ຂັບໄວແຫກໂຄ້ງເຂດບ້ານຈຳປາເສຍຊີວິດຄາທໍ່ນ້ຳກ້ອງທາງ

     ຊາຍໜຸ່ມຂັບລົດຈັກດ້ວຍຄວາມໄວສູງເສຍຫລັກເລີຍໂຄ້ງຕຳກັບຄອບທາງ ຟົ້ງໄປກ້ອງທໍ່ນ້ຳເສຍຂ້າງທາງເສຍຊີວິດຄາທີ່.

     ເຈົ້າໜ້າທີ່ຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ທ່ຽງຄືນຂອງວັນທີ 25 ມັງກອນນີ້, ຢູ່ຖະໜົນເລກທີ 11, ເຂດບ້ານຈຳປາ ເມືອງສີໂຄດຕະບອງ ນະຄອນຫລວງວຽງຈັນ ໄດ້ເກີດອຸປະຕິບັດລົດຈັກໂນວາ ບໍ່ມີໝາຍເລກທະບຽນ ຂັບຂີ່ມາແຕ່ທາງບ້ານວຽງຄຳ ມຸ້ງໜ້າໄປທາງບ້ານໃໝ່ ເມືອງສີໂຄດຕະບອງ, ດ້ວຍຄວາມໄວສູງເສຍຫລັກເລີຍໂຄ້ງໄປຕຳເອົາຂອບທາງເຮັດໃຫ້ຕີນໜ້າຂອງລົດຈັກເປ່ເພໜັກ, ສ່ວນຄົນຂັບນອນເສຍຊີວິດຢູ່ໃນທໍ່ນ້ຳເສຍກ້ອງເສັ້ນທາງ.

     ເຈົ້າໜ້າທີ່ ຍັງໃຫ້ຮູ້ວ່າ: ປັດຈຸບັນຢູ່ປະເທດເຮົາໄດ້ພົບກັບສະພາບອາກາດໜາວແຮງຜິດປົກກະຕິ ເຮັດໃຫ້ບາງພື້ນທີ່ມີນ້ຳໝອກກ້າມ ແລະ ມຶນ ອາດພາໃຫ້ເກີດອຸປະຕິເຫດໄດ້ງ່າຍ, ດັ່ງນັ້ນຈຶ່ງຮຽກຮ້ອງໃຫ້ຜູ້ຂັບຂີ່ທຸກຄົນຈົ່ງມີສະຕິໃນການຂັບຂີ່ ແລະ ຄວນຫລີກເວັ້ນການຂັບຂີ່ໃນຍາມຄ່ຳຄືນ ແມ່ນຈະເປັນການດີທີ່ສຸດ.