ຈະເລີ່ມກໍ່ສ້າງເຂື່ອນໄຟຟ້ານ້ຳງື່ມ 4 ທີ່ແຂວງຊຽງຂວາງ

     ໃນວັນທີ 25 ມີນາ 2014 ຢູ່ໂຮງແຮມລາວພລາຊາ ໄດ້ມີພິທີເຊັນບົດບັນ ທຶກ ຄວາມເຂົ້າໃຈ (MOU)ໂຄງການກໍ່ສ້າງ ເຂື່ອນໄຟຟ້ານ້ຳຕົກນ້ຳງື່ມ 4 ລະຫວ່າງ ລັດ ຖະບານແຫ່ງ ສປປ ລາວ ຕາງໜ້າໂດຍທ່ານ ດຣ. ບຸນທະວີ ສີສຸພັນທອງລັດຖະມົນ ຕີຊ່ວຍວ່າການກະຊວງແຜນການ ແລະ ການລົງທຶນ ແລະ ບໍລິສັດ ວີແອລ ວີ ຊຸມ ພົນພັກດີ ຈຳກັດຜູ້ດຽວ ໂດຍ ວິໄລວອນ ຊຸມພົນພັກດີປະທານບໍລິສັດດັ່ງກ່າວ ແລະ ເປັນກຽດເຂົ້າຮ່ວມຂອງ ທ່ານ ສົມສະ ຫວາດ ເລັ່ງສະຫວັດ ຮອງນາຍົກ ລັດຖະມົນຕີ, ຜູ້ຊີ້ນຳວຽກງານເສດຖະກິດພ້ອມດ້ວຍເຈົ້າແຂວງຊຽງຂວາງ ແລະ ຫົວໜ້າລັດວິ ສາຫະກິດໄຟຟ້າລາວເຂົ້າຮ່ວມ ນຳດ້ວຍ. ທ່ານ ຫັດສະດີ ສີສຸລາດ ທີ່ປຶກສາບໍລິສັດ ວີແອລວີ ຊຸມພົນ ພັກດີ ຈຳກັດຜູ້ດຽວ ໄດ້ມີຄຳເຫັນ ໃນພິທີວ່າ: ເຂື່ອນ ໄຟຟ້ານ້ຳຕົກ ນ້ຳງື່ມ 4 ຕັ້ງຢູ່ເມືອງແປກ ແຂວງຊຽງຂວາງຫ່າງຈາກຕົວ ເມືອງໄປທາງທິດຕາເວັນຕົກປະມານ 30 ກິໂລແມັດ

ເຊິ່ງ ເບື້ອງຕົ້ນຄາດວ່າຈະເຮັດເປັນ 2 ເຂື່ອນ, ແຕ່ຈາກການສຶກສາພົບ ວ່າ: ອາດມີຜົນກະທົບຫຼາຍດ້ານຈຶ່ງຊອກຫາທາງເລືອກ ທີ່ໄດ້ ຮັບຜົນກະທົບໜ້ອຍທີ່ສຸດ ແລະ ມີປະ ສິດທິຜົນສູງສຸດກໍຄືການເຮັດ ເຂື່ອນດຽວ, ເປັນເຂື່ອນເບຕົງ ຍາວ 254 ແມັດ, ສູງ 74,5 ແມັດ, ມີເນື້ອທີ່ອ່າງໂຕ່ງນ້ຳກວ່າ 1 ກິ ໂລຕາແມັດ, ເນື້ອທີ່ອ່າງເກັບນ້ຳ 9,2 ກິໂລຕາແມັດ ພ້ອມທັງສ້າງ ອຸໂມງສົ່ງ ນ້ຳຍາວ 14 ກິໂລແມັດ, ຕິດຕັ້ງຈັກ 2 ໜ່ວຍ ລວມກຳລັງ ຕິດຕັ້ງ 220 ເມັກກາວັດ ເຊິ່ງຈະ ສາມາດຜະລິດໄຟຟ້າສະເລ່ຍໄດ້ 822 ລ້ານກິໂລວັດໂມງຕໍ່ປີລວມມູນຄ່າການລົງທຶນ 322 ລ້ານໂດ ລາສະຫະລັດເປັນການລົງທຶນ ຂອງພາກເອກະຊົນລາວ 100% ແລະ ຄາດວ່າຈະໃຊ້ເວລາໃນການພັດທະນາໂຄງການ 5  ປີ. ການຜະລິດໄຟຟ້າແມ່ນຈະຕອບສະໜອງຮັບໃຊ້ພາຍ ໃນປະເທດທັງໝົດໂດຍເຊື່ອມຕໍ່ເຂົ້າລະບົບໄຟຟ້າຂອງລັດວິສາຫະກິດໄຟຟ້າລາວ.

        ເຂື່ອນໄຟຟ້ານ້ຳຕົກແຫ່ງ ນີ້ຈະເປັນອີກເຂື່ອນໜຶ່ງເພື່ອສາມາດຕອບສະໜອງໃຫ້ແກ່ໄຟຟ້າພາຍໃນປະເທດ ແລະ ປະ ກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງທ້ອງຖິ່ນສາມາດຍົກລະດັບຊີວິດການເປັນຢູ່ ແລະ ແກ້ໄຂຄວາມ ທຸກຍາກຂອງປະຊາຊົນລາວບັນດາເຜົ່າໃຫ້ຫຼຸດລົງເທື່ອລະກ້າວ, ພ້ອມທັງສາມາດດັດສົມນ້ຳຈາກເຂື່ອນ ນ້ຳງື່ມ 4 ໃຫ້ແກ່ ເຂື່ອນນ້ຳງື່ມ 1 ແລະ 2 ໃຫ້ໄດ້ຮັບຜົນດີຂຶ້ນຕື່ມອີກ.