ໃນໂອກາດເຂົ້າຮ່ວມປິດກອງປະຊຸມຕີລາຄາການຈັດຕັ້ງປະຕິບັດວຽກງານ 3 ສ້າງໃນຂອບເຂດທົ່ວປະເທດ
ທີ່ໄດ້ຈັດຂຶ້ນໃນວັນທີ 4-5 ກຸມພານີ້ ຢູ່ສູນເຝິກອົບຮົມ ICTC ນະຄອນຫລວງວຽງຈັນ,
ໃນບ່າຍວານນີ້,ສະຫາຍ ເລຂາທິການໃຫຍ່ ຈູມມາລີ ໄຊຍະສອນ ໄດ້ແນະນຳຕື່ມຫລາຍບັນຫາທີ່ສຳຄັນ
ເພື່ອກະຕຸກຊຸກຍູ້ໃຫ້ການຈັດຕັ້ງ ປະຕິບັດວຽກງານດັ່ງກ່າວເຂົ້າສູ່ລວງເລິກ ເຊິ່ງບັນຫາທຳອິດ
ສະ ຫາຍເລຂາທິການໃຫຍ່ ໄດ້ອະທິ ບາຍ ແລະ ເນັ້ນຄືນກ່ຽວກັບວຽກງານ 3 ສ້າງແມ່ນຫຍັງ
? ມັນແມ່ນການເອົາມະຕິ IX ເຂົ້າສູ່ການປະຕິບັດຕົວຈິງ ໂດຍສະເພາະທິດນຳຍຸດທະສາດສ້າງຄວາມໝັ້ນຄົງໃຫ້ແກ່ລັດປະຊາ
ທິປະໄຕປະຊາຊົນ ແລະ ທິດນຳກ່ຽວກັບ 4 ບຸກທະ ລຸໃຫ້ເປັນຈິງ. ສະນັ້ນ ຂ້າພະເຈົ້າ ຈຶ່ງຂໍເນັ້ນຄືນວ່າ:
“3 ສ້າງແມ່ນການປະຕິບັດອັນເລິກເຊິ່ງເຖິງຖອງໃນເງື່ອນໄຂໃໝ່”.
ເວົ້າວ່າການປະຕິບັດ ກໍຍ້ອນວ່າ 3 ສ້າງແມ່ນວຽກຍຸດທະສາດຍາວນານ ເພື່ອບັນລຸຈຸດໝາຍ
ເຮັດໃຫ້ລະບອບປະຊາທິປະໄຕປະຊາຊົນຂອງພວກເຮົາມີຄວາມໝັ້ນຄົງ. ລະບອບປະຊາທິປະໄຕປະຊາຊົນມີຄວາມໝັ້ນຄົງ
ພວກເຮົາຈຶ່ງບັນລຸອຸດົມການທີ່ວ່າ: “ປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ,
ສັງຄົມມີປະຊາທິປະໄຕ, ຍຸຕິທຳ ແລະ ສີວິໄລ”. ອຸດົມການດັ່ງກ່າວນັ້ນ ໃນເນື້ອແທ້ມັນກໍແມ່ນ
“ສັງຄົມນິ ຍົມ”. ສະນັ້ນ
ເວົ້າວ່າ 3 ສ້າງ ແມ່ນການປະຕິບັດອັນເລິກເຊິ່ງເຖິງຖອງໃນເງື່ອນໄຂໃໝ່
ແມ່ນໝາຍເຖິງການສ້າງບັນດາປະຖົມປັດໄຈ ແລະ ເງື່ອນໄຂຕ່າງໆໃຫ້ແກ່ການບັນລຸຈຸດໝາຍສັງຄົມນິ
ຍົມ ໂດຍເລີ່ມແຕ່ຮາກຖານຂຶ້ນມາ ແລະ 3 ສ້າງ ແມ່ນການເສີມຂະ ຫຍາຍສິດເປັນເຈົ້າໃຫ້ແກ່ທ້ອງຖິ່ນຮາກຖານ.
ຂ້າພະເຈົ້າເວົ້າອັນນີ້ກໍເພື່ອໃຫ້ເຂົ້າໃຈນຳກັນວ່າ: 3 ສ້າງ ແມ່ນສິ່ງທີ່ຕ້ອງເປັນໄປ
ເພື່ອເພີ່ມທະວີບົດບາດນຳພາ ແລະ ຍົກສູງຄວາມສາມາດກຳອຳນາດນຳພາຂອງພັກ. ພ້ອມກັນນັ້ນ
ກໍເພີ່ມຄວາມສັກສິດໃນການຄຸ້ມຄອງ-ບໍລິຫານຂອງລັດເຮົາ. ອັນສຳຄັນໃນນັ້ນແມ່ນໃຫ້ທ້ອງຖິ່ນຮາກຖານມີສິດເປັນເຈົ້າ
ຫລາຍຂຶ້ນ ແລະ ມີຄວາມຮັບຜິດ ຊອບເພີ່ມຂຶ້ນ ຕິດພັນກັບການໄດ້ຮັບຜົນປະໂຫຍດຢ່າງເໝາະສົມ.
ຖ້າເຮັດຄືແນວນັ້ນ ໃນທີ່ສຸດທ້ອງຖິ່ນຮາກຖານກໍຈະມີຄວາມເຂັ້ມແຂງ, ຖ້າຫາກທຸກທ້ອງຖິ່ນຮາກຖານ
ໂດຍສະເພາະແມ່ນ 51 ເມືອງ ແລະ 108 ບ້ານເປົ້າໝາຍ ມີຄວາມເຂັ້ມແຂງ, ພື້ນຖານຂອງລະບອບປະຊາທິປະໄຕປະຊາຊົນກໍຈະມີຄວາມແໜ້ນແກ່ນ,
ປະເທດຊາດກໍຈະມີຄວາມໝັ້ນຄົງ.
ສະຫາຍ ເລຂາທິການໃຫຍ່ ເນັ້ນຕື່ມວ່າ: ເຮັດ 3 ສ້າງ ແມ່ນການຊຸກຍູ້ການພັດທະນາເຂົ້າສູ່ບາດລ້ຽວໃໝ່
ໂດຍສະເພາະການແກ້ໄຂຄວາມທຸກຍາກຂອງຄອບ ຄົວໃຫ້ຍັງເຫລືອບໍ່ເກີນ 10% ແລະ
ບັນລຸເປົ້າໝາຍສະຫັດສະວັດດ້ານການພັດທະນາໃນປີ 2015. ຈາກນັ້ນ ເມື່ອຮອດປີ
2020 ປະເທດເຮົາຕ້ອງຫລຸດພົ້ນຈາກຄວາມດ້ອຍພັດທະນາ. ບາດລ້ຽວໃໝ່ອັນນີ້ ມັນມີລັກສະນະປະຫວັດ
ສາດສຳລັບປະເທດເຮົາ ເພາະວ່າປະເທດເຮົາໄດ້ຕົກຢູ່ໃນກຸ່ມປະເທດທີ່ດ້ອຍພັດທະນາຫລ້າຫລັງມາເປັນເວລາຍາວນານຫລາຍປີ.
ແຕ່ວ່າອີກບໍ່ທໍ່ໃດປີຕໍ່ໜ້ານີ້ ພວກເຮົາຈະພ້ອມກັນເປີດສັງກາດໃໝ່, ສັງກາດແຫ່ງຄວາມພາກພູມໃຈທີ່ປະເທດເຮົາຈະມີຖານະອັນສົມກຽດໃນເວທີປະຊາຄົມໂລກ
ນັ້ນຄືການຫລຸດພົ້ນຈາກກຸ່ມປະເທດດ້ອຍພັດທະນາ. ແຕ່ວ່າ ການກ້າວສູ່ບາດລ້ຽວໃໝ່ທີ່ວ່ານັ້ນ
ມັນມີລັກສະນະທ້າທາຍ ແລະ ບໍ່ງ່າຍປານໃດ. ພວກເຮົາຕ້ອງມີມານະຈິດ ແລະ ຕ້ອງບຸກບືນສຸດຂີດ
ຈຶ່ງຈະບັນລຸໄດ້. ສະນັ້ນ ຕ້ອງເອົາ 3 ສ້າງເປັນປັດໄຈຕັດສິນ, ຕ້ອງປະຕິບັດ 3 ສ້າງຢ່າງຕັ້ງໜ້າ,
ເຮັດໃຫ້ຖືກທິດ ແລະ ເຮັດໃຫ້ມີຜົນສຳເລັດ, ເຮັດຄືແນວນັ້ນ ເຊື່ອວ່າຈະເຮັດໃຫ້ການພັດທະນາເຂົ້າສູ່ບາດລ້ຽວໃໝ່ອັນເປັນປະຫວັດສາດໄດ້.
ການເຮັດໃຫ້ 3 ສ້າງເປັນປັດໄຈຊຸກຍູ້ສົ່ງເສີມການພັດທະນາສູ່ບາດລ້ຽວໃໝ່ ຕ້ອງມີແຜນການ,
ມີໂຄງການລະອຽດຕົວຈິງ ເຊິ່ງໃນນີ້ຕົ້ນຕໍແມ່ນໂຄງການຢູ່ເມືອງ ແລະ ຢູ່ບ້ານ.
ໂຄງການຢູ່ເມືອງ ແລະ ເຮັດຢູ່ບ້ານມີຄວາມສຳຄັນກໍຍ້ອນວ່າບັນຫາທີ່ຕ້ອງແກ້ຕົວຈິງມັນຢູ່ບ່ອນນັ້ນ.
ບັນຫາຄວາມ ທຸກຍາກຂອງຄອບຄົວ-ບັນຫາການບັນລຸເປົ້າໝາຍສະຫັດສະວັດກໍແມ່ນຢູ່ເມືອງ
ແລະ ຢູ່ບ້ານ. ດຽວນີ້ ພວກເຮົາໄດ້ເລືອກເມືອງເປົ້າໝາຍ ແລະ ບ້ານເປົ້າໝາຍຮຽບຮ້ອຍແລ້ວ
(ແຂວງໜຶ່ງ 3 ເມືອງ, ເມືອງໜຶ່ງ 2 ບ້ານ), ທົ່ວປະເທດມີ 51 ເມືອງ ແລະ 108 ບ້ານເປົ້າໝາຍ.
ຖ້າຫາກພວກເຮົາຍູ້ການພັດທະນາສູ່ບາດລ້ຽວໃໝ່ໄດ້ສຳເລັດໝົດທຸກເມືອງ ແລະ
ທຸກບ້ານເປົ້າໝາຍ, ຂ້າພະເຈົ້າເຊື່ອວ່າປະເທດເຮົາຈະມີພື້ນຖານເສດຖະກິດດີພໍສົມຄວນ,
ປະຊາຊົນສ່ວນຫລາຍຈະມີຊີວິດການເປັນຢູ່ທີ່ດີ, ມີພໍກິນພໍໃຊ້. ສະນັ້ນ ຈຶ່ງບໍ່ໃຫ້ເພີ່ມຈຳນວນເມືອງ
ແລະ ບ້ານເປົ້າໝາຍຕື່ມອີກ, ຖ້າຫາກວ່າຢູ່ແຂວງໃດ ເລືອກເອົາເມືອງ ແລະ ບ້ານເປົ້າ
ໝາຍບໍ່ຖືກຕາມເງື່ອນໄຂສ້າງເປັນເມືອງເຂັ້ມແຂງຮອບດ້ານ ແລະ ເປັນບ້ານພັດທະນາ
ເປັນຕົວເມືອງນ້ອຍໃນຊົນນະບົດ ແມ່ນໃຫ້ເລືອກໃໝ່ປ່ຽນແທນ, ແຕ່ວ່າບໍ່ໃຫ້ເພີ່ມຈຳນວນ.
ໝາຍຄວາມວ່າ: ໃຫ້ສຸມໃສ່ສ້າງເມືອງ ແລະ ບ້ານເປົ້າໝາຍທີ່ໄດ້ຮັບຮອງເອົາແລ້ວນັ້ນໃຫ້ໄດ້ຕາມຄາດໝາຍ.
ເມືອງໃດ, ບ້ານໃດມີເງື່ອນໄຂສະ ດວກກວ່າ, ມີຄວາມສາມາດເຮັດໄດ້ໄວ ກໍໃຫ້ສຸມໃສ່ເຮັດໃຫ້ສຳເລັດກ່ອນ,
ສ່ວນເມືອງໃດ, ບ່ອນໃດມີເງື່ອນໄຂສະດວກໜ້ອຍກວ່າ ກໍໃຫ້ສຸມໃສ່ຢ່າງຕັ້ງໜ້າ
ເຖິງວ່າຈະໃຊ້ເວລາຫລາຍກວ່າກໍຕາມ, ແຕ່ໃນທີ່ສຸດຕ້ອງໃຫ້ເປັນເມືອງເຂັ້ມແຂງຮອບດ້ານ.
ສະຫລາຍ ເລຂາທິການໃຫຍ່ ເນັ້ນຕື່ມວ່າ: ອັນສຳຄັນທີ່ຢາກໃຫ້ເອົາໃຈໃສ່ໃນສະເພາະໜ້ານີ້ແມ່ນ
ການຂຶ້ນແຜນການກຳນົດໂຄງ ການຈຸດສຸມພັດທະນາສຳລັບສົກປີ 2013-2014 ແລະ ຕ້ອງເຮັດຕິດພັນກັບຂະບວນການກະກຽມດຳເນີນກອງປະຊຸມໃຫຍ່
3 ຂັ້ນ ຢູ່ແຕ່ລະທ້ອງຖິ່ນ ແລະ ຮາກຖານ. ໝາຍຄວາມວ່າ: ເອົາຂະບວນ ການ 3 ສ້າງເປັນບ່ອນອີງສຳລັບການສ້າງບົດລາຍງານການເມືອງ,
ເອົາ 3 ສ້າງເປັນໂຮງຮຽນ ເພື່ອເຝິກຝົນທົດສອບ ແລະ ບຳ ລຸງສ້າງພະນັກງານ. ຈາກນັ້ນ
ຈຶ່ງເອົາພະນັກງານກັບທີ່ຍູ້ຂະບວນການ 3 ສ້າງ ກໍຄືການພັດ ທະນາຢູ່ທ້ອງຖິ່ນຮາກຖານໃຫ້ດຳເນີນໄປຢ່າງຕໍ່ເນື່ອງ
ແລະ ມີຄວາມຍືນຍົງ.
ໃນໂອກາດກ່າວປິດກອງປະ ຊຸມດັ່ງກ່າວ, ສະຫາຍ ບຸນຍັງ ວໍ ລະຈິດ ຜູ້ປະຈຳການເລຂາທິການສູນກາງພັກ
ທັງເປັນຫົວໜ້າຄະ ນະຊີ້ນຳເຮັດທົດລອງ 3 ສ້າງຂັ້ນສູນກາງ ໄດ້ເນັ້ນຕື່ມວ່າ:
1. ໃຫ້ຈັດຕັ້ງການເຜີຍແຜ່, ຄົ້ນຄວ້າກຳແໜ້ນບົດຄວາມເຫັນຂອງສະ ຫາຍເລຂາທິການໃຫຍ່
ປະທານປະເທດ ໃຫ້ແກ່ພະນັກງານ-ສະ ມາຊິກພັກຜູ້ເປັນຫລັກແຫລ່ງ. ຈາກນັ້ນ ກໍໃຫ້ປຶກສາຫາລືພາຍໃນຄະນະພັກ-ຄະນະຮັບຜິດຊອບຂັ້ນຂອງຕົນ
ເພື່ອຜັນຂະຫຍາຍເຂົ້າສູ່ຕົວຈິງໂດຍໄວ ທັງຮັບປະ ກັນໃຫ້ 3 ສ້າງເຂົ້າສູ່ລວງເລິກ.
2. ໃຫ້ຮີບຮ້ອນກວດກາຄືນບັນດາໜ້າວຽກທີ່ໄດ້ເຮັດ ແລະ ເອກະ ສານນິຕິກຳຕ່າງໆທີ່ໄດ້ອອກໄປແລ້ວ,
ອັນໃດທີ່ເຫັນວ່າມັນບໍ່ຖືກຕາມທິດຊີ້ນຳທີ່ສະຫາຍເລຂາທິ ການໃຫຍ່ມີຄວາມເຫັນ
ກໍຄືເອກະ ສານແນະນຳທີ່ພວກເຮົາໄດ້ຄົ້ນ ຄວ້ານຳກັນ ກໍໃຫ້ດຳເນີນການປັບປຸງແກ້ໄຂໂດຍໄວ,
ສິ່ງສຳຄັນແມ່ນໃຫ້ມີການປະສານສົມທົບປຶກສາເປັນເອກະພາບກັນລະ ຫວ່າງຂະແໜງການກັບທ້ອງຖິ່ນ.
3. ໃຫ້ບັນດາສະຫາຍສືບຕໍ່ຄົ້ນ ຄວ້າ ແລະ ຂຽນຄວາມເຫັນໃສ່ບັນດາເອກະສານແນະນຳແຕ່ລະບັນຫາກ່ຽວກັບ
3 ສ້າງທີ່ໄດ້ສົ່ງໃຫ້ບັນດາສະຫາຍແລ້ວນັ້ນ. ຂຽນແລ້ວໃຫ້ສົ່ງຄືນກອງເລຂາ ຊ້າສຸດບໍ່ໃຫ້ກາຍວັນທີ
10 ກຸມພານີ້. ຈາກນັ້ນ ຄະນະຮັບຜິດຊອບຂັ້ນ ສູນກາງຈະສ້າງເປັນເອກະສານແນະນຳສະບັບສົມບູນສົ່ງຄືນໃຫ້ແຕ່ລະກະຊວງ
ແລະ ທ້ອງຖິ່ນ. ສະເພາະເອກະສານທາບທາມກ່ຽວກັບການປະຕິບັດລະບອບອຸດໜູນໃຫ້ແກ່ນາຍບ້ານ
ແລະ ເປົ້າໝາຍອື່ນໆໃນອົງການປົກ ຄອງບ້ານນັ້ນ ໃຫ້ແຕ່ລະແຂວງເບິ່ງໄວ ແລະ ສົ່ງຄືນໃຫ້ກອງເລ
ຂາໄວທໍ່ໃດຍິ່ງດີ. ອັນນີ້ສຳຄັນ ເພາະວ່າຄະນະຮັບຜິດຊອບຈະໄດ້ສັງລວມ ແລະ ສະເໜີຕໍ່ກົມການເມືອງພິຈາລະນາໃນມໍ່ໆຕໍ່ໜ້ານີ້.
4. ເນື່ອງຈາກວ່າຂອດການປະ ສານງານຍັງບໍ່ທັນດີ.ສະນັ້ນ ການ ລົງໄປທ້ອງຖິ່ນ-ຮາກຖານຂອງບັນດາຂະແໜງການສາຍຕັ້ງ
ຈຶ່ງສ້າງພາລະຮັບແຂກ ແລະ ເຮັດວຽກຊ້ຳຊາກໃຫ້ແກ່ທ້ອງຖິ່ນຫລາຍ. ຕໍ່ໄປນີ້
ໃຫ້ກອງເລຂາຂອງຄະນະຮັບຜິດຊອບຂັ້ນສູນກາງ ເຮັດໜ້າທີ່ປະສານງານກັບກອງເລຂາຂອງແຕ່ລະກະຊວງ
ແລະ ແຕ່ລະທ້ອງຖິ່ນໃຫ້ເລິກເຊິ່ງເປັນລະບົບຕື່ມອີກ, ສ່ວນກອງເລຂາຂອງແຕ່ລະກະຊວງ
ແລະ ແຂວງກໍໃຫ້ມີຄວາມເປັນເຈົ້າ ການລາຍງານ ແລະ ປະສານກັບກອງເລຂາສູນກາງຕື່ມ.ເປັນຫຍັງ
ຈຶ່ງຢາກໃຫ້ມີການປະສານງານແໜ້ນຕື່ມ ? ອັນນີ້ແມ່ນຍ້ອນວ່າໃນເດືອນພຶດສະພາ
2013 ນີ້, ພວກເຮົາຈະໄດ້ສະຫລຸບລາຍງານເບື້ອງຕົ້ນໃຫ້ກົມການເມືອງ ແລະ ສູນກາງກ່ຽວກັບ
3 ສ້າງ. ສະນັ້ນ ຈຶ່ງຂໍການຮ່ວມມືດ້ານການປະສານງານນີ້ໃຫ້ດີຕື່ມ.
No comments:
Post a Comment