ອົງການແນວລາວສ້າງຊາດສະເໜີສະພາເພີ່ມທະວີມາດຕະການການກວດກາເຂັ້ມງວດເພື່ອປົກປ້ອງຜົນປະໂຫຍດຂອງຊາດ

    ອົງການແນວລາວສ້າງຊາດ, ໄດ້ຮຽກຮ້ອງໃຫ້ສະພາແຫ່ງຊາດເພີ່ມທະວີບົດບາດການກວດກາບັນດາໂຄງການລົງ ທຶນຂອງລັດນັບທັງສູນກາງ ແລະ ທ້ອງຖິ່ນໃຫ້ເຂັ້ມງວດກວ່າເກົ່າເພື່ອປົກປ້ອງຜົນປະໂຫຍດຂອງຊາດ, ພາຍຫລັງເຫັນ ວ່າໃນໄລຍະຜ່ານມາມີບຸກຄົນ ແລະ ນິຕິບຸກຄົນຈຳນວນບໍ່ໜ້ອຍສວຍໃຊ້ໂຄງການດັ່ງກ່າວເພື່ອຄວາມລຳລວຍ.

     ບັນຫາດັ່ງກ່າວແມ່ນທ່ານ ຕົງເຢີທໍ ຮອງປະທານຜູ້ປະຈຳການສູນກາງແນວລາວສ້າງຊາດ, ໄດ້ຍົກຂຶ້ນໃນລະ ຫວ່າງການປະກອບຄຳເຫັນຕໍ່ກອງປະຊຸມເທື່ອທີ 9 ຂອງສະພາແຫ່ງຊາດຊຸດທີ 7 ເມື່ອບໍ່ດົນນີ້ໂດຍທ່ານກ່າວວ່າ: ພວກເຮົາເຫັນວ່າຍັງມີສະມາຊິກສະພາແຫ່ງຊາດຈຳນວນໜຶ່ງຢູ່ບາງເຂດເລືອກຕັ້ງຍັງບໍ່ທັນໄດ້ປະຕິບັດໜ້າທີ່ຂອງຕົນ ຢ່າງເຕັມສ່ວນ ເປັນຕົ້ນການລົງພົບປະຢ້ຽມຢາມ ແລະ ໃກ້ຊິດຕິດແທດກັບປະຊາຊົນບັນດາເຜົ່າບໍ່ເປັນປົກກະຕິ ແລະ ທົ່ວເຖິງ, ໂດຍສະເພາະແມ່ນຢູ່ເຂດທຸລະກັນດານ, ພູດອຍຫ່າງໄກສອກຫລີກ.

ນອກຈາກນີ້ສະມາຊິກສະພາແຫ່ງຊາດ ແລະ ພາກສ່ວນກ່ຽວຂ້ອງຍັງບໍ່ທັນໄດ້ຕັ້ງໜ້າລົງຕິດຕາມກວດກາ ຫລາຍໂຄງການລົງທຶນຂອງລັດ ເຊັ່ນ: ການກໍ່ສ້າງຊົນລະປະທານ, ເສັ້ນທາງ, ສຳນັກງານອົງການຕ່າງໆ ນັບທັງ ຢູ່ສູນກາງ ແລະ ທ້ອງຖິ່ນອື່ນໆທີ່ມີມູນຄ່າສູງເກີນຄວາມເປັນຈິງ, ແຕ່ຄຸນນະພາບຕ່ຳ ແລະ ອາຍຸການນຳໃຊ້ບໍ່ ຍາວນານ, ອັນໄດ້ເຮັດໃຫ້ລັດເຮົາສູນເສຍງົບປະມານຈຳນວນຫລວງຫລາຍໃນແຕ່ລະປີ, ເນື່ອງຈາກພະນັກງານຈຳ ນວນໜຶ່ງຢູ່ບາງຂະແໜງການ ແລະ ທ້ອງຖິ່ນມີການປະພຶດໄປໃນທາງທີ່ບໍ່ຖືກຕ້ອງ, ກໍໃຫ້ເກີດຫາງສຽງສັງຄົມ

 ແລະ ສ່ວນຫລວງຫລາຍກໍແມ່ນສະເໜີໃຫ້ສະພາແຫ່ງຊາດຕິດຕາມກວດກາຢ່າງໃກ້ຊິດຕໍ່ບັນຫາການສໍ້ລາດ ບັງ ຫລວງຍັກຍອກຊັບສີນຂອງລັດ ແລະ ອື່ນໆ, ນີ້ແມ່ນພະຍາດອັນຕະລາຍ ແລະ ຊຳເຮື້ອມາຫລາຍປີໃນຂົງເຂດ ລັດເຮົາ, ແຕ່ການນຳໃຊ້ມາດຕະການ ແລະ ປະຕິບັດວິໄນຍັງບໍ່ທັນເຂັ້ມງວດເທົ່າທີ່ຄວນ, ເຊິ່ງບັນຫາດັ່ງກ່າວເຫັນວ່າບໍ່ຖືກ ຕ້ອງສອດຄ່ອງຕາມແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ, ຊຶ່ງຈະຕ້ອງໄດ້ເພີ່ມທະວີ

ເອົາໃຈໃສ່ປັບປຸງ ແລະ ແກ້ໄຂໂດຍໄວເພື່ອປົກປ້ອງຜົນປະໂຫຍດລວມຂອງຊາດ.