ສົກຮຽນ​ໃໝ່ສຶກສາ​ນະຄອນຫຼວງວຽງຈັນ ເນັ້ນຍົກ​ສູງ​ຄຸນນະພາບການສິດສອນໃຫ້ດີຂຶ້ນກວ່າເກົ່າ

            ​ສົກຮຽນ​ໃໝ່​ 2013-2014 ໄດ້ໄຂຂຶ້ນຢ່າງ​ເປັນ​ທາງ​ການ ແລ້ວໃນວັນທີ 2 ກັນຍານີ້,​ ດ້ວຍບັນຍາກາດ​ຟົດຟື້ນກວ່າ​ທຸກໆປີ ຜ່ານມາ ​ໂດຍ​ສະ​ເພາະ​ແມ່ນບັນ ດາ​ນ້ອງ​ນັກຮຽນຕ່າງກໍມີຄວາມ ຕັ້ງໃຈສູງໃນການກ້າວສູ່ສົກຮຽນ ໃໝ່ຂອງຕົນ, ຂະນະທີ່ພະແນກສຶກສາທິການ ແລະ ກິລານະຄອນຫຼວງວຽງຈັນ ກໍໄດ້ວາງເປົ້າໝາຍ ເນັ້ນຂຶ້ນກວາເກົ່າ.

         ສົ​ກຮຽນ 2013-2014 ເປັນ​ສົກ ຮຽນທີ່​ມີ​ຄວາມໝາຍຄວາມ​ສຳຄັນ​ຕໍ່ການ​ພັດທະນາ​ການ​ສຶກສາ ​ແລະ ກິລາ ​ເພາະ​ເປັນ​ໄລຍະ​ແຫ່ງ​ການຈັດຕັ້ງຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່​ຄັ້ງທີ IX ຂອງພັກກໍຄື ການປະຕິບັດແຜນພັດທະນາເສດຖະ ກິດ-ສັງຄົມ 5 ປີ ຄັ້ງທີ VII ແລະ ແຜນພັດທະນາການສຶກສາຂອງກະຊວງສຶກສາທິການ ແລະ ກິລາວາງອອກ, ຊຶ່ງທຽບໃສ່ສົກ ຮຽນຜ່ານມາວຽກງານການສຶກສາໄດ້ມີການຂະຫຍາຍຕົວດີຂື້ນນັບທັງດ້ານປະລິມານ ແລະ ຄຸນນະພາບເຊັ່ນ: ຈຳນວນໂຮງ ຮຽນ, ຫ້ອງຮຽນ, ຄູສອນ ແລະ ນັກຮຽນມີຈຳນວນເພີ່ມຂຶ້ນ, ການສຶກສາໄດ້ຂະຫຍາຍ ໄປສູ່ທ້ອງຖິ່ນເຂດຊົນນະບົດຫ່າງໄກ ສອກຫຼີກ ແລະ ມີຫຼາຍໂຄງການໄດ້ນຳໄປຈັດຕັ້ງປະຕິບັດຢູ່ບັນດາເມືອງ, ບ້ານ ແລະ

ກຸ່ມບ້ານພັດທະນາ ເປັນຕົ້ນການກໍ່ສ້າງ ໂຮງຮຽນແຕ່ລະຊັ້ນ,​ ນັບແຕ່ຊັ້ນອະນຸບານຮອດ ມ ປາຍ ເຊິ່ງເຮັດໃຫ້ຈຳນວນໂຮງຮຽນ, ຫ້ອງຮຽນໄດ້ເພີ່ມຂຶ້ນ ແລະ ໄດ້ເປັນ ເງື່ອນໄຂໃຫ້ແກ່ປະຊາກອນໃນແຕ່ລະກຸ່ມເປົ້າໝາຍມີໂອກາດໄດ້ຮັບການສຶກສາຫຼາຍຂື້ນ.

              ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໄດ້ໃຫ້ສຳ ພາດຕໍ່ ນັກຂ່າວລາວພັດທະນາ ໃນວັນທີ 3 ກັນຍາ ນີ້ ວ່າ:  ສົກຮຽນ 2013-2014 ນີ້ ນະຄອນຫຼວງວຽງຈັນ ຈະເພີ່ມທະວີຍົກສູງ ຄຸນນະພາບການສິດສອນ ຂອງຄູໃຫ້ດີຂື້ນກ່ວາເກົ່າ ເພື່ອສາມາດບັນລຸເປົ້າໝາຍບຸກທະລຸ ດ້ານການພັດທະນາຊັບພະຍາກອນ ມະນຸດຂອງຊາດ ແລະ ສະເພາະສົກຮຽນໃໝ່ນີ້, ນະຄອນຫຼວງວຽງຈັນກຽມຄວາມພ້ອມດີກວ່າທຸກປີຜ່ານມາ, ເປັນຕົ້ນແມ່ນ ການພັດທະນາຫ້ອງຮຽນ, ໂຮງຮຽນ ແລະ ການຍົກສູງຄຸນນະພາບຂອງຄູໂດຍການຝຶກອົບຮົມ ແລະ ການສົ່ງພະນັກງານຮຽນ ເຊື່ອມຕໍ່ໃນຊ່ວງພັກແລ້ງ, ສຳເລັດຜົນເປັນຢ່າງດີ.

           ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ກ່າວວ່າ: ໃນສົກຮຽນ 2012-2013 ທົ່ວ ນະ ຄອນຫຼວງວຽງຈັນ ມີໂຮງຮຽນສາມັນທັງ ໝົດລວມທັງພາກລັດ ແລະ ເອກະ ຊົນ 881 ແຫ່ງ, ຄູສອນ 8 ພັນກວ່າຄົນຂະນະ ທີ່ໃນສົກຮຽນນີ້, ຈະມີຈຳນວນັກຮຽນເພີ່ມຂື້ນເຖີງ 1 ແສນກ່ວາຄົນ ແລະ ຈຳນວນ ໂຮງຮຽນເພີ່ມຂື້ນ 5-6 ແຫ່ງ, ແຕ່ແນວ ໃດກໍດີເພື່ອຮອງຮັບກັບການສິດສອນທີ່ດີນັ້ນພະແນກສຶກ ສາທິການ ແລະ ກິລາ ນະຄອນຫຼວງກໍໄດ້ ເອົາໃຈໃສ່ຍົກສູງຄວາມ ຮູ້ຄວາມສາມາດຂອງພະ ນັກງານຄູອາຈານ ໃຫ້ມີການຍົກ ລະດັບເຊື່ອມຕໍ່ ແລະ ຝຶກອົບຮົມ ເພື່ອເຮັດໃຫ້ການ ສິດສອນຂອງ ຄູໄດ້ມີມາດຖານສູງຂື້ນ, ພ້ອມດຽວກັນນີ້ ກໍຍັງໄດ້ມີການແຈກຢາຍປື້ມຕຳລາຮຽນທຸກຊັ້ນໃຫ້ໂຮງຮຽນຕ່າງໆໄດ້ຢ່າງພຽງພໍ, ພ້ອມທັງມີ ການປັບປຸງຫ້ອງຮຽນ, ຫ້ອງຄົ້ນຄວ້າທົດລອງ ແລະ ຈັດຫຼັກສູດການຮຽນການສອນຕາມ 5 ຫຼັກມູນຂອງການ ສຶກສາ ແລະ ສົ່ງເສີມໃຫ້ນັກຮຽນທຸກຄົນໄດ້ເຂົ້າຮຽນຕາມເກນອາຍຸເພື່ອແນໃສ່ເຮັດໃຫ້ການຮຽນການສອນມີບັນຍາກາດດີຂື້ນ.

              ທ່ານ ຊົມພູ ແກ້ວປັນຍາ ຫົວໜ້າພະແນກສຶກສາ ກ່າວວ່າ: ເຖິງວ່າສົກຮຽນໃໝ່ນີ້ ນະຄອນຫຼວງວຽງຈັນ ມີຄວາມ ພ້ອມຫຼາຍດ້ານກໍຕາມ,​ ແຕ່ເພື່ອຮອງຮັບການການສິດສອນໂດຍຍັງມີສິ່ງທ້າທາຍ, ເຖີງວ່າລັດຖະບານໄດ້ອະນຸມັດຕົວເລກຄູ ໃຫ້ແກ່ຂະແໜງສຶກສາເປັນຈຳນວນຫຼາຍກໍຕາມແຕ່ທຽບກັບການເພີ່ມຂື້ນຂອງຈຳນວນຫ້ອງຮຽນ ແລະ ນັກຮຽນຊັ້ນຕ່າງໆ ແລ້ວເຫັນວ່າ:  ຈຳນວນຄູສອນກໍຕ້ອງໄດ້ເພີ່ມຂື້ນອີກ ແລະ ການແຈກຢາຍຊັບຊ້ນກໍໃຫ້ທົ່ວເຖີງໂດຍ ສະເພາະຢູ່ເຂດຫ່າງໄກ ສອກຫຼີກ ແມ່ນຍັງຂາດເຂີນຄູຫຼາຍແຕ່ກົງ ກັນຂ້າມຢູ່ເຂດຕົວເມືອງແມ່ນມີຄູ ຫຼາຍເກີນຄວາມຕ້ອງການ. ນອກຈາກນັ້ນຄູບາງ ວິຊາ ແລະ ບາງສາຍແມ່ນຍັງບໍ່ທັນພຽງພໍເຊັ່ນ:​​ ຄູອະນຸບານ, ຄູສອນວິຊາພາສາອັງກິດສຳລັບຊັ້ນປະຖົມ, ຄູສອນວິຊາສິລະ ປະ, ພາລະສຶກສາ ແລະ ຄູສອນພື້ນຖານວິຊາຊີບແມ່ນຍັງບໍ່ທັນພຽງພໍກັບຄວາມຕ້ອງການ, ນອກນີ້ ກໍຍັງມີສະພາບບັນຫາປະ ກົດການຫຍໍ້ທໍ້ໂດຍສະເພາະໃນກຸ່ມນັກຮຽນຊຶ່ງມີການປະລະການຮຽນ, ມັກຂາດຮຽນ ແລະ ເຂົ້າຮ້ານເກມ ແລະ ອື່ນໆຍັງ ມີຢູ່, ຊຶ່ງທາງພະແນກສຶກສາກໍໄດ້ມີຄຳ ສັ່ງແນະນຳໃຫ້ບັນດາໂຮງຮຽນປະສານສົມທົບກັບຜູ້ປົກຄອງ ແລະ ອຳນາດການປົກ ຄອງສຶກສາອົບຮົມລູກຫຼານ ແລະ ຊຸກຍູ້ ໃຫ້ມີການສຶກສາຮ່ຳຮຽນເພື່ອເປັນອານາຄົດທີ່ດີຂອງຊາດ.