ຕຳຫຼວດເຕືອນບໍ່ຄວນປະສິ່ງຂອງມີຄ່າໄວ້ໃນລົດ

           ປກສ ນະຄອນຫຼວງວຽງຈັນ, ໄດ້ອອກມາເຕືອນປະຊາຊົນບໍ່ຄວນປະສິ່ງຂອງມີຄ່າໄວ້ໃນລົດ ແລະ ບໍ່ຄວນຈອດລົດ ໃນທີ່ບໍ່ປອດໄພເນື່ອງຈາກປັດຈຸບັນໄດ້ມີກຸ່ມຄົນບໍ່ດີເຄື່ອນໄຫວທຸບແວ່ນລົດເພື່ອເອົາຊັບ, ຫຼ້າສຸດເຫດການທີ່ບໍ່ເພິ່ງປາດຖະ ໜາໄດ້ເກີດຂຶ້ນໃນວັນທີ 14 ກໍລະກົດນີ້ ຢູ່ເຂດບ້ານໂພນຕ້ອງສະຫວາດ ເມືອງ ຈັນທະບູລີນະຄອນຫຼວງວຽງຈັນແຕ່ໂຊກດີ ເຫດການຄັ້ງນີ້ຄົນຮ້າຍບໍ່ທັນໄດ້ຫຍັງໄປຍ້ອນມີປະຊາຊົນມາພົບເຫັນຈຶ່ງຫຼົບໜີໂດຍມີພຽງແວ່ນລົດແຕກ, ຊຶ່ງເຈົ້າໜ້າທີ່ໄດ້ລົງ ເກັບກຳກວດຈຸດເກີດເຫດເພື່ອຕິດຕາມຕົວຄົນຮ້າຍມາດຳເນີນຄະດີ.

         ເຈົ້າໜ້າທີ່ ປກສ ນະຄອນ ຫຼວງວຽງຈັນ ໃຫ້ຮູ້ວ່າ: ນັບແຕ່ຕົ້ນເດືອນກໍລະກົດນີ້ຢູ່ນະຄອນຫຼວງວຽງຈັນມີສະພາບທຸບ ແວ່ນລົດເກີດຂຶ້ນກວ່າ 10 ກໍລະນີ, ມີຊັບສິນເສຍຫາຍເປັນເງິນຫຼາຍ ລ້ານກີບ ແລະ ໂທລະສັບຫຼາຍໜ່ວຍ, ຊຶ່ງເຈົ້າໜ້າທີ່ໃຫ້ ທັດສະນະວ່າ: ກຸ່ມທີ່ເຄື່ອນໄຫວທຸບ ແວ່ນລົດນີ້ແມ່ນໄວໜຸ່ມທີ່ບໍ່ມີວຽກເຮັດງານທຳ ແລະ ພົວພັນກັບສິ່ງເສບຕິດໂດຍຈະ ມີການຂີ່ລົດເລາະໄປຕາມທາງພໍເຫັນລົດເປົ້າໝາຍຈອດໄວ້ແຄມທາງ ແລະ ປອດຜູ້ຄົນກໍຈະລົງມືທຸບແວ່ນແລ້ວເອົາຊັບສິນ,

ສະນັ້ນ ຈຶ່ງເຕືອນໃຫ້ປະຊາຊົນມີສະຕິບໍ່ຄວນປະຊັບສິນມີຄ່າໄວ້ໃນລົດເພື່ອບໍ່ໃຫ້ຕົກເປັນເຫຍື່ອຂອງກຸ່ມຄົນບໍ່ດີດັ່ງກ່າວ.

        ຂ່າວຍັງໃຫ້ຮູ້ອີກວ່າ: ໃນວັນທີ 14 ກໍລະກົດນີ້ ເຈົ້າໜ້າທີ່ ປກສ ນະຄອນຫຼວງວຽງຈັນ ໄດ້ຮັບແຈ້ງວ່າ: ໄດ້ມີເຫດການ ຄົນຮ້າຍງັດເຮືອນຂອງປະຊາຊົນຢູ່ບ້ານຄຳຮຸ່ງ ເມືອງໄຊທານີ ນະຄອນຫຼວງວຽງຈັນໄດ້ຊັບສິນເງີນ 5 ແສນກີບ ແລະ ໃນມື້ ດຽວກັນໄດ້ມີຄົນຮ້າຍງັດເຮືອນຂອງປະຊາຊົນຢູ່ບ້ານທົ່ງກາງເມືອງສີສັດຕະນາກນະຄອນຫຼວງວຽງຈັນແຕ່ບໍ່ມີຊັບສິນເສຍ ຫາຍ.