laophatthananewspaper: ສຶກສາລາວ-ຫວຽດນາມ ເພີ່ມທະວີການຮ່ວມມືສອງຝ່າຍ

ການພົບປະເພື່ອປຶກສາຫາລືການພົວພັນຮ່ວມມືລະຫວ່າງຂະແໜງສຶກສາລາວ ແລະ ຫວຽດ ນາມ ແລະ ຕີລາຄາໝາກ ຜົນການຮ່ວມມືສອງຝ່າຍ ໄດ້ມີຂຶ້ນໃນວັນທີ 4 ເມສານີ້ ຢູ່ນະຄອນ ຫລວງວຽງຈັນ, ຝ່າຍລາວນຳໂດຍທ່ານ ກອງສີ ແສງມະນີ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລາ, ຝ່າຍຫວຽດນາມ ນຳໂດຍທ່ານ ເຈິນກວາງກຸ່ຍ ລັດຖະ ມົນຕີຊ່ວຍວ່າການກະຊວງສຶກສາທິການ ແລະ ບຳລຸງສ້າງ ສສ ຫວຽດນາມ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກຢູ່ລາວ ລະ ຫວ່າງວັນທີ 3-4 ເມສານີ້.

ໃນກອງປະຊຸມ, ສອງຝ່າຍໄດ້ຕີລາຄາສູງຕໍ່ໝາກຜົນການພົວ ພັນຮ່ວມມືຊ່ວຍເຫລືອເຊິ່ງກັນ ແລະ ກັນລະຫວ່າງສອງຂະແໜງການໃນໄລຍະຜ່ານມາ ໂດຍສະເພາະແມ່ນຜົນສຳເລັດຂອງການຮ່ວມມືຊ່ວຍພັດທະນາຊັບພະ ຍາກອນມະນຸດທີ່ພັກ, ລັດຖະບານສອງປະເທດວາງອອກ, ສອງຝ່າຍໄດ້ຮ່ວມກັນຈັດກອງປະຊຸມຕ່າງໆຢ່າງມີຜົນສຳເລັດໃນການແລກປ່ຽນບົດຮຽນ

ແລະ ປະສົບການຕ່າງໆດ້ວຍກັນ ແລະ ໄດ້ປະກອບສ່ວນສຳຄັນໃນການກະຕຸກຊຸກຍູ້ການພັດທະນາການສຶກສາສອງປະເທດ ລາວ- ຫວຽດນາມ ນັບມື້ເຕີບໃຫຍ່ເຂັ້ມແຂງ, ສອງຝ່າຍມີຄວາມພາກພູມໃຈສູງທີ່ເຫັນວ່າຈຳນວນນັກຮຽນ- ນັກສຶກສາສອງຝ່າຍໄດ້ເຂົ້າມາຮຽນຢູ່ລາວ ແລະ ໄປຮຽນຢູ່ຫວຽດນາມນັບມື້ຂະຫຍາຍຕົວນັບທັງດ້ານປະລິມານ ແລະ ຄຸນນະພາບຄືປັດຈຸ ບັນນັກສຶກສາຫວຽດນາມກຳລັງຮຽນຢູ່ລາວມີປະມານ 400 ຄົນ ກໍໄດ້ດຳເນີນໄປດ້ວຍຄຸນນະພາບສູງ. ຄຽງຄູ່ກັນນັ້ນ ສອງຝ່າຍຍັງໄດ້ປຶກສາຫາລືເພື່ອຍົກສູງຄຸນນະພາບການສຶກສາຮ່ຳຮຽນພາສາຫວຽດນາມໃນໂຮງຮຽນພາສາຫວຽດຈຳນວນ 13 ແຫ່ງ ທີ່ ສສ ຫວຽດນາມ ໃຫ້ການຊ່ວຍເຫລືອ ແລະ 13 ແຫ່ງ ທີ່ຂຶ້ນກັບສະມາຄົມຫວຽດນາມໃນລາວເປັນຜູ້ຄຸ້ມຄອງນັ້ນໃຫ້ມີຄຸນນະພາບສູງຂຶ້ນ.

ໃນໂອກາດນີ້, ທ່ານລັດຖະມົນຕີຊ່ວຍວ່າການ ກອງສີ ແສງມະນີ ໄດ້ຕາງໜ້າໃຫ້ພັກ, ລັດຖະບານສະແດງຄວາມຂອບອົກຂອບໃຈຢ່າງສູງໄປຍັງພັກ, ລັດຖະບານ ແລະ ປະຊາຊົນຫວຽດ ນາມ ໂດຍສະເພາະແມ່ນກະຊວງສຶກສາ ແລະ ບຳລຸງສ້າງ ໄດ້ໃຫ້ການຮ່ວມມືຊ່ວຍເຫລືອຂະແໜງສຶກສາຂອງລາວຢ່າງມີປະ ສິດທິຜົນອັນເປັນການປະກອບ ສ່ວນສຳຄັນເຂົ້າໃນການພັດ ທະນາຊັບພະຍາກອນມະນຸດຂອງລາວນັບມື້ຂະຫຍາຍຕົວ. ພ້ອມກັນນັ້ນ ສອງຝ່າຍໄດ້ເປັນເອກະພາບກັນສືບຕໍ່ເພີ່ມທະວີຮ່ວມມືຊ່ວຍເຫລືອເຊິ່ງກັນ ແລະ ກັນໃນຂະແໜງສຶກສາໃຫ້ຫລາຍຂຶ້ນ ໂດຍສະເພາະຈະເພີ່ມທະວີຍົກສູງຄຸນນະພາບການສຶກສາຮ່ຳຮຽນຂອງນັກຮຽນສອງຝ່າຍຢູ່ແຕ່ລະປະເທດໃຫ້ດີຂຶ້ນກວ່າເກົ່າ ນັບແຕ່ຂອດການສອບເສັງຄັດເລືອກໄປເຖິງຂອດການສຶກສາຮ່ຳຮຽນຢູ່ແຕ່ລະໂຮງຮຽນ ແລະ ສອງຝ່າຍເປັນເອກະພາບຈະອຳນວຍຄວາມສະດວກ ແລະ ສ້າງເງື່ອນໄຂໃຫ້ຄູອາ ຈານພາສາຫວຽດນາມ ໄດ້ເຂົ້າມາສອນພາສາຫວຽດນາມຢູ່ລາວມີຄວາມສະ ດວກສະບາຍ ແລະ ຈະສຸມໃສ່ຍົກສູງຄຸນນະພາບການສຶກສາຮ່ຳ ຮຽນໃນລະດັບຂັ້ນສູງນັບແຕ່ປະ ລິນຍາຕີຂຶ້ນໄປໃຫ້ມີຄຸນນະພາບ ແລະ ສາມາດຕອບສະໜອງຄວາມຮຽກ ຮ້ອງຕ້ອງການຂອງວຽກງານ ແລະ ສອງຝ່າຍມີຄວາມຕັດສິນໃຈຈະຍົກລະດັບການສຶກສາຮ່ຳຮຽນຂອງໂຮງຮຽນ ຫວຽນຢູ ໃນນະຄອນຫລວງວຽງຈັນ ສາມາດສຶກສາຮ່ຳຮຽນເປັນສອງພາສາລາວ ແລະ ຫວຽດນາມໄປພ້ອມໆກັນເປັນໂຮງຮຽນທຳອິດ.