ການນຳເຂົ້ານຳມັນເຊື້ອໄຟຂອງລາວເພີ່ມຂຶ້ນປີລະ 10 %

      ດັ່ງທີ່ເຫັນໃນປັດຈຸບັນການ ຈໍລະຈອນຕາມຖະໜົນຫົນທາງ ແມ່ນໄດ້ເລີ່ມແອ ອັດຫຼາຍຂຶ້ນ, ນັ້ນກໍເນື່ອງຈາກການເພີ່ມຂຶ້ນຢ່າງໄວວາຂອງຈຳນວນພາຫະນະໃນ ປະເທດເຮົາ ແລະ ເມື່ອຍານພາຫະນະເພີ່ມຂຶ້ນແນ່ນອນວ່າຄວາມຕ້ອງການນ້ຳມັນ ເຊື້ອໄຟກໍຈະເພີ່ມຫຼາຍຂຶ້ນເຊັ່ນກັນ, ຕາມສະຖິຕິຂອງກະຊວງໂຍທາທິການ ແລະ ຂົນສົ່ງໃຫ້ຮູ້ວ່າ: ໃນ ໄລຍະຜ່ານມາຈຳນວນ ຍານພາຫະນະໃນປະເທດເຮົາໄດ້ເພີ່ມ ຂຶ້ນສອງເທົ່າຄືໃນປີ 2011 ຈຳນວນ ຍານພາຫະນະທີ່ຈົດທະບຽນຖືກຕ້ອງຕາມ ກົດໝາຍ ມີປະມານ 1,2 ລ້ານຄັນ ແລະ ຕົກມາຮອດປີ 2013 ເພີ່ມຂຶ້ນເປັນ 2 ລ້ານກວ່າຄັນ ແລະ ຄາດວ່າຈະເພີ່ມຂື້ນ ເຖິງ 3 ລ້ານຄັນໃນປີ 2015, ການເພີ່ມຂຶ້ນຂອງຍານພາຫະນະດັ່ງ ກ່າວຊຶ່ງບໍ່ພຽງແຕ່ຈະກໍ່ໍໃຫ້ເກີດອຸປະຕິເຫດຕາມທ້ອງຖະໜົນ

ເພີ່ມ ຂຶ້ນຢ່າງຕໍ່ເນື່ອງເທົ່ານັ້ນ, ມັນຍັງເຮັດໃຫ້ຄວາມແອອັດຕາມທ້ອງຖະໜົນເພີ່ມຂຶ້ນ ແລະ ລາວ ຕ້ອງນຳເຂົ້ານ້ຳມັນເພີ່ມ ຫຼາຍຂຶ້ນທຸກໆປີ, ສະມາຄົມນ້ຳມັນເຊື້ອໄຟ ແລະ ອາຍແກສແຫ່ງຊາດລາວໃຫ້ຮູ້ ວ່າ:ໃນປີ 2011 ລາວ ໄດ້ ນຳເຂົ້າ ນ້ຳມັນ ປະມານ 750 ລ້ານກວ່າລິດ ແລະ ຄາດວ່າຮອດປີ 2015 ການນຳເຂົ້ານ້ຳມັນຈະເພີ່ມຂຶ້ນ ເຖິງ  920 ລ້ານລິດຕໍ່ປີ, ໂດຍສະ ເລ່ຍແລ້ວປີໜຶ່ງຈະເພີ່ມຂຶ້ນ 10 %, ປັດຈຸບັນລາວເປັນປະເທດໜຶ່ງທີ່ນຳເຂົ້ານ້ຳມັນເຊື້ອໄຟຈາກຕ່າງປະເທດ 100% ຂອງ ຄວາມຕ້ອງການທັງໝົດ ແລະ ລາຄານ້ຳມັນກໍຂຶ້ນກັບຕະຫຼາດໂລກຢູ່ຕະຫຼອດເວລາ, ສະເພາະແຕ່ປີ 2012 ມາຮອດປັດຈຸບັນ ລັດຖະບານໄດ້ປັບລາຄານ້ຳມັນຂື້ນ-ລົງຫຼາຍ ກວ່າ 30 ຄັ້ງ ແລະ ການປັບຂຶ້ນລາຄານ້ຳມັນຄັ້ງລ່າສຸດມີຂຶ້ນ ເມື່ອວັນທີ 13 ກຸມພາ 2014 ນີ້ແອັດຊັງຢູ່ທີ່ 10.040 ກີບຕໍ່ລິດ, ກາຊວນ 9.300 ກີບຕໍ່ລິດ, ຖ້າທຽບໃສ່ໄລຍະດຽວກັນຂອງປີ ຜ່ານມາ ຖືວ່ານ້ຳມັນຫຼຸດລົງ ເລັກນ້ອຍ, ດັ່ງນັ້ນເພື່ອຫຼຸດຜ່ອນ ມົນລະພິດ, ຄວາມແອອັດຕາມທ້ອງຖະໜົນ ແລະ ຊ່ວຍຫຼຸດອັດຕານຳ ເຂົ້ານຳມັນທຸກຄົນໃນສັງ ຄົມຕ້ອງເປັນເຈົ້າການຊ່ວຍກັນ ປະຢັດມັດທະຍັດເຊັ່ນ: ຫຼຸດຜ່ອນ ການນຳໃຊ້ຍານພະຫະນະ, ບໍ່ ຄວນໃຊ້ຍານພາຫະນະໄປທາງ ຟຸມເຟືອຍຈົນເກີນໄປ.