາເສບຕິດຕົວອັນຕະລາຍ

ຂ່າວ-ພາບ : ຫນັງສືພິມ ປກສ

            ເຈົ້າໜ້າທີ່ ປກສ ແຂວງຄໍາມ່ວນໃຫ້ຮູ້ວ່າ: ເມື່ອບໍ່ດົນມານີ້ກໍາລັງເຈົ້າໜ້າ ທີ່ຕົນໄດ້ຈັບຕົວທ້າວ ຄອນສີ (ມຶກ) ອາຍຸ 20 ປີຢູ່ບ້ານນາທາມ, ເມືອງເຊບັ້ງໄຟ, ແຂວງຄໍາມ່ວນມາດໍາເນີນຄະດີໃນຂໍ້ຫາຄ້າຂາຍຢາເສບຕິດ, ພ້ອມຂອງກາງຢາບ້າຫລາຍກວ່າ 2 ພັນເມັດ.

             ເຈົ້າໜ້າທີ່ໃຫ້ຮູ້ວ່າ: ການຈັບຕົວຜູ້ຄ້າຂາຍຢາເສບຕິດລາຍນີ້, ເປັນຜົນມາຈາກໄດ້ຮັບແຈ້ງຂອງພົນລະເມືອງດີວ່າຈະມີການເຄື່ອນໄຫວຊື້ຂາຍຢາເສບຕິດຢູ່ເຂດບ້ານໜອງບອນ, ເມືອງເຊບັ້ງໄຟ, ຈຶ່ງໄດ້ຈັດກໍາລັງລົງຕິດຕາມ ແລະ ພົບເຫັນເປົ້າໝາຍຄ້າຂາຍຢາເສບຕິດຂັບລົດຮຸນໄດ ລີໂບໂລ ສີຂາວ ໝາຍເລກທະບຽນ ກຂ 0259 ຄຳມ່ວນ ຈອດຢູ່ແຄມຄອງນ້ຳຊົນລະປະທານເຂດບ້ານໜອງບອນ, ຈຶ່ງໄດ້ກວດຄົ້ນ ແລະ ພົບເຫັນຢາບ້າຈຳນວນດັ່ງກ່າວ, ພ້ອມນໍາຕົວຜູ້ຕ້ອງຫາມາສືບສວນ-ສອບສວນຂະຫຍາຍຜົນຫາຜູ້ຮ່ວມຂະບວນການເພື່ອນໍາຕົວມາດໍາເນີນຄະດີຕາມລະບຽບກົດໝາຍໂດຍໄວ.