ວາງສີລາເລີກໂຄງການກໍ່ສ້າງພພິທະພັນບູລະນະເຂດຮ່ອງຮອຍປະຫວັດສາດຢູ່ເມືອງວຽງໄຊ

    ພິທີວາງສີລາເລີກໂຄງການກໍ່ ສ້າງຫໍພິພິທະພັນ ແລະ ບູລະນະ ເຂດຮ່ອງຮອຍປະ ຫວັດສາດຖ້ຳ ຜາແດງ ຢູ່ເມືອງວຽງໄຊ ແຂວງ ຫົວພັນ ໄດ້ມີຂຶ້ນໃນວັນທີ 15 ມີ ນານີ້ ໂດຍເປັນກຽດເຂົ້າຮ່ວມ ຂອງທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສປປ ລາວ, ທ່ານ ຫງວຽນເຕີນຢຸງ ນາ ຍົກລັດຖະມົນຕີ ແຫ່ງ ສສ ຫວຽດ ນາມ, ມີລັດຖະມົນຕີວ່າການ, ຊ່ວຍວ່າການ ແລະ ພາກສ່ວນທີ່ກ່ຽວຂ້ອງທັງສອງ ປະເທດ ລາວ- ຫວຽດນາມ.

    ໂຄງການກໍ່ສ້າງດັ່ງກ່າວ ລວມ ມີເນື້ອທີ່ທັງໝົດ 2.812 ຕາແມັດ ໂດຍມອບໃຫ້ບໍລິສັດຈິດຈະເລີນກໍ່ ສ້າງເປັນຜູ້ຮັບເໝົາ. ແຫລ່ງທຶນໃນການກໍ່ສ້າງແມ່ນທະນາຄານຮ່ວມທຸລະກິດລາວ-ຫວຽດນາມ (LVB) ເປັນຜູ້ຈ່າຍກ່ອນ ໂດຍລັດຖະບານລາວ ຈະທົດແທນໂດຍການຫລັກລົບກັບບັນດາຮ່ວງເງິນພາສີ-ອາກອນ, ຄ່າທຳນຽມ ທີ່ທະນາຄານມອບພັນທະເຂົ້າງົບປະມານ ຂອງລັດຖະບານລາວ ເປັນເວລາ 7 ປີ ແລະ ສົມທົບກັບ ແຫລ່ງທຶນການປະກອບສ່ວນຂອງບັນດາວິສາຫະກິດໃນສະມາ

ຊິກສະມາຄົມທຸລະກິດນັກລົງທຶນຫວຽດນາມຢູ່ລາວ. ໂຄງການນີ້ ເປັນຂີດໝາຍສຳຄັນເລິກເຊິ່ງທາງປະຫວັດສາດ, ວັດທະ ນະທຳ ແລະ ການພັດທະນາເສດຖະກິດ- ສັງຄົມ. ມັນບໍ່ພຽງແຕ່ເປັນການຈາລຶກເຖິງປະຫວັດສາດການຕໍ່ສູ້ອັນຫຍຸ້ງຍາກ ລຳບາກ, ພິລະອາດຫານເທົ່ານັ້ນ, ແຕ່ຍັງເປັນສິ່ງເອກອ້າງທະນົງໃຈ, ເປັນບ່ອນສຶກສາມູນເຊື້ອການປະຕິວັດທີ່ມີຊີວິດຊີ ວາໃຫ້ແກ່ຄົນຮຸ່ນໜຸ່ມທີ່ເກີດໃໝ່ ໃຫຍ່ລຸນໃນສະໄໝສັນຕິພາບນີ້ ທັງເປັນບ່ອນທັດສະນີຍະພາບ ແຫ່ງການທ່ອງທ່ຽວທາງປະ ຫວັດສາດທີ່ສຳຄັນຂອງທ້ອງຖິ່ນ, ປະກອບສ່ວນດຶງດູດໃຫ້ບັນດານັກທ່ອງທ່ຽວທົ່ວໂລກໄດ້ເຂົ້າມາທ່ຽວຊົມ, ຮັບຮູ້ກ່ຽວກັບ ອະດີດແຫ່ງການຕໍ່ສູ້ອັນພິລະອາດຫານຂອງປະຊາຊົນລາວ.