ແຈ້ງການຂອງລັດຖະບານກ່ຽວກັບການສະຫລອງປີໃໝ່ລາວ ພສ 2559

         ຫ້ອງວ່າການລັດຖະບານ, ໄດ້ອອກແຈ້ງການສະບັບເລກທີ 478/ຫລບ, ລົງວັນທີ 28 ມີນາ 2016  ເຖິງບັນດາກະຊວງ, ອົງການຈັດຕັ້ງມະຫາຊົນ, ນະຄອນຫລວງວຽງຈັນ ແລະ ບັນດາແຂວງທ້ອງຖິ່ນໃນທົ່ວປະເທດກ່ຽວກັບການຈັດຕັ້ງສະເຫລີມສະຫລອງວັນບຸນປີໃໝ່ລາວ ພສ 2559 ດັ່ງນີ: (1) ບຸນປີໃໝ່ລາວປະຈໍາປີນີ້ແມ່ນມີຄວາມໝາຍສໍາຄັນຫລາຍເນື່ອງຈາກເປັນປີເລີ່ມຕົ້ນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII, ກະກຽມໃຫ້ແກ່ກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ VIII ແລະ ການເປັນເຈົ້າພາບກອງປະຊຸມສຸດຍອດອາຊຽນໃນເດືອນກັນຍາ.(2) ໃຫ້ຖືເອົາການສະເຫລີມສະຫລອງບຸນປີໃໝ່ນີ້ເປັນໂອກາດທີ່ສໍາຄັນໃນການສືບຕໍ່ເສີມຂະຫຍາຍມູນເຊືອ,ຮີດຄອງປະເພນີອັນດີງາມ ແລະ ຄວາມສາມັກຄີເປັນປຶກແຜນຂອງຊາດທີ່ມີມາແຕ່ດົນນານແລ້ວ,ເປັນບຸນໃຫຍ່ປະຈໍາຊາດທີ່ທົ່ວປະຊວງຊົນລາວທັງຊາດໄດ້ຖືເອົາໂອກາດນີ້ເປັນການອວຍໄຊໃຫ້ພອນເຊິ່ງກັນ ແລະ ກັນ, ພ້ອມກັນຈັດຕັ້ງສະເຫລີມສະຫລອງດ້ວຍບັນຍາກາດເບີກບານມ່ວນຊື່ນ,ຖືກຕ້ອງຕາມຮີດຄອງປະເພນີ ແລະ ຮັກສາໄດ້ວັດທະນາທໍາອັນດີງາມຂອງຊາດທີ່ຕິດພັນກັບການສົ່ງເສີມການທ່ອງທ່ຽວບົນຈິດໃຈປະຢັດມັດທະຍັດ,ບໍ່ໃຫ້ຈັດງານລ້ຽງແບບຟຸມເຟືອຍ, ບໍ່ໃຫ້ນໍາໃຊ້ງົບປະມານ ແລະ ນໍາໃຊ້ພາຫະນະຂອງລັດໄປທ່ຽວຫລີ້ນບຸນ.(3) ເນື່ອງຈາກປີໃໝ່ລາວປີນີ້ແມ່ນວັນທີ 13,14,15 ແລະ 16 ເມສາ 2016 ກົງກັບວັນພຸດ, ພະຫັດ, ສຸກ ແລະ ເສົາເປັນມື້ພັກລັດຖະການ, ສະນັ້ນ ຈຶ່ງເຫັນດີກໍານົດເອົາວັນທີ 12 ກົງກັບວັນອັງຄານເປັນວັນພັກຊົດເຊີຍ.(4) ໃຫ້ກະຊວງອຸດສະຫະກໍາ ແລະ ການຄ້າ, ນະຄອນຫລວງວຽງຈັນ ແລະ ບັນດາແຂວງໃນຂອບເຂດທົ່ວປະເທດເອົາໃຈໃສ່ຊີ້ນໍາ, ຕິດຕາມ ແລະ ຄຸ້ມຄອງລາຄາສີນຄ້າໃນທ້ອງຕະຫລາດ, ບໍ່ໃຫ້ຊາວຄ້າຂາຍ, ຜູ້ປະກອບການສວຍໂອກາດຂຶ້ນລາຄາສີນຄ້າໂດຍບໍ່ມີເຫດຜົນ,ພ້ອມກັນນັ້ນກໍໃຫ້ກະຊວງກະສິກໍາ ແລະ ປ່າໄມ້ສົມທົບກັບກະຊວງກ່ຽວຂ້ອງເອົາໃຈໃສ່ຊຸກຍູ້ສົ່ງເສີມການຜະລິດຕິດພັນກັບການສະໜອງສິນຄ້າໃຫ້ພຽງພໍກັບຄວາມຕ້ອງການຂອງສັງຄົມ.(5) ໃຫ້ບັນດາກະຊວງ-ອົງການທຽບເທົ່າ, ນະຄອນຫລວງ ແລະ ບັນດາແຂວງໃນຂອບເຂດທົ່ວປະເທດເອົາໃຈໃສ່ເປັນພິເສດຕໍ່ການຮັກສາຄວາມສະຫງົບປອດໄພ, ຄວາມເປັນລະບຽບຮຽບຮ້ອຍຂອງສັງຄົມ ແລະ ອັກຄີໄພຕ່າງໆທີ່ອາດຈະເກີດຂຶ້ນໃນລະດູແລ້ງທີ່ມີອາກາດຮ້ອນອົບເອົ້າ, ໂດຍໃຫ້ມີການແບ່ງຄວາມຮັບພິຊອບໃນການເວນຍາມ ແລະ ປະຈໍາການຄັກແນ່ ເພື່ອປ້ອງກັນສໍານັກງານອົງການຕະຫລອດຮອດໄລຍະປີໃໝ່ລາວ ແລະ ໃຫ້ສາມາດປະສານງານໄດ້ຢ່າງເປັນປົກກະຕິທຸກເວລາ, ໃຫ້ກະຊວງປ້ອງກັນຄວາມສະຫງົບເປັນເຈົ້າການສົມທົບກັບກະຊວງໂຍທາທິການ ແລະ ຂົນສົ່ງ ແລະ ທ້ອງຖິ່ນຕ່າງໆ ເພື່ອຈັດສັນ ແລະ ອໍານວຍຄວາມສະດວກໃນການສັນຈອນໄປ-ມາ,ພ້ອມທັງຮັບປະກັນຄວາມປອດໄພຕາມທ້ອງຖະໜົນ ແລະ ໃຫ້ເພີ່ມທະວີການໂຄສະນາສ້າງຈິດສໍານຶກໃຫ້ພົນລະເມືອງໃນທົ່ວສັງຄົມເຄົາລົບຕໍ່ລະບຽບຈະລາຈອນ ແລະ ເຂັ້ມງວດໃນການກວດກາ, ຫ້າມຂັບຂີ່ຍານພາຫະນະພາຍຫລັງທີ່ມີການດື່ມສິ່ງມືນເມົາ ເພື່ອປ້ອງກັນການເກີດອຸປະຕິເຫດ, ການຫລິ້ນນໍ້າ, ຫົດນໍ້າຕ້ອງຮັບປະກັນບໍ່ໃຫ້ສ້າງຄວາມເສຍຫາຍ ແລະ ບໍ່ເປັນອັນຕະລາຍຕໍ່ຊີວິດ, ຊັບສິນຂອງບຸກຄົນ ແລະ ສະຖານທີ່ສາທາລະນະຕ່າງໆ ແລະ (6) ມອບໃຫ້ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ນະຄອນຫລວງວຽງຈັນ ແລະ ບັນດາແຂວງໃນຂອບເຂດທົ່ວປະເທດ ເພີ່ມທະວີການປະຊາສໍາພັນໃຫ້ປະຊາຊົນໃນທົ່ວສັງຄົມຮັບຮູ້ ແລະ ເຂົ້າໃຈຕໍ່ການສະເຫລີມສະຫລອງບຸນປີໃໝ່ປະຈໍາຊາດໃຫ້ສອດຄ່ອງກັບວັດທະນາທໍາ, ຮີດຄອງປະເພນີອັນດີງາມຂອງຊາດ ແລະ ສະພາບຕົວຈິງເພື່ອຮັບປະກັນຄວາມປອດໄພ ແລະ ຄວາມເປັນລະບຽບຮຽບຮ້ອຍຂອງສັງຄົມ.