ຢູ່ໃນມະຕິກອງປະຊຸມສະພາແຫ່ງຊາດກ່ຽວກັບການຮັບຮອງເອົາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ,
ແຜນງົບປະມານແຫ່ງລັດ ສົກປີ 2015-2016 ນັບວ່າເປັນປັດໄຈສຳຄັນໃຫ້ແກ່ການພັດທະນາເສດຖະກິດ-ສັງຄົມໄດ້ດຳເນີນໄປຢ່າງຄ່ອງຕົວ
ແລະ ມີປະສິດທິຜົນກວ່າເກົ່າຄື: ຕໍ່ກັບມາດຕະການດ້ານເກັບລາຍຮັບ ສະເໜີໃຫ້ລັດຖະບານເອົາໃຈໃສ່ໃນການປັບປຸງນິຕິກຳ,
ການຫັນເປັນທັນສະໄໝຂອງການເກັບລາຍຮັບ ເປັນຕົ້ນການເກັບລາຍຮັບຈາກບໍ່ແຮ່,
ພາຫະນະ, ສິນຄ້າຟຸມເຟືອຍ, ຄ່າບໍລິການອື່ນໆໃຫ້ເປັນຮູບປະທຳຫລາຍຂຶ້ນ ລວມທັງການສ້າງນິຕິກຳ
ແລະ ປັບປຸງກົນໄກການເກັບລາຍຮັບຈາກການຂາຍໄມ້ຢ່າງລວມສູນເຂົ້າງົບປະມານແຫ່ງລັດ,
ສະເໜີໃຫ້ວາງມາດຕະການຄຸ້ມຄອງລາຍຈ່າຍ, ຕິດຕາມກວດກາການປະຕິບັດການແກ້ໄຂໜີ້
3 ແຈ, ໜີ້ໃນລະບົບ, ປັບປຸງລະບົບການປະມູນຈັດຊື້-ຈັດຈ້າງດ້ວຍງົບປະມານຂອງລັດໃຫ້ມີປະສິດທິຜົນ,
ຮັບປະກັນຄວາມໂປ່ງໃສ ແລະ ເປັນທຳ, ສະເໜີລັດຖະບານຄົ້ນຄວ້າພິຈາລະນາປັບປຸງນິຕິກຳການສະເໜີຂໍດັດແກ້ງົບປະມານການຈົດຮັບ-ຈົດຈ່າຍ,
ລາຍຮັບວິຊາການຂອງຂະແໜງການ ແລະ ການສະ
ເໜີຂໍດັດແກ້ເງິນເກີນແຜນຂອງທ້ອງຖິ່ນໃຫ້ລະອຽດ
ເພື່ອຮັບປະກັນຫລັກການລາຍຮັບເກີນແຜນຂອງທ້ອງຖິ່ນຕ້ອງໄປຄຽງຄູ່ກັບລາຍຮັບເກີນແຜນຂອງງົບປະມານແຫ່ງລັດ.
ສະພາແຫ່ງຊາດຍັງສະເໜີລັດຖະບານຕ້ອງປະເມີນຄືນນະໂຍບາຍການຫັນຊັບສິນເປັນທຶນ
ແລະ ນິຕິກຳຄຸ້ມຄອງລະອຽດ ເພື່ອຮັບປະກັນໃຫ້ບັນດາແຫລ່ງຊັບພະຍາກອນທຳມະຊາດ
ແລະ ຊັບສິນຂອງລັດທີ່ຖືກນຳໄປແລກປ່ຽນກັບໂຄງການກໍ່ສ້າງຕ່າງໆຖືກບັນຈຸເຂົ້າໃນແຜນພັດທະນາເສດຖະກິດ-ສັງຄົມ
ແລະ ແຜນງົບປະມານແຫ່ງລັດ, ທັງຮັບປະກັນການຄິດໄລ່ມູນຄ່າຊັບສິນຂອງລັດ ເປັນຕົ້ນແມ່ນຊັບພະຍາກອນທຳມະຊາດໃຫ້ໄດ້ຮັບການຕີລາຄາມູນຄ່າຖືກຕ້ອງຕາມລະບຽບກົດໝາຍທີ່ວາງອອກ
ເພື່ອແນໃສ່ເຮັດໃຫ້ການປະຕິບັດລາຍຮັບ-ລາຍຈ່າຍຂອງງົບປະມານດຳເນີນໄປຢ່າງຖືກຕ້ອງ
ແລະ ມີປະສິດທິຜົນ.
No comments:
Post a Comment