ຜູ້ບໍລິໂພກຄວນລະວັງມີຜູ້ສວຍໂອກາດນຳເອົາຊີ້ນຫມູຍ້ອມສານສີແດງເພື່ອມາຕົວະຂາຍວ່າເປັນຊີ້ນງົວ

         ຍ້ອນລາຄາເຄື່ອງບໍລິໂພກ- ອຸປະໂພກ ເພີ່ມສູງຂຶ້ນ ໂດຍສະເພາະປະເພດຊີ້ນງົວ ທີ່ຖີບໂຕຂຶ້ນ ເຖິງ 70 ພັນກີບ/ ກິໂລ ເຮັດໃຫ້ມີແມ່ຄ້າຫົວໃສຈຳນວນຫນຶ່ງທີ່ຫລອກເອົາ ຊີ້ນຫມູຍ້ອມສານສີແດງມາຕົວະ ຂາຍວ່າເປັນຊີ້ນງົວໃຫ້ລູກຄ້າປາກົດການນີ້ພົບແລ້ວ ທີ່ຕະຫລາດເທດສະບານແຂວງສະຫວັນນະເຂດ.

        ຫລັງຈາກມີຫາງສຽງຈາກສັງຄົມກ່ຽວກັບບັນຫາດັ່ງກ່າວ, ມາໃນວັນທີ 19 ມີນາ 2013 ເຈົ້າຫນ້າທີ່ ແລະ ວິຊາການ ຈາກຂະແຫນງການກ່ຽວຂ້ອງຄືອຸດສາຫະກຳ ແລະ ການ ຄ້າ, ກະສິກຳ ແລະ ປ່າໄມ້, ສາທາລະນະສຸກ ແລະ ພະແນກວິທະ ຍາສາດເຕັກໂນໂລຊີ ແລະ ສິ່ງແວດລ້ອມພ້ອມດ້ວຍສື່ມວນຊົນຈຳນວນຫນຶ່ງລົງກວດກາຕະຫລາດສະຫວັນໄຊ ເຊິ່ງເປັນ ຕະຫລາດໃຫຍ່ໃຈກາງເທສະບານແຂວງສະຫວັນນະເຂດເພື່ອຕິດຕາມບັນຫາແມ່ຄ້າເອົາຊີ້ນ ຫມູຍ້ອມສານສີແດງມາຕົວະຂາຍ ເປັນຊີ້ນງົວນອກນັ້ນແລ້ວກໍຍັງໄດ້ຕິດຕາມເບິ່ງມາດຕະຖານຂອງຕາຊິງ, ການແນະນຳແມ່ຄ້າ ແລະ ຜູ້ບໍລິໂພກກ່ຽວກັບການຊື້ ຂາຍຊີ້ນຫມູຍ້ອມສານສີແດງ ແລະ ການຕິດປ້າຍລາຄາເປັນຕົ້ນ.

      ທ່ານ ຄຳມາຍ ແກ້ວວິໄລຫົງ ຫົວຫນ້າຂະແຫນງການຄ້າພາຍໃນໃຫ້ສຳພາດຕໍ່ນັກຂ່າວວ່າ: ສຳລັບການປະຕິບັດຫນ້າ ທີ່ປົກປ້ອງຄຸ້ມຄອງຜູ້ຊົມໃຊ້ແມ່ນໄດ້ສົມທົບກັບພາກສ່ວນທີ່ກ່ຽວຂ້ອງລົງກວດກາຢ່າງເລັ່ງດ່ວນຢູ່ຕາມບັນດາຮ້ານຂາຍຊີ້ນເຫັນວ່າໄດ້ມີການວາງຂາຍຊີ້ນງົວ ແລະ ຊີ້ນຫມູປົນກັນຊຶ່ງການ ລົງຄັ້ງນີ້ສາມາດພົບຜູ້ກະທຳຜິດ ແລະ ໄດ້ເຮັດບົດບັນທຶກຈຳນວນ 2 ຮ້ານ

ພ້ອມທັງມີການກ່າວຕັກເຕືອນແຕ່ຖ້າຫາກວ່າມີການກະທຳຜິດໃນຄັ້ງຕໍ່ໄປຈະມີການປັບໃຫມຍຶດ ແລະ ເອົາສິນຄ້າດັ່ງ ກ່າວໂອກາດນີ້, ກໍຮຽກຮ້ອງໃຫ້ທຸກພາກສ່ວນເປັນເຈົ້າການຮ່ວມກັນໂດຍຜູ້ຂາຍກໍຄວນມີຄວາມຊື່ສັດຈິງໃຈຕໍ່ລູກຄ້າ, ເອົາໃຈ ໃສ່ໃນການປະຕິບັດຕາມລະບຽບການຕ່າງໆທີ່ວາງອອກຢ່າງເຄັ່ງຄັດສ່ວນຜູ້ບໍລິໂພກກໍຕ້ອງບໍ່ມັກງ່າຍຈະຕ້ອງໄດ້ມີການສອບ ຖາມ ແລະ ກວດສອບໃຫ້ແນ່ໃຈວ່າຊີ້ນທີ່ຕົນຊື້ນັ້ນແມ່ນຊີ້ນປະເພດໃດກັນແທ້ທັງນີ້ກໍເພື່ອຫລີກເວັ້ນຈາກການ ຖືກເອົາປຽບ ໄດ້. ນອກຈາກນີ້ ຖ້າຫາກໃຜພົບເຫັນມີການກະທຳຜິດ ແລະ ແຈ້ງມາຫາເຈົ້າຫນ້າທີ່ພວກເຮົາກໍມີລາງວັນມອບໃຫ້ ແກ່ຜູ້ບອກ ເບາະແສນຳອີກ. 

            ສຳລັບຂໍ້ສັງເກດທີ່ຈະບົງບອກໃຫ້ເຮົາຮູ້ວ່າເປັນຊີ້ນຫມູຍ້ອມສານສີແດງນັ້ນ ທ່ານ ບຸນເລື່ອງ ສີຫາຈັກ ວິຊາການ ຂະແຫນງລ້ຽງສັດ ແລະ ການປະມົງ ບອກວ່າ: ຖ້າເປັນຊີ້ນຫມູຍ້ອມສານສີແດງ ເມື່ອເອົາມືລູບຊີ້ນມັນຈະມັນໆ, ເສັ້ນຊີ້ນ ນ້ອຍ ແລະ ບໍ່ມີໄຂມັນແຊກ ( ຊີ້ນງົວເສັ້ນຊີ້ນຈະໃຫຍ່ ແລະ ມີໄຂມັນແຊກ ), ອີກຂໍ້ ສັງເກດສຳຄັນຫນຶ່ງແມ່ນການດົມຈະ ເຮັດໃຫ້ເຮົາຮູ້ງ່າຍກວ່າຄືຖ້າຊີ້ນຫມູມັນຈະກຸຍ ແລະ ສາບສ່ວນຊີ້ນງົວຈະຫອມກວ່າ. 

      ມາໃນປັດຈຸບັນລາຄາຊີ້ນຫມູຢູ່ຕາມທ້ອງຕະຫລາດເທສະບານແຂວງສະຫວັນນະເຂດ ແມ່ນຢູ່ທີ 35 ພັນກີບ/ ກິໂລ, ສ່ວນ ລາຄາຊີ້ນງົວແມ່ນ 70 ພັນກີບ/ ກິໂລ.