ກະຊວງການເງິນຈະເຂັ້ມງວດຕໍ່ການເກັບລາຍຮັບ

   ກະຊວງການເງິນຈະດໍາເນີນຫລາຍມາດຕະການເພື່ອໃຫ້ການຈັດເກັບລາຍຮັບງົບປະມານ 6 ເດືອນທ້າຍສົກປີດີກວ່າເກົ່າ,ພາຍຫລັງເຫັນວ່າການຈັດຕັ້ງປະຕິບັດເກັບລາຍຮັບງົບປະມານໃນ 6 ເດືອນຕົ້ນສົກປີນີ້ບໍ່ໄດ້ຕາມແຜນການວາງໄວ້.

    ໃນກອງປະຊຸມເປີດກວ້າງຂອງຄະນະພັກກະຊວງການເງິນທີ່ສໍາເລັດລົງເມື່ອບໍ່ດົນນີ້,ໂດຍການເປັນປະທານຂອງສະຫາຍເລຂາຄະນະພັກ,ລັດຖະມົນຕີວ່າການກະຊວງການເງິນ ດຣ ລຽນ ທີແກ້ວ,ໄດ້ຕົກລົງສຸມໃສ່ຫລາຍບັນຫາສໍາຄັນຄື:ໃຫ້ບັນດາກົມຮັບພິຊອບກ່ຽວກັບລາຍຮັບຮີບຮ້ອນດໍາເນີນມາດຕະການຕ່າງໆໃຫ້ເຂັ້ມງວດ ແລະ ເກີດໝາກຜົນເປັນຈິງ​ໃນການເກັບລາຍຮັບເພື່ອແກ້ໄຂຄວາມຫຍຸ້ງຍາກ, ໂດຍສະເພາະເອົາໃຈໃສ່ຄຸ້ມຄອງການເກັບລາຍຮັບຈາກຊັບສີນຂອງລັດ ເປັນຕົ້ນ:ຊັບພະຍາກອນແຮ່ທາດ, ການຂາຍໄມ້,ຄ່າບີນຜ່ານ,ຄ່າເຊົ່າ
ແລະ ຄ່າສໍາປະທານຕ່າງໆ ໃຫ້ໄດ້ດີກ​ວ່າ​ເກົ່າ,ພ້ອມດຽວກັນນັ້ນກໍຄົ້ນຄວ້າເພີ່ມເຕີມກົນໄກຕ່າງໆໃນການເກັບລາຍຮັບເພີ່ມຈາກນໍ້າມັນເຊື້ອໄຟເພື່ອທົດແທນລາຍຮັບທີ່ສູນ​ເສຍໄປ ​ແລະ ເອົາໃຈໃສ່ເກັບກໍາ ແລະ ສ້າງຖານຂໍ້ມູນໂດຍການນໍາໃຊ້ລາຄາຊື້ຂາຍຕົວຈິງເພື່ອເກັບລາຍຮັບຈາກພາຫາ

ນະ,ສີນຄ້າຟູມເຟືອຍ,ວັດສະດຸກໍ່ສ້າງ ແລະ ເຄື່ອງໃຊ້ໄຟຟ້າອື່ນໆ,ອັນສໍາຄັນຕ້ອງຂະຫຍາຍຖານອາກອນມູນຄ່າເພີ່ມໃຫ້ຫລາຍຂຶ້ນດ້ວຍການກວດກາ ແລະ ປັບປຸງຫົວໜ່ວຍທຸລະກິດໃຫ້ໄດ້ 715 ຫົວໜ່ວຍ,ໃນນັ້ນກົມສ່ວຍສາອາກອນ 200 ຫົວໜ່ວຍ,ພ້ອມທັງດໍາເນີນມາດຕະການດ້ານກົດໝາຍຕໍ່ຫົວໜ່ວຍທຸລະກິດທີ່ຫລີກລ້ຽງການປະຕິບັດພັນທະ ແລະ ກົດໝາຍສ່ວຍສາອາກອນ ແລະ ກົດໝາຍອື່ນໆທີ່ກ່ຽວຂ້ອງຢ່າງເຂັ້ມງວດ,ສ່ວນດ້ານລາຍຈ່າຍແມ່ນຕ້ອງຮັບປະກັນການເບີກຈ່າຍເງິນເດືອນ,ອຸດໜູນ,ນະໂຍບາຍ,ຊໍາລະໜີ້ສີນຕ່າງປະເທດ ແລະ ລາຍຈ່າຍບູລິມະສິດທີ່ຈໍາເປັນ,ແກ້ໄຂບັນຫາໜີ້ສີນນອກແຜນງົບປະມານ ແລະ ຄຸ້ມຄອງອະນຸມັດລາຍຈ່າຍຢ່າງຮັດກຸມ.

    ນອກຈາກນີ້,ກອງປະຊຸມຍັງໄດ້ປຶກສາຫາລືບັນຫາອື່ນໆທີ່ມີຄວາມຈໍາເປັນເພື່ອ

ແກ້ໄຂວິກິດການການເງິນ,ໂດຍສະເພາະການລະດົມທຸກແຫລ່ງລາຍຮັບດຸ່ນດ່ຽງທີ່ຈໍາເປັນຕາແຜນມີແລ້ວໃຫ້ໝົດ ແລະ ສະເໜີຂັ້ນເທິງພິຈາລະນາແຫລ່ງດຸ່ນດ່ຽງເພີ່ມຕື່ມອີກ ເປັນຕົ້ນການລະດົມທຶນຈາກລາຍຮັບສາຍສົ່ງ.ສໍາລັບການຈັດຕັ້ງປະຕິບັດກົດໝາຍວ່າດ້ວຍງົບປະມານໃໝ່ໃການຈັດຕັ້ງປະຕິບັດງົບປະມານຕາມປີປະຕິທິນນັ້ນແມ່ນໃຫ້ສືບຕໍ່ຄົ້ນຄວ້າ,ປິດງົບປະມານສົກປີນີ້ວັນທີ 30 ກັນຍາ ແລະ ສ້າງແຜນງົບປະມານຂ້າມຜ່ານ 3 ເດືອນໂດຍປະສານສົມທົບກັບກະຊວງແຜນການ ແລະ ການລົງທຶນ ແລະ ເລີ່ມປະຕິບັດງົບປະມານປີປະຕິທິນວັນທີ 1 ມັງກອນ 2017.