ການລັກລອບນໍາໃຊ້ປືນແກ໋ບເພື່ອລ່າສັດຍັງມີແຜ່ຫລາຍໃນເຂດຊົນນະບົດຫ່າງໄກສອກຫລີກ, ເຊິ່ງນອກຈາກເຮັດໃຫ້ສັດຫວ່ງຫ້າມຫລາຍຊະນິດດັບສູນແລ້ວ,
ຍັງມີຄົນຈໍານວນບໍ່ໜ້ອຍເສຍຊີວິດຈາກການຖືກລຸກຫລົງ, ດັ່ງກໍລະນີທີ່ເກີດຂື້ນຢູ່ບ້ານຕາຊຸມ, ເມືອງລອງ, ແຂວງຫລວງນໍ້າທາເມື່ອບໍ່ດົນມານີ້, ໄດ້ມີຜູ້ເສຍຊີວິດຢູ່ໃນປ່າໜຶ່ງຄົນຍ້ອນຖືກຍິງດ້ວຍປືນແກ໋ບເຂົ້າບໍລິເວນໃບໜ້າໜຶ່ງນັດ.
ເຈົ້າໜ້າທີ່ ປກສ ເມືອງລອງ ໃຫ້ຮູ້ວ່າ: ພາຍຫລັງໄດ້ຮັບແຈ້ງຈາກອໍານາດການປົກຄອງບ້ານດັ່ງກ່າວວ່າມີຜູ້ເສຍຊີວິດຢູ່ໃນປ່າຕີນພູຈຶ່ງໄດ້ນໍາກໍາລັງລົງກວດສະຖານທີ່ເກີດເຫດພົບຜູ້ເສຍຊີວິດໜຶ່ງຄົນຊື່ທ້າວ ເອີໂຫລະ ອາຍຸ
25 ປີຢູ່ບ້ານຕາຊຸມ, ເມືອງລອງ ແລະ ຜູ້ກໍເຫດຊື່ທ້າວ ແຍທູ ອາຍຸ
28 ປີຢູ່ບ້ານສາລາ, ເມືອງລອງ. ຜ່ານການສືບສວນ-ສອບສວນຂອງເຈົ້າໜ້າທີ່ທ້າວ ແຍທູ ຮັບສາລະ ພາບວ່າ: ໃນ
ຄ້າຍແລງມື້ເກີດເຫດຕົນເອງ ແລະ ຜູ້ຕາຍໄດ້ພາກັນເອົາປືນແກ໋ບຄົນລະບອກໄປຊອກຍິງສັດໃນປ່າເຂດບໍລິເວນຕີນພູແຄມບ້ານ, ໂດຍແຍກໄປຄົນລະທາງ ແລະ ຜ່ານໄປໄລຍະໜຶ່ງຕົນປະກົດເຫັນຕົ້ນໄມ້ເໜັງຕິງຈຶ່ງຄິດວ່າແມ່ນໂຕຟານຈຶ່ງໄດ້ໃຊ້ປືນຍິງໃສ່ໜຶ່ງນັດ, ຈາກນັ້ນກໍໄດ້ເຂົ້າໄປເບິ່ງແຕ່ແມ່ນໝູ່ຕົນເອງທີ່ຖືກຍິງເຂົ້າທີ່ບໍລິເວນໃບໜ້າຈົນເສຍຊີວິດຄາທີ່, ຫລັງຈາກນັ້ນຕົນຈຶ່ງໄດ້ໄປແຈ້ງຕໍ່ອໍານາດການປົກຄອງບ້ານ ແລະ
ມອບໂຕກັບເຈົ້າໜ້າທີ່ເພື່ອດໍາເນີນຄະດີຕາມລະບຽບກົດໝາຍ. 
No comments:
Post a Comment