ລັດຖະມົນຕີຕ່າງປະເທດ ຕ້ອນຮັບການເຂົ້າຢ້ຽມອຳລາຂອງທ່ານອຸປະທູດອີຢູ

          ໃນວັນທີ 1 ສິງຫາ 2016 ນີ້, ທີ່ກະຊວງການຕ່າງປະເທດ ທ່ານ ສະເຫລີມໄຊ ກົມມະສິດ ລັດ ຖະມົນຕີກະຊວງການຕ່າງປະເທດໄດ້ຕ້ອນຮັບການເຂົ້າຢ້ຽມອຳລາຂອງທ່ານ Michel Goffin, ອຸ ປະທູດອີຢູ.

          ໃນໂອກາດດັ່ງກ່າວ, ທ່ານລັດຖະມົນຕີໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທ່ານອຸປະທູດ ທີ່ໄດ້ເຮັດໜ້າທີ່ສຳເລັດໃນການປະຕິບັດໜ້າທີ ຢູ່ ສປປ ລາວ, ພ້ອມທັງສະແດງຄວາມຂອບ ໃຈຢ່າງຈິງໃຈຕໍ່ການສະໜັບສະໜູນຊ່ວຍເຫລືອຂອງສະຫະພາບເອີຣົບທີ່ມີຕໍ່ ສປປ ລາວ ໃນໄລຍະຜ່ານມາ. ເຊິ່ງເປັນການປະກອບສ່ວນອັນສຳຄັນ ເຂົ້າໃນການພັດທະນາປະເທດຊາດ ເພື່ອນຳເອົາ ສປປ ລາວ ອອກຈາກສະຖານະພາບປະເທດດ້ອຍພັດທະນາໃນປີ 2020.

          ໃນໂອກາດດັ່ງກ່າວ, ທ່ານ ລັດຖະມົນຕີ ຍັງໄດ້ປຶກສາຫາຫລືທິດທາງທີ່ຈະສືບຕໍ່ ເສີມຂະ ຫຍາຍການພົວພັນຮ່ວມມືໃນຕໍ່ໜ້າ ແລະ ບັນຫາທີ່ຍັງຄ້າງຄາ ເພື່ອຈະໄດ້ປັບປຸງ ແລະ ເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງ ລາວ-ອີຢູ ໃຫ້ນັບມື້ນັບດີຂຶ້ນ. ພ້ອມທັງສະແດງຄວາມຫວັງວ່າສາຍພົວພັນມິດຕະພາບ ແລະ ການຮ່ວມມື ລະຫວ່າງສອງຝ່າຍຈະສືບຕໍ່ຮັບແໜ້ນ ແລະ ຂະຫຍາຍ ຕົວຍິ່ງຂຶ້ນໃນອານາຄົດ.