ກອງປະຊຸມຜູ້ນຳລັດຖະສະພາສະມາຊິກໄອປາ ແລະ ອາຊຽນ

            ກອງປະຊຸມພົບປະລະຫວ່າງຜູ້ນeລັດຖະສະພາສະມາຊິກໄອປາ ແລະ ຜູ້ນຳລັດຖະບານອາຊຽນ, ໄດ້ຈັດຂຶ້ນຢ່າງເປັນທາງການໃນວັນທີ 5 ກັນຍານີ້, ທີ່ນະຄອນຫລວງວຽງຈັນ, ໂດຍການເປັນປະທານຮ່ວມຂອງທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ, ທ່ານ ສາວິເຍສ ວາຣັນ ປະທານໄອປາ ທັງເປັນປະທານສະພາສູງແຫ່ງມາເລເຊຍ, ມີບັນດາປະທານ-ຮອງປະທານລັດຖະສະພາ, ຫົວໜ້າຄະນະຜູ້ແທນສະມາຊິກໄອປາເຂົ້າຮ່ວມຢ່າງພ້ອມພຽງ, ເພື່ອປຶກສາຫາລືຫລາຍບັນຫາສຳຄັນທີ່ພົວພັນເຖິງພາລະບົດບາດ, ສິດໜ້າທີ່ຂອງໄອປາ, ທັງເປັນການສົ່ງເສີມຄວາມຢູ່ດີກິນດີ ແລະ ການດຳລົງຊີວິດທີ່ດີຂອງປະຊາຊົນພາຍໃນອາຊຽນ, ປະກອບສ່ວນເຮັດໃຫ້ບັນດາແຜນງານການສ້າງປະຊາຄົມອາຊຽນໃຫ້ມີຄວາມເຂັ້ມແຂງ ແລະ ຈະເລີນກ້າວໜ້າ.

            ທ່ານນາງ ປານີ ຢາທໍ່ຕູ້ ໄດ້ກ່າວຄໍາເຫັນຕໍ່ທີ່ປະຊຸມວ່າ: ກອງປະຊຸມເທື່ອນີ້, ຈັດຂຶ້ນໃນໂອ ກາດກອງປະຊຸມສຸດຍອດຄັ້ງທີ 28 ແລະ 29 ທີ່ ສ ປປ ລາວ ໄດ້ຮັບກຽດເປັນເຈົ້າພາບຈັດຂຶ້ນໃນວັນທີ 6-8 ກັນຍານີ້, ນັບວ່າເປັນການສະໜັບສະໜູນ ແລະ ເປັນກຳລັງໃຈສູງສົ່ງແກ່ສະພາແຫ່ງຊາດ, ລັດຖະບານ ກໍຄື ປະຊາຊົນລາວບັນດາເຜົ່າໃນການຈັດກອງປະຊຸມສຸດຍອດອາຊຽນ ແລະ ກອງປະຊຸມກ່ຽວຂ້ອງອື່ນໆທີ່ສໍາຄັນຄັ້ງນີ້ໄດ້ຮັບຜົນສຳເລັດຢ່າງຈົບງາມ ແລະ ໄອປາໃນນາມເປັນກົນໄກການຮ່ວມມືລັດຖະສະພາຂອງບັນດາປະເທດສະມາຊິກອາຊຽນ, ເປັນຕົວແທນຂອງປະຊາຊົນ, ມີໜ້າທີ່ໃຫ້ການສະໜັບສະໜູນຊຸກຍູ້ການຈັດຕັ້ງປະຕິບັດຂໍ້ລິເລີ່ມຕ່າງໆຂອງອາຊຽນເພື່ອໃຫ້ບັນລຸຜົນສຳ ເລັດໃນການສ້າງຄວາມເປັນເອກະພາບອັນໜຶ່ງດຽວຂອງຜູ້ນຳໄອປາ ເພື່ອນຳສະເໜີຕໍ່ຜູ້ນຳອາຊຽນພິຈາລະນາຕາມຄຳຂວັນທີ່ວ່າ: “ຫັນວິໄສທັດໃຫ້ເປັນຮູບປະທຳ ເພື່ອຄວາມເຂັ້ມແຂງຂອງປະຊາຄົມອາຊຽນ”.