ຜູ້ຮູ້ຈັກບຸນຄຸນຄົນອື່ນດີແນວໃດ ? ( ຄໍລຳ ແລກປ່ຽນຄຳເຫັນ )

ໂດຍ : ສາວເມືອງໂພນ

     ພະທຳຄຳສອນໃນພຸດທະສາສະໜາສອນໃຫ້ທຸກຄົນເປັນຄົນດີ ເພາະຄົນດີຍ່ອມເປັນທີ່ຕ້ອງການຂອງພໍ່ແມ່ ແລະ ສັງຄົມ. ທຸກຍຸກສະໄໝຄົນດີຮູ້ຈັກກະຕັນຍູຈະເຮັດ ໃຫ້ຄອບຄົວ, ສັງຄົມ, ບ້ານເມືອງ ແລະ ປະເທດຊາດຈະເລີນຜູ້ມີຄວາມກະຕັນ ຍູຮູ້ບຸນຄຸນຕໍ່ຜູ້ມີພະຄຸນນັ້ນຖືວ່າເປັນຄົນທີ່ປະເສີດ ແລະ ຈະໄດ້ຮັບຄວາມຮັກ, ການຍ້ອງຍໍສັນລະເສີນຈາກຄອບຄົວ, ຄົນ ອ້ອມຂ້າງ ແລະ ສັງຄົມສະເໝີ.

     ການດຳເນີນຊີວິດຂອງສັດຕ ບຸລຸດ (ຄົນດີ ຫລື ຄົນທີ່ມີສິນທຳ) ເປັນຄົນມີຄວາມຄິດອຸດົມຄະຕິນັ້ນເອງ, ໃນສັງຄົມຄົນທີ່ ມີຄວາມ ກະຕັນຍູຍ່ອມເປັນຜູ້ທີ່ມີຄ່າຂອງ ຫລາຍຄົນ ແລະ ຄົນທັງຫລາຍ ຢາກຢູ່ອ້ອມຂ້າງ, ໃຫ້ລູກ, ຫລານ ແລະ ຄົນທີ່ຕົນ ເອງຮັກມີຄວາມ ກະຕັນຍູຮູ້ບຸນຄຸນ ເພາະເປັນການ ປະຕິບັດທຳອັນຖືວ່າເປັນມຸງຄຸນ ຍິ່ງ ເຊິ່ງມີຢູ່ໃນທຳມະມຸງຄຸນຂໍ້ທີ 25 ທີ່ ພະພຸດທະເຈົ້າໄດ້ກຳນົດໄວ້ ໂດຍເນັ້ນໃຫ້ນຳໄປພັດທະນາຄຸນ ສົມບັດ ຫລື ເປັນຄົນຮູ້ຈັກຕອບ ແທນຜູ້ມີບຸນຄຸນກັບຕົນເອງ ຊີວິດ ກໍຈະປະສົບແຕ່ຄວາມຈະເລີນ ກ້າວໜ້າ ເພາະໃຜກໍຢາກຊຸກຍູ້, ຊ່ວຍຊູຄົນກະຕັນຍູ.

    ຕາມຄວາມເປັນຈິງເພິ່ນຈະສັນ ລະເສີນຜູ້ມີຄວາມກະຕັນຍູ ແລະ ຕຳນິຜູ້ທີ່ບໍ່ຮູ້ຈັກກັບບຸນຄຸນຂອງ ຄົນອື່ນ, ຜູ້ທີ່ເຮົາຄວນ ສະແດງຄວາມກະຕັນຍູຮູ້ບຸນຄຸນຕາມພະ ທຳຄຳສອນແບ່ງອອກເປັນ 6 ຢ່າງຄື 1. ບິດາ-ມານດາ. 2. ຄູບາ ອາຈານ. 3. ພະສົງ-ສຳມະເນນ. 4. ເພື່ອນມິດສະຫາຍ. 5. ຜົວ- ເມຍ. 6. ລູກຈ້າງ-ນາຍຈ້າງ.

    ຜູ້ທີ່ມີຄວາມກະຕັນຍູ ຖ້າເປັນ ລູກກໍຈະເປັນລູກທີ່ດີ, ຮູ້ເຮັດວຽກຊ່ວຍພໍ່ແມ່ຕາມຄວາມສາມາດ, ເປັນລູກທີ່ດີ ບໍ່ຫລິ້ນ ການພະນັນ, ຂີ້ຄ້ານ, ດື່ມສຸລາ, ຢາເສບຕິດ ຕ່າງໆ, ຕັ້ງໃຈຮຽນ ຫລື ປະຕິບັດ ໜ້າທີ່ຕົນໃຫ້ປະສົບຜົນສຳເລັດເມື່ອປະກອບ ອາຊີບສ້າງເປັນຄົນດີເທົ່ານີ້ກໍເປັນການຕອບແທນບຸນຄຸນເພິ່ນແລ້ວ.

    ຜູ້ທີ່ເນລະຄຸນເປັນຄົນທີ່ມີຈິດໃຈແຂງກະດ້າງ, ບໍ່ຍອມຟັງຄວາມໃຜທັງນັ້ນ ເຖິງວ່າເຂົາຄົນ ນັ້ນເຮັດຜິດ, ບໍ່ຖືກ ຫລື ແນະ ນຳ ສິ່ງທີ່ດີໃຫ້ກັບເຂົາ ເຂົາກໍບໍ່ສົນ ໃຈ, ແຕ່ຖ້າເຂົາໄດ້ດີ, ມີຄວາມຈະ ເລີນ, ໄດ້ຮັບຜົນປະໂຫຍດແລ້ວ ກໍຈະບໍ່ສຳນຶກເຖິງບຸນ ຄຸນຄົນທີ່ ຊ່ວຍແນະນຳ, ຊຸກຍູ້ໃຫ້ເຂົາໄປເຖິງຈຸດນັ້ນໄດ້. ຄົນແບບນີ້ບໍ່ຮູ້ຮັກໃຜນອກຈາກໂຕເອງ, ເຂົາບໍ່ມີນ້ຳໃຈຈະຊ່ວຍ ເຫລືອຄົນອື່ນ, ມີແຕ່ຫວັງຜົນປະໂຫຍດຢ່າງດຽວ. ຖ້າເຂົາເປັນນາຍຈ້າງກໍຈະເປັນຄົນທີ່ເອົາປຽບລູກນ້ອງ, ບໍ່ເອົາໃຈລູກ ນ້ອງ ເວລາລູກນ້ອງເຮັດວຽກບໍ່ໄດ້ດັ່ງໃຈກໍຈະຮ້າຍດ່າເມື່ອເຂົາ ຢາກໄດ້ຜົນປະໂຫຍດກໍເຮັດມາເວົ້າດີນຳລູກນ້ອງ ໄດ້ຜົນປະໂຫຍດ ແລ້ວເຂົາກໍບໍ່ຄິດຕອບແທນຫຍັງເລີຍ.

    ດັ່ງນັ້ນ, ຜູ້ອະກະຕັນຍູບໍ່ຮູ້ບຸນ ຄຸນຂອງຄົນອື່ນໆ, ເຖິງວ່າຄົນທີ່ມີພະຄຸນນັ້ນເປັນຜູ້ນ້ອຍ, ໃຫຍ່ກໍຕາມເຂົາຈະບໍ່ໄດ້ຮັບ ຄວາມຮັກແພງ, ເຄົາລົບນັບຖືຈາກຄົນອ້ອມຂ້າງ ແລະ ສັງຄົມເລີຍເພາະຄົນຢູ່ໃນຄອບຄົວທີ່ມີພະຄຸນກັບເຂົາໃຫ້ການຊ່ວຍ ເຫລືອເກືອບໝົດທຸກຢ່າງເຂົາກໍຍັງບໍ່ສຳນຶກໃນບຸນຄຸນເລີຍແລ້ວເຂົາຊິໄປສຳນຶກໃນບຸນຄົນອື່ນແນວໃດ.